កងទ័ពការពារព្រំដែនខេត្ដ Tay Ninh ជូនពរឆ្នាំថ្មីនៅកម្ពុជា

ក្នុងបរិយាកាសដ៏កក់ក្តៅនិងជិតស្និទ្ធ ក្នុងនាមគណៈប្រតិភូ លោកវរសេនីយ៍ឯក  Nguyen Van Giap មេបញ្ជាការគណៈបញ្ជាការដ្ឋានកងទ័ពការពារព្រំដែនបានជូនពរបវមហាប្រសើរដល់នាយទាហាន នាយទាហានរង និងពលទាហាននៃបណ្ដាកងកម្លាំងកម្ពុជាក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។

គណៈប្រតិភូគណៈបញ្ជាកងទ័ពការពារព្រំដែនខេត្ត Tay Ninh ជូនពរឆ្នាំថ្មីដល់តំបន់ប្រតិបត្ដិការសឹករងស្វាយរៀង

ក្នុងពេលជាមួយគ្នានេះ ទំនាក់ទំនងសាមគ្គីភាព មិត្ដភាពជាប្រពៃណីរវាងកងទ័ពការពារព្រំដែនខេត្ត Tay Ninh និងអង្គភាពនានារបស់កម្ពុជា នាពេលកន្លងមក ត្រូវបានពង្រឹង និងពង្រីកជាបន្តបន្ទាប់ ដែលក្លាយជាមូលដ្ឋានគ្រឹះដ៏រឹងមាំក្នុងការអនុវត្តភារកិច្ចគ្រប់គ្រង និងការពារអធិបតេយ្យភាពទឹកដី និងរក្សាសន្តិសុខ និងសណ្តាប់ធ្នាប់នៅតំបន់ព្រំដែន។

កងទ័ពការពារព្រំដែនខេត្ត Tay Ninh ប្រគល់អំណោយ និងជូនពរឆ្នាំថ្មីដល់បញ្ជាការដ្ឋានកងរាជអាវុធហត្ថខេត្តព្រៃវែង

ភាគីទាំងពីរបានឯកភាពគ្នាបន្តពង្រឹងការសម្របសម្រួល និងផ្លាស់ប្តូរព័ត៌មាន ក្ដាប់ជាប់នូវស្ថានការណ៍និងប្រយុទ្ធប្រឆាំងនឹងឧក្រិដ្ឋកម្មឆ្លងដែន និងការរំលោភច្បាប់តាមបណ្តោយព្រំដែនប្រកបដោយប្រសិទ្ធភាព រក្សាការល្បាតទ្វេភាគី  គ្រប់គ្រងខ្សែព្រំដែន និងបង្គោលព្រំដែនយ៉ាងតឹងរ៉ឹង និងការពារយ៉ាងរឹងមាំនូវសមិទ្ធផលនៃការបោះបង្គោលព្រំដែន។

ទន្ទឹមនឹងនោះ បង្កើនការឃោសនានិងចលនាប្រជាជននៅសងខាងព្រំដែនឱ្យគោរពឯកសារច្បាប់ស្តីពីព្រំដែន កិច្ចព្រមព្រៀងសហប្រតិបត្តិការរវាងរដ្ឋាភិបាលទាំងពីរនិងច្បាប់នៃប្រទេសនីមួយៗ។ លើកកម្ពស់សកម្មភាពផ្លាស់ប្តូរយោបល់ និងចងសម្ព័ន្ធមេត្រីភាព រួមចំណែកដល់ការកសាងព្រំដែនសន្តិភាព មិត្តភាព សហប្រតិបត្តិការ និងអភិវឌ្ឍន៍។

កងទ័ពការពារព្រំដែនខេត្ដ Tay Ninh ជូនពរឆ្នាំថ្មីនៅស្នងការដ្ឋាននគរបាលខេត្ដត្បូងឃ្មុំ

តំណាងមេបញ្ជាការនៃបណ្ដាអង្គភាពរបស់ភាគីកម្ពុជា បានសម្តែងនូវសេចក្តីរីករាយ និងវាយតម្លៃខ្ពស់ចំពោះមនោសញ្ចេតនារបស់កងទ័ពការពារព្រំដែន​ខេត្ត Tay Ninh ព្រមទាំងសង្កត់ធ្ងន់ថា ទំនាក់ទំនងសហប្រតិបត្តិការរវាងបណ្ដាកងកម្លាំងកាន់តែស៊ីជម្រៅ និងមានប្រសិទ្ធភាពនាពេលកន្លងមក។ ព្រមទាំងបញ្ជាក់ថា ដំណើរទស្សនកិច្ចទៅជូនពរឆ្នាំថ្មីប្រពៃណីជាតិនៃប្រទេសនីមួយៗមិនត្រឹមតែជាអត្ដសញ្ញាណវប្បធម៌ប៉ុណ្ណោះទេ ប៉ុន្តែថែមទាំងជានិមិត្តរូបដ៏រស់រវើកនៃសាមគ្គីភាពរវាងវៀតណាមនិងកម្ពុជា និងកងកម្លាំងការពារព្រំដែននៃភាគីទាំងពីរ៕

បកប្រែដោយ Pham Diep