ពិធីចងសម្ព័ន្ធមេត្រីភាពនៃក្រុមលំនៅឋាននៅសងខាងព្រំដែនវៀតណាម-កម្ពុជា

គណៈប្រតិភូវៀតណាមដឹកនាំដោយលោកនាយឧត្តមសេនីយ៍ Phan Van Giang សមាជិកការិយាល័យនយោបាយ អនុលេខានៃគណៈកម្មាធិការបក្សយោធាមជ្ឈិម រដ្ឋមន្ត្រីក្រសួងការពារប្រទេស និងគណៈប្រតិភូកម្ពុជាដឹកនាំដោយលោក​នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។

រដ្ឋមន្ត្រីទាំងពីរថតរូបជាមួយប្រតិភូនៅក្នុងពិធីចងសម្ព័ន្ធមេត្រីភាពនៃក្រុមលំនៅឋាននៅសងខាងព្រំដែនវៀតណាម-កម្ពុជា

យោងតាមកិច្ចព្រមព្រៀងចងសម្ព័ន្ធមេត្រីភាព ប្រជាជនភូមិ Long Cuong និងភូមិអូរតាមោ គោរពយ៉ាងម៉ឺងម៉ាត់តាមច្បាប់នៃប្រទេសនីមួយៗ និងឯកសារដែលបានចុះហត្ថលេខាអំពីព្រំដែនរវាងប្រទេសទាំងពីរ ហើយចូលរួមយ៉ាងសកម្មក្នុងការការពារព្រំដែន ក្រោមការដឹកនាំរបស់អាជ្ញាធរមូលដ្ឋាន និងការណែនាំពីកងកម្លាំងគ្រប់គ្រងការពារព្រំដែននៃប្រទេសនីមួយៗ។ ផ្លាស់ប្តូរបទពិសោធន៍ សម្របសម្រួល ជួយគ្នាទៅវិញទៅមកក្នុងបច្ចេកទេសផលិតកម្ម និងកសាងគម្រោងមួយចំនួនដែលបម្រើដល់ជីវភាពរស់នៅ​ប្រចាំថ្ងៃ និងការអភិវឌ្ឍសេដ្ឋកិច្ច ស្របតាមស្ថានភាពជាក់ស្តែងរបស់ភាគីនីមួយៗ។ រៀបចំសឲ្យប្រជាជនទៅសួរសុខទុក្ខសាច់ញាតិនៅក្នុងឱកាសពិធីបុណ្យនានា និងទៅទស្សនា ស្វែងយល់អំពីប្រពៃណី និងជួបប្រាស្រ័យផ្លាស់ប្តូរវប្បធម៌របស់ភាគីនីមួយៗ។ រៀងរាល់ ៣ ខែម្តង ភាគីទាំងពីរប្តូរវេនគ្នាជួបជុំ ផ្លាស់ប្តូរស្ថានភាព និងដោះស្រាយបញ្ហាពាក់ព័ន្ធ។ នៅពេលមានបញ្ហាបន្ទាន់កើកឡើងនៅភាគីណាមួយ ភាគីនោះនឹងជូនដំណឹងដល់ភាគីម្ខាងទៀតជាមុន ដើម្បីជួបពិភាក្សា និងដោះស្រាយ។ ចំពោះបញ្ហាធំៗ ឬបញ្ហាទាក់ទងនឹងព្រំដែន ត្រូវជូនដំណឹងជាបន្ទាន់ដល់អាជ្ញាធរមូលដ្ឋាន និងកងកម្លាំងគ្រប់គ្រងការពារព្រំដែនរបស់ភាគីនីមួយៗ។

លោកនាយឧត្តមសេនីយ៍ Phan Van Giang និងលោកនាយឧត្តមសេនីយ៍ ទៀ សីហា ប្រគល់អំណោយជូនភូមិ Long Cuong និងភូមិអូរតាមោ

មេភូមិ និងប្រជាជននៃភូមិទាំងពីរ បានឯកភាពគ្នាថែរក្សា និងអនុវត្តខ្លឹមសារពោលខាងលើ រួមចំណែកដល់ការកសាងព្រំដែនរវាងប្រទេសទាំងពីរប្រកបដោយសន្តិភាព ស្ថិរភាព មិត្តភាព សហប្រតិបត្តិការ និងអភិវឌ្ឍន៍ ។

កាសែតកងទ័ពប្រជាជននឹងបន្តធ្វើបច្ចុប្បន្នភាពអំពីសកម្មភាពនានាក្នុងក្របខ័ណ្ឌនៃការជំនួបប្រាស្រ័យមិត្តភាពការពារជាតិព្រំដែនវៀតណាម-កម្ពុជា លើកទី២៕

បកប្រែដោយ Duy Hoan