គណៈប្រតិភូក្រសួងការពារប្រទេសវៀតណាមចូលរួមពិព័រណ៍ការពារជាតិ និងសន្តិសុខឆ្នាំ២០២៥ នៅប្រទេសថៃ

គណៈប្រតិភូបានចូលរួមពិធីបើក ទស្សនាស្តង់ និងកន្លែងតាំងបង្ហាញផលិតផលរបស់សហគ្រាស និងសាជីវកម្មធំៗជាច្រើននៅលើពិភពលោក ព្រមទាំងមានជំនួបធ្វើការ ជំនួបទ្វេភាគី ជាមួយប្រធានគណៈប្រតិភូមកពីប្រទេសដទៃទៀត។

លោកឧត្តមសេនីយ៍ត្រី Nguyen Ba Luc ទស្សនាស្តង់ផលិតផលនៅក្នុងពិព័រណ៍

នៅក្នុងជំនួបទាំងឡាយ លោកឧត្តមសេនីយ៍ត្រី Nguyen Ba Luc បានថ្លែងអំណរគុណចំពោះក្រសួងការពារជាតិនៃប្រទេសម្ចាស់ផ្ទះ និងប្រទេសជាមិត្ត ក៏ដូចជាសហគ្រាសការពារជាតិ ដែលបានចាត់បញ្ជូនគណៈប្រតិភូមកចូលរួម និងតាំងបង្ហាញផលិតផលនៅក្នុងពិព័រណ៍ការពារជាតិអន្តរជាតិវៀតណាមលើកទី២។ លោកឧត្តមសេនីយ៍ត្រី Nguyen Ba Luc បានស្វាគមន៍ក្រសួងការពារជាតិ និងកងទ័ពនៃបណ្តាប្រទេសដែលចូលរួម និងបញ្ជាក់ពីការត្រៀមខ្លួនជាស្រេចក្នុងការបង្កើតលក្ខខណ្ឌអំណោយផលសម្រាប់សហគ្រាសការពារជាតិនៃប្រទេសនានាចូលរួម ដាក់តាំងបង្ហាញផលិតផលរបស់ពួកគេនៅក្នុងពិព័រណ៍ការពារជាតិអន្តរជាតិវៀតណាមលើកទី៣ នាពេលខាងមុខ។

លោកឧត្តមសេនីយ៍ត្រី Nguyen Ba Luc ទស្សនាស្តង់ផលិតផលនៅក្នុងពិព័រណ៍

ក្នុងឱកាសទស្សនាស្តង់ផលិតផលរបស់ក្រុមហ៊ុនផលិតឧបករណ៍ Viettel នៃសាជីវកម្មឧស្សាហកម្ម-ទូរគមនាគមន៍យោធា (Viettel) និងក្រុមហ៊ុន MTV ៧៦ ចំណុះអគ្គនាយកដ្ឋានឧស្សាហកម្មការពារជាតិ លោកឧត្តមសេនីយ៍ត្រី Nguyen Ba Luc បានវាយតម្លៃខ្ពស់ចំពោះការចូលរួម និងការដាក់តាំងបង្ហាញផលិតផលដោយសហគ្រាសនៃកងទ័ពប្រជាជនវៀតណាមនៅក្នុងពិព័រណ៍នេះ ដោយជឿជាក់ថាផលិតផលរបស់សហគ្រាសនានានឹងទទួលបានការយកចិត្តទុកដាក់ និងចំណាប់អារម្មណ៍ពីសហគ្រាសនៃប្រទេសនានា។

ការចាត់បញ្ជូនគណៈប្រតិភូជាន់ខ្ពស់របស់ក្រសួងការពារប្រទេសវៀតណាមទៅចូលរួមពិព័រណ៍ការពារជាតិ និងសន្តិសុខឆ្នាំ ២០២៥ នៅប្រទេសថៃ គឺជាសកម្មភាពសហប្រតិបត្តិការអន្តរជាតិមួយ ដើម្បីអនុវត្តគោលនយោបាយរបស់បក្ស និងរដ្ឋ ស្តីពីការកសាង និងអភិវឌ្ឍឧស្សាហកម្មការពារជាតិវៀតណាម ក្នុងទិសដៅម្ចាស់ការ ខ្លួនទីពឹងខ្លួន ពហុបំណង និងទំនើប៕

បកប្រែដោយ Thanh Cong