កិច្ចសហប្រតិបត្តិការលើវិស័យការពារជាតិរវាងវៀតណាម និងគុយបាត្រូវបានពង្រឹងនិងពង្រីកឥតឈប់ឈរ

ក្នុងបរិយាកាសស្និទ្ធស្នាល កក់ក្តៅនិងមិត្តភាព លោកនាយឧត្តមសេនីយ៍ Nguyen Tan Cuong និងលោកឧត្តមសេនីយ៍ឯក Álvaro López Miera បានវាយតំលៃខ្ពស់ចំពោះលទ្ធផលនៃកិច្ចសហប្រតិបត្តិការលើវិស័យការពារជាតិរវាងវៀតណាមនិងគុយបា នាពេលកន្លងមក និងកំណត់ទិសដៅ​សម្រាប់កិច្ចសហប្រតិបត្តិការនាពេលខាងមុខ។

ទិដ្ឋភាពនៃកិច្ចពិភាក្សាការងារ

ភាគីទាំងពីរបានឯកភាពថា ក្នុងទំនាក់ទំនងទូទៅរវាងប្រទេសទាំងពីរ កិច្ចសហប្រតិបត្តិការលើវិស័យការពារជាតិតែងតែជាសសរស្តម្ភមួយដែលជាទម្រង់ល្អសម្រាប់ជំរុញកិច្ចសហប្រតិបត្តិការលើវិស័យផ្សេងៗ។ ជាពិសេសចាប់តាំងពីដំណើរទស្សនកិច្ចនៅវៀតណាមរបស់រដ្ឋមន្ត្រី និងអគ្គសេនាធិការមក កិច្ចសហប្រតិបត្តិការលើវិស័យការពារជាតិរវាងប្រទេសទាំងពីរត្រូវបានពង្រឹងកាន់តែស៊ីជម្រៅ និងមានប្រសិទ្ធភាពជាក់ស្ដែង។  កិច្ចសហប្រតិបត្តិការលើវិស័យការពារជាតិទ្វេភាគីបន្តអនុវត្តយ៉ាងសកម្មលើវិស័យជាច្រើនដូចជា ការផ្លាស់ប្តូរគណៈប្រតិភូគ្រប់លំដាប់ថ្នាក់ ជាពិសេសថ្នាក់ខ្ពស់; កិច្ចសហប្រតិបត្តិការក្នុងការងារបក្ស ការងារនយោបាយក្នុងជួរកងទ័ព; កិច្ចសហប្រតិបត្តិការក្នុងការបណ្តុះបណ្តាលធនធានមនុស្ស  ឧស្សាហកម្មការពារជាតិ និងបច្ចេកទេសយោធា និងសន្តិសុខអ៊ីនធឺណិត...

ដើម្បីបន្តធ្វើឱ្យកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរកាន់តែស៊ីជម្រៅនិងមានប្រសិទ្ធភាពថែមទៀត ភាគីទាំងពីរបានឯកភាព​ថា នាពេលខាងមុខនឹងបង្កើនការផ្លាស់ប្តូរគណៈប្រតិភូគ្រប់លំដាប់ថ្នាក់ ជាពិសេសគណៈប្រតិភូជាន់ខ្ពស់  រក្សាកិច្ចសហប្រតិបត្តិការនិងការផ្លាស់ប្តូរបទពិសោធន៍ជំនាញរវាងអង្គភាពនានា និងផ្លាស់ប្តូរបទពិសោធន៍រវាងនាយទាហានវ័យក្មេងនៃប្រទេសទាំងពីរ ព្រមទាំងពង្រឹងកិច្ចសហប្រតិបត្តិការក្នុងការងារបក្សនិងការងារនយោបាយ ហើយនិងអនុវត្តប្រកបដោយប្រសិទ្ធភាពនៃកិច្ចសហប្រតិបត្តិការបច្ចេកទេសយោធា ឧស្សាហកម្មការពារជាតិ  និងបន្តផ្ដោតលើកិច្ចសហប្រតិបត្តិការក្នុងការបណ្តុះបណ្តាលធនធានមនុស្ស។

ភាគីទាំងពីរក៏បានឯកភាពគ្នាជំរុញកិច្ចសហប្រតិបត្តិការលើវិស័យដែលបាននិងកំពុងដំណើរការ និងចាំបាច់ត្រូវបន្តអនុវត្តប្រកបដោយប្រសិទ្ធភាពដូចជា៖ ការផ្លាស់ប្តូរព័ត៌មាន ពេទ្យយោធា សន្តិសុខតាមអ៊ីនធឺណិត កិច្ចសហប្រតិបត្តិការសេដ្ឋកិច្ច-ពាណិជ្ជកម្ម-វិនិយោគរវាងអង្គភាពអាជីវកម្មយោធានៃប្រទេសទាំងពីរ និងរៀបចំកម្មវិធីចងសម្ព័ន្ធមេត្រីភាពរវាងអង្គភាពនានានៃកងទ័ពទាំងពីរ ...

លោកនាយឧត្តមសេនីយ៍ Nguyen Tan Cuong និងលោកឧត្តមសេនីយ៍ឯក Álvaro López Miera បានឲ្យដឹងថា ក្នុងបរិបទនៃពិភពលោក និងក្នុងតំបន់បន្តមានការវិវឌ្ឍន៍យ៉ាងឆាប់រហ័សនិងស្មុគស្មាញ និងមិនអាចទាយទុកជាមុនបានដូចបច្ចុប្បន្ន ប្រទេសទាំងពីរនិងកងទ័ពទាំងពីរត្រូវបន្តពង្រឹង និងពង្រីកសាមគ្គីភាព គាំទ្រនិងជួយគ្នាទៅវិញទៅមក។ ជាមួយនឹងលទ្ធផលដែលសម្រេចបាន និងការដឹកនាំយ៉ាងសកម្មរបស់ថ្នាក់ដឹកនាំក្រសួងការពារជាតិទាំងពីរ ភាគីទាំងពីរជឿជាក់ថា ទំនាក់ទំនងកិច្ចសហប្រតិបត្តិការលើវិស័យការពារជាតិរវាងវៀតណាម និងគុយបានឹងបន្តអភិវឌ្ឍន៍ដល់កម្រិតថ្មីមួយ។

* នាយប់ថ្ងៃដដែល ក្រសួងបណ្ដាកងកំលាំងប្រដាប់អាវុធបដិវត្តន៍គុយបាបានរៀបចំពិធីប្រគល់ដាវចម្លងរបស់វីរៈបុរសជាតិគុយបា  Antonio Maceo ជូនលោកនាយឧត្តមសេនីយ៍ Nguyen Tan Cuong។ នេះគឺជារង្វាន់ដ៏ថ្លៃថ្លាដែលបង្ហាញពីការគោរព និងកត់សម្គាល់នូវស្នាដៃរបស់លោកប្រធានអគ្គសេនាធិការនៃកងទ័ពប្រជាជនវៀតណាមក្នុងការពង្រឹង និងពង្រីកទំនាក់ទំនងមិត្តភាពប្រពៃណីពិសេសរវាងបក្សទាំងពីរ រដ្ឋទាំងពីរ ប្រជាជន និងកងទ័ពប្រទេសទាំងពីរវៀតណាមនិងគុយបា។

លោកនាយឧត្តមសេនីយ៍ Nguyen Tan Cuong ថ្លែងនៅកងពលតូចទ័ពពិសេសចល័ត

លោកនាយឧត្តមសេនីយ៍ Nguyen Tan Cuong រួមជាមួយថ្នាក់ដឹកនាំនិងមេបញ្ជាការកងពលតូចទ័ពពិសេសចល័ត

គណៈប្រតិភូយោធាជាន់ខ្ពស់នៃកងទ័ពប្រជាជនវៀតណាមរួមជាមួយកម្មាភិបាលនិងយុទ្ធជននៃកងពលតូចទ័ពពិសេសចល័ត

* គួររំលឹកថា នាព្រឹកថ្ងៃទី ១៧ មិថុនា (ម៉ោងក្នុងតំបន់) លោកនាយឧត្តមសេនីយ៍ Nguyen Tan Cuong និងគណៈប្រតិភូយោធាជាន់ខ្ពស់នៃកងទ័ពប្រជាជនវៀតណាមបានអញ្ជើញទៅទស្សនកិច្ចនៅកងពលតូចទ័ពពិសេសចល័ត ក្រសួងបណ្ដាកងកម្លាំងប្រដាប់អាវុធបដិវត្តន៍គុយបា។

លោកប្រធានអគ្គសេនាធិការនៃកងទ័ពប្រជាជនវៀតណាមបានសម្តែងការចាប់អារម្មណ៍ចំពោះប្រពៃណីដ៏យូរលង់របស់កងពលតូច ក៏ដូចជាការរីក​ចម្រើនឥតឈប់ឈររបស់កងពលតូចក្នុងដំណើរកសាង ប្រយុទ្ធ  ធំធាត់ និងក្លាយជាអង្គភាពសំខាន់ៗក្នុងកងកម្លាំងប្រដាប់អាវុធបដិវត្តន៍គុយបា។

លោកនាយឧត្តមសេនីយ៍ Nguyen Tan Cuong បានបញ្ជាក់ថា កងទ័ពប្រជាជនវៀតណាមត្រៀមខ្លួនជាស្រេចស្វាគមន៍នាយទាហាននៃកងពលតូចមកវៀតណាមទស្សនកិច្ច ផ្លាស់ប្តូរបទពិសោធន៍ក្នុងការហ្វឹកហ្វឺន និងសហការគ្នាដើម្បីលើកកម្ពស់សមត្ថភាព លទ្ធភាពបច្ចេកទេសនិងយុទ្ធសាស្ត្រ ហើយត្រៀមខ្លួនប្រយុទ្ធ និងសម្រេចបានជោគជ័យគ្រប់ភារកិច្ច៕

បកប្រែដោយ Pham Diep