ក្រសួងការពារប្រទេសវៀតណាមបន្តជួយគាំទ្រដល់ក្រសួងការពារជាតិកម្ពុជានូវសំភារៈបរិក្ខារពេទ្យសម្រាប់ប្រយុទ្ធប្រឆាំងនឹង Covid-19
កប.អនឡាញ - នារសៀលថ្ងៃទី ២១ ឧសភា នៅទីក្រុងហាណូយ បានប្រពឹត្តទៅពិធីប្រគល់គ្រឿងសំភារៈបរិក្ខារពេទ្យសម្រាប់ប្រយុទ្ធប្រឆាំងនឹងជំងឺរាតត្បាត Covid-19 ដែលក្រសួងការពារប្រទេសនៃសាធារណរដ្ឋសង្គមនិយមវៀតណាមជូនដល់ក្រសួងការពារជាតិនៃព្រះរាជាណាចក្រកម្ពុជា។
ថ្លែងក្នុងពិធីនេះ លោកឧត្តមសេនីយ៍ទោ Vu Chien Thang ប្រធាននាយកដ្ឋានទាក់ទងបរទេស នៃក្រសួងការពារប្រទេស បានចែករំលែកចំពោះការលំបាករបស់កម្ពុជាដែលបណ្តាលមកពីការផ្ទុះឡើងនៃជំងឺ Covid-19 នាពេលកន្លងមក ហើយបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងយោធពលខេមរភូមិន្ទក្នុងការជួយរដ្ឋាភិបាលកម្ពុជាប្រយុទ្ធប្រឆាំងនឹងជំងឺរាតត្បាត Covid-19 ក៏ដូចជាធានាសន្តិសុខជាតិនាពេលកន្លងមក។ លោកឧត្តមសេនីយ៍ទោ Vu Chien Thang បានសង្កត់ធ្ងន់ថា ក្រោមទំនាក់ទំនងមិត្តភាពជាប្រពៃណី ក្រសួងការពារប្រទេសវៀតណាមសម្រេចចិត្តបន្តជួយគាំទ្រដល់ក្រសួងការពារជាតិ នៃព្រះរាជាណាចក្រកម្ពុជានូវគ្រឿងសំភារៈបរិក្ខារពេទ្យសម្រាប់ប្រយុទ្ធប្រឆាំងនឹងជំងឺរាតត្បាត Covid-19 ដូចជា៖ ថ្នាំបាញ់សំលាប់មេរោគ សម្លៀកបំពាក់ពេទ្យសម្រាប់ការពារផ្ទាល់ខ្លួន ម៉ាស់ N៩៥ និងស្រោមដៃពេទ្យ។ ក្រសួងការពារប្រទេសវៀតណាមបានខិតខំបំពេញតាមតំរូវការសំរាប់ប្រភេទនៃសំភារៈបរិក្ខារពេទ្យដែលក្រសួងការពារជាតិកម្ពុជាស្នើ និងធានាថាផលិតផលមានគុណភាពល្អ និងអាចឆ្លើយតបបានល្អក្នុងប្រយុទ្ធប្រឆាំងនឹងជំងឺរាតត្បាត Covid-19 ។ លោកឧត្តមសេនីយ៍ទោ Vu Chien Thang រំពឹងថាគ្រឿងសំភារៈបរិក្ខារពេទ្យពោលខាងលើនេះនឹងជួយកាត់បន្ថយការលំបាករបស់កម្ពុជា ដោយធ្វើឱ្យជីវភាពរស់នៅរបស់ប្រជាជនវិលត្រឡប់រកភាពធម្មតាវិញ និងអភិវឌ្ឍសេដ្ឋកិច្ចប្រទេស។
|
|
លោកឧត្តមសេនីយ៍ទោ Vu Chien Thang ប្រគល់គ្រឿងសំភារៈបរិក្ខារពេទ្យសម្រាប់ប្រយុទ្ធប្រឆាំងនឹងជំងឺរាតត្បាតកូវីដ១៩ ជានិមិត្តរូប ជូនលោកឯកអគ្គរាជទូត ចាយ ណាវុធ |
ចំណែកលោក ចាយ ណាវុធ ឯកអគ្គរាជទូតកម្ពុជាប្រចាំប្រទេសវៀតណាម បានថ្លែងអំណរគុណយ៉ាងជ្រាលជ្រៅចំពោះក្រសួងការពារប្រទេសវៀតណាមដែលតែងតែយកចិត្តទុកដាក់ និងជួយគាំទ្របានទាន់ពេលវេលា ដែលនេះជាកម្លាំងចលករដ៏ធំធេងសម្រាប់ប្រទេសកម្ពុជាក្នុងការបង្ការ និងទប់ស្កាត់ការរាតត្បាត Covid-19 នាពេលកន្លងមកនេះ។ ពិធីប្រគល់គ្រឿងសំភារៈបរិក្ខារពេទ្យសម្រាប់ប្រយុទ្ធប្រឆាំងនឹង Covid-19 លើកនេះ បន្តជាសក្ខីភាពដែលបង្ហាញនូវចំណងមិត្តភាពល្អរវាងកងទ័ព និងប្រជាជននៃប្រទេសទាំងពីរ ដែលរួមចំណែកធ្វើឱ្យកាន់តែស៊ីជម្រៅថែមទៀតនូវទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការគ្រប់ជ្រុងជ្រោយរវាងកម្ពុជា និងវៀតណាម។
នៅក្នុងពិធី តាមការប្រទានសិទ្ធិពីថ្នាក់ដឹកនាំក្រសួងការពារប្រទេសវៀតណាម លោកឧត្តមសេនីយ៍ទោ Vu Chien Thang បានប្រគល់គ្រឿងសំភារៈបរិក្ខារពេទ្យសម្រាប់ប្រយុទ្ធប្រឆាំងនឹងជំងឺរាតត្បាតកូវីដ១៩ ជានិមិត្តរូប ជូនលោកឯកអគ្គរាជទូត ចាយ ណាវុធ។ នៅសប្តាហ៍ក្រោយ នាយកដ្ឋានទាក់ទងបរទេស នៃក្រសួងការពារប្រទេសវៀតណាមនឹងប្រគល់ដោយផ្ទាល់នូវគ្រឿងសំភារៈបរិក្ខារពេទ្យទាំងនេះជូនតំណាងក្រសួងការពារជាតិកម្ពុជានៅច្រកទ្វារអន្តរជាតិ Moc Bai ខេត្ត Ta Ninh៕
បកប្រែដោយ Duy Hoan