ឆ្លើយតបតម្រូវការជាក់ស្តែងរបស់អាណិកជនវៀតណាមនៅខេត្តកំពត
កប.អនឡាញ - យោងតាមទីភ្នាក់ងារសារព័ត៌មានវៀតណាមប្រចាំនៅកម្ពុជា នៅព្រឹកថ្ងៃទី ២៧ ខែមករានេះ នៅទីក្រុងកំពត សមាគមខ្មែរ - វៀតណាម បានរៀបចំពិធីបើកការដ្ឋានសាងសង់ផ្ទះសហគមន៍ជូនជនជាតិកម្ពុជាដើមកំណើតវៀតណាម។ អញ្ជើញចូលរួមមានវត្ដមានពីអគ្គកុងស៊ុលវៀតណាមប្រចាំនៅខេត្តព្រះសីហនុលោក Vu Ngoc Ly និងតំណាងអាជ្ញាធរមូលដ្ឋាន រួមទាំងអាជីវកម្មវៀតណាមដែលកំពុងវិនិយោគនៅកម្ពុជា និងសប្បុរសជនវៀតណាមផងដែរ។
|
|
ប្រធានសមាគមខ្មែរ - វៀតណាមនៅខេត្តកំពត លោក Hoang Duc Ha ថ្លែងនៅពិធីបើកការដ្ឋាន (រូបថត៖ vnanet.vn) |
នៅក្នុងឆ្នាំ ២០១៤ ដោយមានថវិកាពីការជួយឧបត្ថម្ភពីអាជ្ញាធរមូលដ្ឋាន និងប្រជាជនខេត្ត Kien Giang ប្រទេសវៀតណាម គណៈកម្មាធិការប្រតិបត្តិសមាគមខ្មែរ-វៀតណាមនៃខេត្តកំពតបានទិញដីទំហំ ៧៥០ ម៉ែត្រក្រឡានៅភូមិតាអង្គ សង្កាត់ត្រើយកោះ ក្រុងកំពត ដើម្បីសាងសង់ទីស្នាក់ការសមាគម ប៉ុន្ដែដោយសារមូលហេតុជាច្រើនដែលសមាគមមិនទាន់សាងសង់ទីស្នាក់ការតាមការគ្រោងទុកទេ។
ដោយផ្ដើមចេញពីតំរូវការជាក់ស្តែងរបស់បងប្អូនជនជាតិកម្ពុជាដើមកំណើតវៀតណាមរហូតមកដល់បច្ចុប្បន្ននេះ ស្ថានអគ្គកុងស៊ុលវៀតណាមប្រចាំនៅខេត្តព្រះសីហនុ និងគណៈកម្មាធិការប្រតិបត្តិសមាគមខ្មែរ-វៀតណាមនៅខេត្តកំពត បានអំពាវនាវឲ្យសប្បរសជនមានដើមកំណើតវៀតណាមជួយឧបត្ថម្ភបានទឹកប្រាក់ប្រហែល ២៥,០០០ ដុល្លារអាមេរិកដើម្បីសាងសង់ផ្ទះសហគមន៍ និងបន្ទប់រៀនភាសាវៀតណាម - ខ្មែរ លើផ្ទៃដីដែលពោលខាងលើ។
ថ្លែងមតិនៅពិធីនេះ ប្រធានសមាគមខ្មែរ - វៀតណាមនៅខេត្តកំពត លោក Hoang Duc Ha បានថ្លែងក្នុងក្ដីរំភើបចិត្ដថា៖ “សមាគមខ្មែរ-វៀតណាមនៃខេត្តកំពតត្រូវបានបង្កើតឡើងក្នុងឆ្នាំ ២០០៣។ សមាគមបានឆ្លងកាត់ការលំបាកជាច្រើនដើម្បីចលនាបងប្អូនជួយគ្នាទៅវិញទៅមក និងទទួលខុសត្រូវចំពោះសហគមន៍។ តាមការគ្រោងទុក គម្រោងនេះនឹងត្រូវបានបើកសម្ពោធដាក់ឲ្យប្រើប្រាស់ជាផ្លូវការនៅខែមេសា ឆ្នាំ ២០២១ ខាងមុខនេះ៕
បកប្រែដោយ Pham Diep