បន្តពង្រឹង និងពង្រីកទំនាក់ទំនងការពារជាតិរវាងវៀតណាមនិងជប៉ុន
កប.អនឡាញ - ក្នុងឱកាសអមដំណើរលោក Vo Van Thuong ប្រធានរដ្ឋវៀតណាម និងលោកជំទាវ រួមជាមួយនឹងគណៈប្រតិភូជាន់ខ្ពស់វៀតណាម អញ្ជើញទៅបំពេញទស្សនកិច្ចផ្លូវការនៅប្រទេសជប៉ុន នារសៀលថ្ងៃទី២៧ ខែវិច្ឆិកា (ម៉ោងក្នុងតំបន់) នៅទីស្នាក់ការក្រសួងការពារជាតិជប៉ុន លោកឧត្តមសេនីយ៍ឯក Hoang Xuan Chien សមាជិកគណៈកម្មាធិការមជ្ឈិមបក្ស អនុរដ្ឋមន្ត្រីក្រសួងការពារប្រទេសវៀតណាម បានជួបពិភាក្សាការងារជាមួយលោក Kiyoshi Serizawa អនុរដ្ឋមន្ត្រីក្រសួងការពារជាតិជប៉ុន។
![left](/image/images/left.png) ![center](/image/images/center.png) ![right](/image/images/right.png) ![del](/images/red-error_16px.gif) |
![](https://file3.qdnd.vn/data/images/27/2023/11/28/upload_2133/1.jpg?dpi=150&quality=100&w=500) |
លោកឧត្តមសេនីយ៍ឯក Hoang Xuan Chien និងលោក Kiyoshi Serizawa អនុរដ្ឋមន្ត្រីក្រសួងការពារជាតិជប៉ុន |
នៅក្នុងជំនួបនេះ ភាគីទាំងពីរបានឯកភាពថា ឆ្នាំ២០២៣ ជាខួបលើកទី ៥០ នៃការបង្កើតទំនាក់ទំនងការទូតរវាងវៀតណាម និងជប៉ុន ក្រសួង ស្ថាប័ន និងមូលដ្ឋាននានានៃប្រទេសទាំងពីរបានសម្របសម្រួលរៀបចំសកម្មភាពសំខាន់ៗជាច្រើន។ អំពីកិច្ចសហប្រតិបត្តិការរវាងក្រសួងការពារជាតិនៃប្រទេសទាំងពីរ ភាគីទាំងពីរបានរក្សាដំណើរទស្សនកិច្ចទៅវិញទៅមករបស់ថ្នាក់ដឹកនាំជាន់ខ្ពស់ (ប្រធានអគ្គសេនាធិការនៃកងទ័ពប្រជាជនវៀតណាម បានទៅបំពេញទស្សនកិច្ចជាផ្លូវការនៅប្រទេសជប៉ុនក្នុងខែតុលា ឆ្នាំ២០២៣, នាយសេនាធិការនៃកងកម្លាំងស្វ័យការពារដីគោកជប៉ុន អញ្ជើញមកបំពេញទស្សនកិច្ចនៅវៀតណាមក្នុងខែកុម្ភៈ ឆ្នាំ២០២៣, នាវាពិឃាតផ្ទុកឧទ្ធម្ភាគចក្រ IZUMO របស់ជប៉ុន អញ្ជើញមកបំពេញទស្សនកិច្ចនៅវៀតណាមក្នុងខែមិថុនា ឆ្នាំ២០២៣) ព្រមទាំងបានអនុវត្តយន្តការសន្ទនាគោលនយោបាយការពារជាតិថ្នាក់អនុរដ្ឋមន្ត្រីក្រសួងការពារជាតិ កិច្ចប្រជុំពិគ្រោះយោបល់នាយទាហានសេនាធិការនៃប្រភេទទ័ពទាំងបី៖ កងទ័ពជើងទឹក កងទ័ពជើងគោគ និងកងទ័ពជើងអាកាស និងកម្មវិធីនានាដែលជួយគាំទ្រដល់ការលើកកំពស់សមត្ថភាព ការជំនះផលវិបាកនៃសង្រ្គាម និងការរក្សាសន្តិភាពអង្គការសហប្រជាជាតិ។ ភាគីទាំងពីរបានវាយតម្លៃខ្ពស់ចំពោះការសម្របសម្រួលសម្រេចដោយជោគជ័យនូវតួនាទីជាសហប្រធាននៃក្រុមអ្នកជំនាញការរក្សាសន្តិភាពវដ្តទី៤ ក្នុងក្របខ័ណ្ឌនៃ ADMM+ ដំណាក់កាល ២០២១-២០២៣ រួមទាំងកម្មវិធីវាយតម្លៃសមត្ថភាព (CEPPP) នៃកងកម្លាំងដែលត្រៀមចូលរួមប្រតិបត្តិការរក្សាសន្តិភាពរបស់អង្គការសហប្រជាជាតិក្នុងខែកញ្ញា ឆ្នាំ២០២៣ នៅប្រទេសវៀតណាម។
លោកឧត្តមសេនីយ៍ឯក Hoang Xuan Chien បានអះអាងថា ចាប់តាំងពីបង្កើតទំនាក់ទំនងការទូតជាផ្លូវការនៅឆ្នាំ ១៩៧៣ មកទំនាក់ទំនងវៀតណាម-ជប៉ុន តែងតែត្រូវបានថ្នាក់ដឹកនាំនៃភាគីទាំងពីរយកចិត្តទុកដាក់ ជំរុញ អភិវឌ្ឍយ៉ាងខ្លាំងក្លា និងពង្រីកលើវិស័យជាច្រើន និងស៊ីជម្រៅ នាំមកនូវផលប្រយោជន៍ជាក់ស្តែងដល់ប្រជាជននៃប្រទេសទាំងពីរ។ លោកឧត្តមសេនីយ៍ឯក Hoang Xuan Chien សង្ឃឹមថា ក្រសួងការពារជាតិជប៉ុននឹងបន្តយកចិត្តទុកដាក់ជំរុញកិច្ចសហប្រតិបត្តិការជាមួយក្រសួងការពារប្រទេសវៀតណាមលើវិស័យហ្វឹកហ្វឺន កងទ័ពជើងទឹក សន្តិសុខសមុទ្រ និងជំនះពុះពារលើផលវិបាកនៃសង្គ្រាម ការថែរក្សាសន្តិភាពរបស់អង្គការសហប្រជាជាតិ...
លោក Kiyoshi Serizawa អនុរដ្ឋមន្ត្រីក្រសួងការពារជាតិជប៉ន បានសម្តែងនូវសេចក្តីរីករាយចំពោះការអភិវឌ្ឍនាពេលថ្មីៗនេះក្នុងកិច្ចសហប្រតិបត្តិការការពារជាតិទ្វេភាគីរវាងប្រទេសទាំងពីរ។ លោកសង្ឃឹមថា ភាគីទាំងពីរនឹងបន្តពង្រឹង និងពង្រីកទំនាក់ទំនងលើវិស័យការពារជាតិ ស្របតាមទិសដៅដែលបានកំណត់ដោយថ្នាក់ដឹកនាំជាន់ខ្ពស់នៃប្រទេសទាំងពីរ ហើយខ្លឹមសារនៃកិច្ចសហប្រតិបត្តិការបានឯកភាពដោយថ្នាក់ដឹកនាំក្រសួងការពារជាតិ រួមទាំងការរៀបចំកិច្ចសន្ទនាគោលនយោបាយការពារជាតិវៀតណាម-ជប៉ុននៅថ្នាក់អនុរដ្ឋមន្ត្រីក្រសួងការពារជាតិលើកទី១០ ដែលនឹងប្រព្រឹត្តទៅនៅចុងខែកុម្ភៈ ឆ្នាំ២០២៤ ខាងមុខ។ ក្នុងឱកាសនេះ លោក Kiyoshi Serizawa បានអញ្ជើញវៀតណាមចូលរួមកិច្ចប្រជុំអនុរដ្ឋមន្ត្រីក្រសួងការពារជាតិអាស៊ាន-ជប៉ុន ដែលប្រព្រឹត្តទៅនៅប្រទេសជប៉ុនក្នុងខែមករា ឆ្នាំ២០២៤។ លោក Kiyoshi Serizawa ក៏បានឱ្យដឹងដែរថា ប្រទេសជប៉ុនបានបំពេញល្អនូវការងាររៀបចំ និងត្រៀមខ្លួនជាស្រេចស្វាគមន៍នាយកដ្ឋានរក្សាសន្តិភាពវៀតណាមអញ្ជើញមកជប៉ុនដើម្បីសម្របសម្រួលរៀបចំពិធីប្រគល់តួនាទីជាសហប្រធាននៃក្រុមអ្នកជំនាញរក្សាសន្តិភាពវដ្តទី៤ ក្នុងក្របខ័ណ្ឌនៃ ADMM+ ដំណាក់កាល ២០២១-២០២៣ ក្នុងសប្តាហ៍ដំបូងនៃខែធ្នូ ឆ្នាំ២០២៣ នៅប្រទេសជប៉ុន៕
បកប្រែដោយ Duy Hoan