លោកឧត្តមសេនីយ៍ឯក Nguyen Tan Cuong ត្រួតពិនិត្យការហ្វឹកហ្វឺនព្យុហយាត្រាក្នុងឱកាសរំលឹកខួបលើកទី ៧០ នៃជ័យជំនះ Dien Bien Phu

នាព្រឹកថ្ងៃទី ២២ មិនា នៅមជ្ឈមណ្ឌលហ្វឹកហ្វឺនយោធាជាតិ​លេខ​៤ ស្រុក My Duc ទីក្រុងហាណូយ លោកឧត្តមសេនីយ៍ឯក Nguyen Tan Cuong ប្រធានអគ្គសេនាធិការនៃកងទ័ពប្រជាជនវៀតណាម អនុរដ្ឋមន្ត្រីក្រសួងការពារប្រទេស បានចុះត្រួតពិនិត្យការហ្វឹកហ្វឺនព្យុហយាត្រា និងក្បួនដង្ហែរ សម្រាប់ការរំលឹក​ខួបលើកទី ៧០ នៃជ័យជំនះ Dien Bien Phu (៧ ឧសភា ១៩៥៤ - ៧ ឧសភា ២០២៤)។

លោកឧត្តមសេនីយ៍ឯក Nguyen Tan Cuong ត្រួតពិនិត្យការហ្វឹកហ្វឺនរបស់បណ្តាផែនចូលរួមព្យុហយាត្រា ក្បួនដង្ហែ

ថ្លែងមតិនៅទីនេះ លោកឧត្តមសេនីយ៍ឯក Nguyen Tan Cuong បានសង្កត់ធ្ងន់លើអត្ថន័យ និងតម្លៃដ៏ជ្រាលជ្រៅនៃជ័យជំនះជាប្រវត្តិសាស្ត្ររបស់ Dien Bien Phu ចំពោះភារកិច្ចហ្វឹកហ្វឺន៖ យើងត្រូវកំណត់ឲ្យបានច្បាស់នូវអត្ថន័យនៃការរំលឹក​ខួបលើកទី ៧០ នៃជ័យជំនះ Dien Bien Phu។ យុទ្ធជនម្នាក់ៗដែលចូលរួមផែន​ព្យុហយាត្រាយោធា ក្បួនដង្ហែរ គឺជាកិត្តិយស និងទំនួលខុសត្រូវចំពោះបព្វបុរសដែលបានបង្កើតជ័យជំនះនេះ និងសម្រាប់មនុស្សជំនាន់ក្រោយ។ ដូច្នេះហើយត្រូវលើកកម្ពស់ការទទួលខុសត្រូវល្អក្នុងការហ្វឹកហ្វឺន និងការគោរពតាមបទប្បញ្ញត្តិ។ កាយវិការត្រូវតែបង្ហាញពីលក្ខណៈឯកភាពគ្នា ភាពឧឡារិក និងភាពខ្លាំងក្លារបស់កងទ័ព។

កងកម្លាំងដែលចូលរួមក្នុងហ្វឹកហ្វឺនព្យុហយាត្រា

តាមកម្មវិធី ពិធីព្យុហយាត្រា ក្បួនដង្ហែ នឹងប្រារព្ធឡើងនៅព្រឹកថ្ងៃទី៧ ឧសភា ក្រោយពិធីរំលឹកខួបលើកទី៧០ នៃជ័យជំនះ Dien Bien Phu នៅពហុកីឡដ្ឋានខេត្ត Dien Bien។ ក្នុងនេះ ព្យុហយាត្រារបស់កងទ័ព និងកងជីវពល មានការចូលរួមពីកងកម្លាំងដូចខាងក្រោម៖ ផែនកងកិត្តិយសត្រែទ័ព ផែនយុទ្ធជន Dien Bien ផែននាយទាហាន៖ កងទ័ពជើងទឹក ការពារអាកាស - ទ័ពអាកាស ការពារព្រំដែន កងឆ្មាំសមុទ្រ នាយទាហានស្រីផ្នែកពេទ្យយោធា កងកម្លាំងប្រតិបត្តិការតាមអ៊ីនធឺណិត កងកម្លាំងរក្សាសន្តិភាពវៀតណាម (ស្រី); ផែនយុទ្ធជន៖ កងទ័ពជើងគោក ទ័ពពិសេស កងកម្លាំងពិសេស ក្រុមជីវពលស្ត្រីនៃបណ្តាជនជាតិភាគពាយព្យ ទ័ពព្រៃស្ត្រីខាងត្បូងវៀតណាម និងផែនទង់ក្រហម។

បកប្រែដោយ Duy Hoan