វៀតណាមពិនិត្យការចាត់បញ្ជូនកម្លាំងប៉ូលិស និងស៊ីវិលទៅចូលរួមបេសកកម្មរក្សាសន្ដិភាពនៃអង្គការសហប្រជាជាតិ
កប.អនឡាញ - នាព្រឹកថ្ងៃទី ១៨ ខែកក្កដា នៅវិទ្យាស្ថានពេទ្យយោធា ក្រុមការងារអន្តរស្ថាប័នទទួលបន្ទុកការដែលវៀតណាមចូលរួមបេសកកម្មរក្សាសន្តិភាពនៃអង្គការសហប្រជាជាតិ បានរៀបចំសន្និសីទស្ដីពីការអនុវត្តភារកិច្ចចូលរួមបេសកកម្មរក្សាសន្ដិភាពនៃអង្គការសហប្រជាជាតិឆ្នាំ ២០១៩ ក្រោមអធិបតីរបស់លោកឧត្តមសេនីយ៍ឯក Nguyen Chi Vinh អនុរដ្ឋមន្ត្រីក្រសួងការពារប្រទេសវៀតណាម។
|
|
កងពេទ្យកម្រិត២ លេខ២ រាយការណ៍ជូនក្រុមការងារអន្ដរស្ថាប័នអំពីការព្យាបាលអ្នកជំងឺត្រូវរងរបួស |
លោកឧត្តមសេនីយ៍ឯក Nguyen Chi Vinh បានឲ្យដឹងថា វៀតណាមកំពុងពិនិត្យការបើកទូលាយសកម្មភាពរក្សាសន្ដិភាពនៃអង្គការសហប្រជាជាតិ។ យោងតាមលទ្ធភាពរបស់វៀតណាមក្នុងការចូលរួមបេសកកម្មរក្សាសន្ដិភាពនៃអង្គការសហប្រជាជាតិក្នុងរយៈពេលកន្លងមក អង្គការសហប្រជាជាតិបានស្នើឱ្យវៀតណាមបើកទូលាយសកម្មភាពក្នុងវិស័យនានាដូចជា ការដឹកជញ្ជូនតាមផ្លូវអាកាស ការចាត់បញ្ជូនកងទ័ពជើងគោកទៅបំពេញភារកិច្ចការពារសន្ដិសុខ រួមបញ្ចូលកម្លាំងប៉ូលិសនិងស៊ីវិលទៅចូលរួមនៅស្ថានបេសកកម្មរក្សាសន្ដិភាពនៃអង្គការសហប្រជាជាតិ។
ជាមួយគ្នានោះ លោកឧត្តមសេនីយ៍ឯក Nguyen Chi Vinh ក៏បានលើកឡើងនូវលទ្ធភាពវៀតណាមសហប្រតិបត្ដិការជាមួយអង្គការសហប្រជាជាតិរៀបចំការហ្វឹកហ្វឺនឲ្យកងវិស្វកម្មទៅចូលរួមបេសកកម្មសន្ដិភាពនៃអង្គការសហប្រជាជាតិនៅវៀតណាម នាឆ្នាំ ២០២០ ហើយចាត់ទុកនេះជាសកម្មភាពដ៏មានអត្ថន័យមួយក្នុងឆ្នាំដែលវៀតណាមដើរតួរជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិ ព្រមទាំងបង្ហាញពីការប្តេជ្ញាចិត្តក្នុងការអនុវត្តការសន្យារបស់វៀតណាម ចំពោះបេសកកម្មរួមរបស់អង្គការសហប្រជាជាតិផងដែរ៕
បកប្រែដោយ Pham Diep