លោក Tran Thanh Man ប្រធានរដ្ឋសភាវៀតណាម ជួបសវនាការជាមួយសម្តេចប៉ាប Leo XIV នៅបុរីវ៉ាទីកង់

នៅថ្ងៃទី១១ ខែមេសា (ម៉ោងក្នុងស្រុក) នៅបុរីវ៉ាទីកង់ លោក Tran Thanh Man ប្រធានរដ្ឋសភាវៀតណាម បានជួបសវនាការជាមួយសម្តេចប៉ាប Leo XIV។

ក្នុងអំឡុងពេលនៃកិច្ចប្រជុំ លោក Tran Thanh Man ប្រធានរដ្ឋសភាបានសម្តែងការគោរពចំពោះការស្វាគមន៍យ៉ាងកក់ក្តៅរបស់សម្តេចប៉ាបជូនចំពោះគណៈប្រតិភូជាន់ខ្ពស់វៀតណាម។ លោកបានជូនពរសម្តេចប៉ាបមានសុខភាពល្អក្នុងឱកាសពិធីបុណ្យ Orthodox Easter ឆ្នាំ២០២៦។

លោក Tran Thanh Man ប្រធានរដ្ឋសភាវៀតណាម និងសម្តេចប៉ាប Leo XIV

លោក Tran Thanh Man ប្រធានរដ្ឋសភាវៀតណាម និងសម្តេចប៉ាប Leo XIV

ដោយសម្តែងការគោរពចំពោះមនោសញ្ចេតនាកក់ក្តៅដែលសម្តេចប៉ាប និងបុរីវ៉ាទីកង់ជូនចំពោះប្រជាជនវៀតណាម លោកប្រធានរដ្ឋសភាបានវាយតំលៃខ្ពស់ចំពោះសារសន្តិភាពរបស់សម្តេចប៉ាប និងការរួមចំណែករបស់លោកក្នុងការលើកកម្ពស់យុត្តិធម៌សង្គម និងការការពារបរិស្ថាន។ លោកបានបញ្ជាក់ថា តម្លៃទាំងនេះគឺស្រដៀងគ្នាទៅនឹងសេចក្តីប្រាថ្នារបស់ប្រជាជនវៀតណាមក្នុងបុព្វហេតុកសាង និងការពារមាតុភូមិ។

ដោយចែករំលែកអំពីទំនាក់ទំនងទ្វេភាគី លោក Tran Thanh Man ប្រធានរដ្ឋសភាវៀតណាមមានសេចក្តីសោមនស្សរីករាយដែលបានឃើញថា ទំនាក់ទំនងរវាងវៀតណាម និងបុរីវ៉ាទីកង់បានរីកចម្រើនគួរឱ្យកត់សម្គាល់។ ជាពិសេសគឺការបង្កើតការិយាល័យតំណាងអចិន្ត្រៃយ៍របស់បុរីវ៉ាទីកង់នៅវៀតណាម និងប្រតិបត្តិការប្រកបដោយប្រសិទ្ធភាពរបស់ក្រុមការងារចម្រុះ។ លោកប្រធានរដ្ឋសភាបានសម្តែងទំនុកចិត្តថា កិច្ចប្រជុំលើកទី១៣ ខាងមុខនេះនឹងរួមចំណែកដល់ដំណើរការនៃការដំឡើងទំនាក់ទំនងការទូតឲ្យបានពេញលេញ។

លោក Tran Thanh Man ប្រធានរដ្ឋសភាវៀតណាម និងភរិយា ជាមួយសម្តេចប៉ាប Leo XIV

លោក Tran Thanh Man ប្រធានរដ្ឋសភាវៀតណាម និងភរិយា ជាមួយសម្តេចប៉ាប Leo XIV និងគណៈប្រតិភូថតរូបជុំគ្នា

លោក Tran Thanh Man ប្រធានរដ្ឋសភាវៀតណាមបានអះអាងថា បក្ស និងរដ្ឋវៀតណាមតែងតែបង្កើតលក្ខខណ្ឌទាំងអស់សម្រាប់ជនរួមជាតិកាតូលិកដើម្បីរស់នៅប្រកបដោយ "ជីវិតល្អ សាសនាល្អ"។ នៅក្នុងការបោះឆ្នោតជ្រើសតាំងសមាជិករដ្ឋសភា នីតិកាលទី១៦ ថ្មីៗនេះ អ្នកកាន់សាសនាកាតូលិកជាច្រើនបន្តជាប់ឆ្នោតសាជាថ្មី។

ក្នុងឱកាសនេះ លោកប្រធានរដ្ឋសភាបាននាំយកការអញ្ជើញទស្សនកិច្ចជាផ្លូវការនៅប្រទេសវៀតណាមពីលោក To Lam អគ្គលេខាបក្ស និងជាប្រធានរដ្ឋ ជូនចំពោះ សម្តេចប៉ាប Leo XIV ។ សម្តេចប៉ាប Leo XIV បានថ្លែងអំណរគុណ និងសម្តែងបំណងប្រាថ្នាចង់ទៅទស្សនកិច្ចនៅប្រទេសវៀតណាមនាពេលខាងមុខនេះ។

សម្តេចប៉ាប Leo XIV បានវាយតម្លៃខ្ពស់ចំពោះដំណើរទស្សនកិច្ចរបស់លោក Tran Thanh Man ប្រធានរដ្ឋសភាវៀតណាម ដោយចាត់ទុកថាវាជាព្រឹត្តិការណ៍ដ៏សំខាន់មួយដើម្បីបង្កើនការយោគយល់គ្នាទៅវិញទៅមក។ សម្តេចប៉ាបក៏បានថ្លែងអំណរគុណដល់អាជ្ញាធរវៀតណាមដែលបានជួយគាំទ្រយ៉ាងសកម្មដើម្បីការិយាល័យតំណាងអចិន្ត្រៃយ៍បុរីវ៉ាទីកង់នៅវៀតណាមឲ្យ​ប្រតិបត្តិការប្រកបដោយស្ថិរភាព និងប្រសិទ្ធភាព៕

បកប្រែដោយ Duy Hoan