វៀតណាមក្លាយជាប្រទេសតភ្ជាប់​នៃទីភ្នាក់ងារថាមពលអន្តរជាតិ (IEA) ជាផ្លូវការ

នាថ្ងៃទី១៩ ខែកុម្ភៈ នៅទីក្រុងប៉ារីស ប្រទេសបារាំង កិច្ចប្រជុំរដ្ឋមន្ត្រីនៃទីភ្នាក់ងារថាមពលអន្តរជាតិ (IEA) បានអនុម័តជាផ្លូវការនូវសំណើបញ្ចូលវៀតណាមឲ្យក្លាយជាប្រទេសតភ្ជាប់នៃអង្គការនេះ។

ប្រទេសនានាបានអបអរសាទរវៀតណាមដែលបានក្លាយជាសមាជិកតភ្ជាប់នៃ IEA (រូបថត៖ VOV)

នៅក្នុងសុន្ទរកថាបើករបស់ លោកបណ្ឌិត ហ្វាទី ប៊ីរ៉ូល នាយកប្រតិបត្តិនៃ IEA បានសង្កត់ធ្ងន់លើកិច្ចសហប្រតិបត្តិការដែលមានគោលបំណងកសាងប្រព័ន្ធថាមពលសកលដែលមានសុវត្ថិភាព ចីរភាព និងសន្សំសំចៃសម្រាប់ប្រទេសទាំងអស់។ លោកក៏បានបញ្ជាក់ថា ដោយមានប្រជាជនជាង ១០០ លាននាក់ និងធនធានថាមពលដ៏សម្បូរបែបដូចជា ថាមពលព្រះអាទិត្យ វារីអគ្គិសនី ឧស្ម័នធម្មជាតិ និងសក្តានុពលសម្រាប់ការអភិវឌ្ឍថាមពលនុយក្លេអ៊ែរនាពេលអនាគត វៀតណាមនឹងដើរតួនាទីតភ្ជាប់ដ៏​សំខាន់ក្នុង IEA។

លោកបណ្ឌិត Fatih Birol (កណ្តាល) នាយកប្រតិបត្តិនៃ IEA បានបញ្ជាក់ថា ប្រទេសជាសមាជិកវាយតម្លៃខ្ពស់ចំពោះកិច្ចសហប្រតិបត្តិការកាន់តែស៊ីជម្រៅជាមួយវៀតណាម (រូបថត៖ Anh Tuan/VOV-Paris)

ថ្លែងនៅក្នុងកិច្ចប្រជុំនេះ លោក Trinh Duc Hai ឯកអគ្គរដ្ឋទូតវៀតណាមប្រចាំប្រទេសបារាំង បានសង្កត់ធ្ងន់ថា ការចូលជាសមាជិក IEA របស់វៀតណាមគឺមានសារៈសំខាន់ជាពិសេស ខណៈដែលប្រទេសកំពុងចូលដល់ដំណាក់កាលអភិវឌ្ឍថ្មី បន្ត​ប្រកាន់​យ៉ាងខ្ជាប់ខ្ជួន​នូវ​អព្យាក្រឹតភាពកាបូន និងការផ្លាស់ប្តូរថាមពលបៃតង។ លោកឯកអគ្គរដ្ឋទូតបានបញ្ជាក់ពីការត្រៀមខ្លួនរួម​ជា​ស្រេច​របស់វៀតណាមក្នុងការចូលរួមចំណែកយ៉ាងសកម្មក្នុងកិច្ចសន្ទនាថាមពលសកល៕

បកប្រែដោយ Duy Hoan