កិច្ចសហប្រតិបត្តិការអន្តរជាតិត្រូវតែមានភាពទូលំទូលាយ ជាក់ស្តែង មានប្រសិទ្ធភាព និងភ្ជាប់ទៅនឹងគោលដៅអភិវឌ្ឍន៍នានា

មានប្រសាសន៍ក្នុងកិច្ចប្រជុំ លោកនាយករដ្ឋមន្ត្រីបានសង្កត់ធ្ងន់ថា ឆ្នាំ២០២៥ ស្ថានភាពពិភពលោក និងតំបន់មានការលំបាក និងបញ្ហាប្រឈមជាច្រើន។ នៅក្នុងបរិបទនេះ ការិយាល័យនយោបាយបានចេញសេចក្តីសម្រេចចិត្តលេខ ៥៩-NQ/TW ស្តីពីការធ្វើសមាហរណកម្មអន្តរជាតិក្នុងស្ថានភាពថ្មី ដោយកំណត់ការធ្វើសមាហរណកម្មជាសសរស្តម្ភសំខាន់មួយនៅក្នុងសេចក្តីសម្រេចចិត្តជាយុទ្ធសាស្ត្រនានាដើម្បីអភិវឌ្ឍប្រទេស​ជាតិ។

លោក Pham Minh Chinh នាយករដ្ឋមន្ត្រីវៀតណាម មានប្រសាសន៍​ក្នុង​កិច្ចប្រជុំ​ (រូបថត៖ vnanet.vn)

ដោយវាយតម្លៃលទ្ធផលនៃការអនុវត្តសេចក្តីសម្រេចលេខ ៥៩-NQ/TW និងការងារធ្វើសមាហរណកម្មអន្តរជាតិក្នុងរយៈពេលមួយឆ្នាំកន្លងមក លោកនាយករដ្ឋមន្ត្រីបានបញ្ជាក់ថា ការធ្វើសមាហរណកម្មសេដ្ឋកិច្ចអន្តរជាតិបានរួមចំណែកដល់ការលើកកម្ពស់តួនាទី និងកិត្យានុភាពរបស់ប្រទេសជាតិ ដោយវិស័យការទូតសេដ្ឋកិច្ចបាន​ធ្វើឱ្យប្រទេសមានការ​​ផ្លាស់ប្តូរស្ថានភាពយ៉ាង​ឆាប់រហ័ស​ និងសម្របខ្លួនទៅនឹងប្រែប្រួលពីបរិយាកាសខាងក្រៅ។

ដោយវិភាគលើចំណុចខ្វះខាត និងមេរៀនបទពិសោធន៍ចំនួនប្រាំនោះ លោកនាយករដ្ឋមន្ត្រីបានចង្អុលបង្ហាញថា ឆ្នាំ២០២៦ គឺជាការចាប់ផ្តើមនៃដំណាក់កាលធ្វើសមាហរណកម្មថ្មីមួយរបស់ប្រទេស ដោយអនុវត្តគោលការណ៍ណែនាំ គោលនយោបាយការបរទេស នៃមហាសន្និបាតបក្ស លើកទី១៤។ ដូច្នេះ កិច្ចសហប្រតិបត្តិការអន្តរជាតិត្រូវតែមានភាពទូលំទូលាយ ជាក់ស្តែង មានប្រសិទ្ធភាព និង​ភ្ជាប់យ៉ាងជិតស្និទ្ធទៅនឹងគោលដៅអភិវឌ្ឍន៍នានា បង្កើនការពឹងផ្អែកលើខ្លួនឯង និងភាពខ្លួនទីពឹងខ្លួនរបស់ប្រទេស មានផ្លាស់ប្តូរយ៉ាងខ្លាំងពី «ការពង្រីកទំនាក់ទំនង» ទៅជា «ការលើកកំពស់គុណភាព និងភាពស៊ីជម្រៅ» ហើយពីតួនាទី «ចូលរួម» ទៅជាតួនាទី «ដឹកនាំ កំណត់ទិសដៅ»។ ក្នុងពេលជាមួយគ្នានេះ ចាំបាច់មានការឆ្លើយតបប្រកបដោយភាពសកម្ម ភាពបត់បែន និងប្រសិទ្ធភាពទៅនឹងការវិវត្តយ៉ាងឆាប់រហ័ស និងស្មុគស្មាញនៃស្ថានភាពអន្តរជាតិ។

ទិដ្ឋភាពនៃកិច្ចប្រជុំ​ (រូបថត៖ vnanet.vn)

ដោយសង្កត់ធ្ងន់ថា «ការធ្វើសមាហរណកម្មអន្តរជាតិគឺជាកិច្ចការរបស់ប្រជាជនទាំងមូល ក្រោមការដឹកនាំរបស់បក្ស ការគ្រប់គ្រងរបស់រដ្ឋ និងការចូលរួមពីប្រជាជននិងសហគ្រាស  ជាមជ្ឈភាព ជាប្រធានបទ ជាគោលដៅ ជាកម្លាំងចលករ និងជាធនធាន» នោះ លោកនាយករដ្ឋមន្ត្រីបានកត់សម្គាល់ថា ក្រសួង ស្ថាប័ន អង្គភាព និងមូលដ្ឋាននានា ដោយផ្អែកលើមុខងារភារកិច្ចរបស់ខ្លួនអនុវត្តយ៉ាងសកម្មការងារធ្វើសមាហរណកម្មអន្តរជាតិក្រោមទិសស្លោកថា បង្កើនភាពស៊ីជម្រៅ ជម្រុញភាពទូលំទូលាយ និងបង្កើនប្រសិទ្ធភាព៕

បកប្រែដោយ Duy Hoan