កិច្ចសហប្រតិបត្តិការលើវិស័យការពារជាតិវៀតណាម-កម្ពុជា

លោកឧត្តមសេនីយ៍ឯក Vo Minh Luong ប្រគល់វត្ថុអនុស្សាវរីយ៍​ជូន​ លោកឧត្តមសេនីយ៍ឯក យ៉ា គឹមអ៊ី

លោកឧត្តមសេនីយ៍ឯក Vo Minh Luong បានអះអាងថា វៀតណាមជានិច្ចកាលយកចិត្តទុកដាក់ និងផ្តល់អាទិភាពខ្ពស់ ក្នុងការបន្តពង្រឹង និងពង្រីកទំនាក់ទំនងភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការលើគ្រប់វិស័យ និរន្តរភាពយូរអង្វែង ជាមួយកម្ពុជា។ នាពេលថ្មីៗនេះ កិច្ចសហប្រតិបត្តិការលើវិស័យការពារជាតិវៀតណាម-កម្ពុជា បានបន្តអភិវឌ្ឍយ៉ាងជាក់ស្តែង និងប្រកបដោយប្រសិទ្ធភាព ក្លាយជាសសរស្តម្ភដ៏សំខាន់មួយនៃទំនាក់ទំនងទ្វេភាគី ដែលលេចធ្លោគឺ ការរក្សាប្រកបដោយប្រសិទ្ធភាពនៃការផ្លាស់ប្តូរគណៈប្រតិភូនៅគ្រប់កម្រិត យន្តការសន្ទនា ការពិគ្រោះយោបល់ ការផ្លាស់ប្តូរព័ត៌មាន ការបណ្តុះបណ្តាល ការគ្រប់គ្រងការពារព្រំដែន ការចងសម្ព័ន្ធមេត្រីភាព ការឃោសនាផ្សព្វផ្សាយអំពីចំណងសាមគ្គីភាព និងមិត្តភាពរវាងប្រទេសទាំងពីរ ការស្វែងរក ប្រមូល និងធ្វើមាតុភូមិនិវត្តន៍អដ្ឋិធាតុយុទ្ធជនពលី ការសម្របសម្រួល និងការគាំទ្រគ្នាទៅវិញទៅមកនៅវេទិកាពហុភាគី។

ប្រតិភូទាំង​ឡាយ​ថត​រូប​ជុំគ្នា

លោកឧត្តមសេនីយ៍ឯក យ៉ា គឹមអ៊ី បានថ្លែងអំណរគុណវៀតណាមដែលបានជួយគាំទ្រទាំងសម្ភារៈ និងស្មារតី ជូនកម្ពុជា។ លោកបានសង្កត់ធ្ងន់ថា កម្ពុជាចងចាំជានិច្ចនូវជំនួយដ៏អស្ចារ្យរបស់វៀតណាមក្នុងការជួយកម្ពុជាឱ្យរួចផុតពីរបបប្រល័យពូជសាសន៍។ ក្នុងឱកាសនេះ លោកឧត្តមសេនីយ៍ឯក យ៉ា គឹមអ៊ី  បានជម្រាបជូនលោកឧត្តមសេនីយ៍ឯក Vo Minh Luong អំពីលទ្ធផលនៃកិច្ចប្រជុំការងារជាមួយអធិការកិច្ចនៃក្រសួងការពារប្រទេសវៀតណាម។

ដោយវាយតំលៃខ្ពស់ចំពោះលទ្ធផលនៃកិច្ចប្រជុំនេះ លោកឧត្តមសេនីយ៍ឯក Vo Minh Luong បានស្នើថា នាពេលខាងមុខ ភាគីទាំងពីរគប្បីបង្កើនការជួបប្រាស្រ័យ រក្សាទំនាក់ទំនង បន្តការផ្លាស់ប្តូរ ការចែករំលែកបទពិសោធន៍ជំនាញវិជ្ជាជីវៈ និងជួយគ្នាទៅវិញទៅមក ដើម្បីលើកកំពស់សមត្ថភាពក្នុងការផ្តល់យោបល់ប្រកបដោយប្រសិទ្ធភាព ជូនថ្នាក់ដឹកនាំក្រសួងការពារជាតិនៃប្រទេសនីមួយៗលើការងារអធិការកិច្ច។ លោកឧត្តមសេនីយ៍ឯក Vo Minh Luong បានអះអាងថា ថ្នាក់ដឹកនាំក្រសួងការពារប្រទេសវៀតណាមជានិច្ចកាលគាំទ្រ និងបង្កលក្ខណៈងាយស្រួលដើម្បីស្ថាប័នអធិការកិច្ចទាំងពីរ ពង្រឹងកិច្ចសហប្រតិបត្តិការ រួមចំណែកជំរុញកិច្ចសហប្រតិបត្តិការលើវិស័យការពារជាតិទ្វេភាគីឱ្យកាន់តែស៊ីជម្រៅថែមទៀត៕

បកប្រែដោយ Duy Hoan