វៀតណាមគាំទ្រសហគ្រាសចិនពង្រីកការវិនិយោគក្នុងគម្រោងថាមពលបៃតង

ដោយវាយតម្លៃថាសម្ព័ន្ធក្រុមហ៊ុន Huadian បានពង្រីកទំហំធ្វើអាជីវកម្មរបស់ខ្លួនកាន់តែខ្លាំងឡើង និងសម្រេចបានសមិទ្ធិផលជាច្រើននាពេលថ្មីៗនេះ លោកនាយករដ្ឋមន្ត្រីបានមានប្រសាសន៍ថា វៀតណាមកំពុងខិតខំសម្រេចបាននូវអត្រាកំណើន ៨% ក្នុងឆ្នាំ ២០២៥ និងកំណើនពីរខ្ទង់ក្នុងឆ្នាំបន្តបន្ទាប់ទៀត ដូច្នេះតម្រូវការអគ្គិសនីក៏កើនឡើងផងដែរ ជាពិសេសតម្រូវការអគ្គិសនីស្អាត បម្រើការអភិវឌ្ឍយ៉ាងឆាប់រហ័ស និងប្រកបដោយចីរភាព។

រដ្ឋាភិបាលវៀតណាមស្វាគមន៍សហគ្រាសបរទេស និងចិនពង្រីកការវិនិយោគ និងធ្វើអាជីវកម្មនៅវៀតណាម ជាពិសេសលើវិស័យដែលសមស្របនឹងតម្រូវការអភិវឌ្ឍន៍ប្រកបដោយចីរភាព ស្របតាមឧត្តមភាពរបស់ចិន និងផ្តល់ផលប្រយោជន៍ដល់ភាគីទាំងពីរ រួមទាំងវិស័យថាមពលផងដែរ។

លោក Pham Minh Chinh នាយករដ្ឋមន្ត្រី និង​លោក Peng Gangping (រូប​ថត៖ vnanet.vn)

ថ្លែងអំណរគុណលោក Pham Minh Chinh នាយករដ្ឋមន្ត្រី ដែលបានចំណាយពេលវេលាដ៏មានតំលៃរបស់ខ្លួនដើម្បីទទួលជួបគណៈប្រតិភូ ក៏ដូចជាគាំទ្រកិច្ចសហប្រតិបត្តិការវិនិយោគរបស់សម្ព័ន្ធក្រុមហ៊ុន Huadian នៅប្រទេសវៀតណាម លោក Peng Gangping បានឲ្យដឹងថា សម្ព័ន្ធក្រុមហ៊ុន Huadian បានវិនិយោគប្រមាណ ២.៨ ពាន់លានដុល្លារអាមេរិកក្នុងគម្រោងថាមពលនៅវៀតណាម ដែលមានសមត្ថភាពដំឡើងសរុប 1.5GW រួមមាន រោងចក្រថាមពលកំដៅ Duyen Hai និងគម្រោងថាមពលខ្យល់ចំនួន ៤ នៅខេត្ត Dak Lak។  សម្ព័ន្ធក្រុមហ៊ុនមានបំណងចង់បន្តវិនិយោគក្នុងការអភិវឌ្ឍឧស្សាហកម្មថាមពលកកើតឡើងវិញនៅវៀតណាម រួមទាំងការអនុវត្តថាមពលជីវម៉ាស ថាមពលខ្យល់ និងគម្រោងស្តុកថាមពលនៅ Dak Lak, Tra Vinh, Quang Tri, និង Lam Dong ក៏ដូច​ជា​សហការជាមួយវិទ្យាស្ថានស្រាវជ្រាវ និងសាកលវិទ្យាល័យនានាក្នុងប្រទេសវៀតណាម ដើម្បីជំរុញការផ្ទេរបច្ចេកវិទ្យា និងការបណ្តុះបណ្តាលធនធានមនុស្ស ...

លោក Peng Gangping បានស្នើរដ្ឋាភិបាលវៀតណាមឆាប់បញ្ចប់គោលនយោបាយវិនិយោគសម្រាប់គម្រោងថាមពលបៃតង ដូចជាថាមពលខ្យល់ ថាមពលពន្លឺព្រះអាទិត្យ ជីវម៉ាស អ៊ីដ្រូសែន ស្តុកទុកថាមពល និងថាមពលវារីអគ្គិសនីស្តុកទុក ជាពិសេសគោលនយោបាយអនុគ្រោះសម្រាប់បច្ចេកវិទ្យាកែលម្អថាមពលប្រពៃណី សន្សំសំចៃថាមពល ការបំភាយឧស្ម័នទាប និងកែលម្អរោងចក្រថាមពលកំដៅធ្យូងថ្ម។

លោក Pham Minh Chinh នាយករដ្ឋមន្ត្រី ទទួល​ជួប​លោក Peng Gangping

លោក Pham Minh Chinh នាយករដ្ឋមន្ត្រី បានស្នើឲ្យសម្ព័ន្ធក្រុមហ៊ុន Huadian ពង្រីកឧត្តមភាព និងសមិទ្ធិផលរបស់ខ្លួន អនុវត្តប្រកបដោយភាពច្នៃប្រឌិត និងបត់បែនតាមលក្ខខណ្ឌរបស់វៀតណាម រួមចំណែកធានាសន្តិសុខថាមពលសម្រាប់វៀតណាម រួមទាំងជួយសម្ព័ន្ធក្រុមអគ្គិសនីវៀតណាមក្នុងវិស័យវិទ្យាសាស្ត្រ និងបច្ចេកវិទ្យានៃឧស្សាហកម្មអគ្គិសនី ធានាសន្តិសុខថាមពលស្អាត បំពេញតម្រូវការអភិវឌ្ឍរបស់ប្រទេស នាពេលខាងមុខ។

ដោយសង្សឹមថា សម្ព័ន្ធក្រុមហ៊ុន Huadian អនុវត្តប្រកបដោយជោគជ័យនូវគម្រោងដែលខ្លួនបានបណ្តាក់ទុននៅវៀតណាម លោកនាយករដ្ឋមន្ត្រី បានស្វាគមន៍សម្ព័ន្ធក្រុមហ៊ុនបន្តវិនិយោគលើគម្រោងថាមពលបៃតងបន្ថែមទៀត ដូចជាថាមពលខ្យល់ ថាមពលពន្លឺព្រះអាទិត្យ ជីវម៉ាស អ៊ីដ្រូសែន ស្តុកថាមពល និងថាមពលវារីអគ្គិសនីស្តុកទុកនៅវៀតណាម។

បកប្រែដោយ Duy Hoan