លោកអគ្គលេខាធិការអង្គការសហប្រជាជាតិ អបអរសាទរចំពោះថ្នាក់ដឹកនាំ និងប្រជាជនវៀតណាម ក្នុងឱកាសបុណ្យចូលឆ្នាំថ្មីប្រពៃណីជាតិ២០២៥

លោក Antonio Guterres បានផ្ញើសារជូនពរឆ្នាំថ្មីដល់លោក To Lam អគ្គលេខាបក្ស លោក Luong Cuong ប្រធានរដ្ឋ លោក Pham Minh Chinh នាយករដ្ឋមន្ត្រី លោក Tran Thanh Man ប្រធានរដ្ឋសភា និងប្រជាជនវៀតណាម។

ដោយអបអរសាទរចំពោះសមិទ្ធិផលគួរអោយចាប់អារម្មណ៍ក្នុងការអភិវឌ្ឍសេដ្ឋកិច្ចសង្គមដែលវៀតណាមសម្រេចបាននៅឆ្នាំ២០២៤ លោក Antonio Guterres បានបញ្ជាក់ថា អង្គការសហប្រជាជាតិ បានចាត់ទុកវៀតណាមជាដៃគូគួរឲ្យទុកចិត្ត និងជាសមាជិកដែលមានការទទួលខុសត្រូវ មានតួនាទី និងការរួមចំណែកកាន់តែសំខាន់ចំពោះសហគមន៍អន្តរជាតិ។

លោក Dang Hoang Giang និងលោក Antonio Guterres (រូបថត៖ vnanet.vn)

លោក Dang Hoang Giang បានវាយតំលៃខ្ពស់ចំពោះលទ្ធផលសំខាន់ៗដែលអង្គការសហប្រជាជាតិសម្រេចបាននៅក្នុងឆ្នាំកន្លងទៅ ក្រោមការដឹកនាំរបស់លោក Guterres អគ្គលេខាធិការ ជាពិសេសការខិតខំប្រឹងប្រែង និងការរួមចំណែកក្នុងការជំរុញបទឈប់បាញ់នៅមជ្ឈិមបូព៌ា ការជម្រុញការអនុវត្តគោលដៅអភិវឌ្ឍន៍ប្រកបដោយចីរភាព (SDG) និងការឆ្លើយតបនឹងបញ្ហាប្រឈមសកលថ្មី។ លោក Dang Hoang Giang បានបញ្ជាក់ពីការគាំទ្ររបស់វៀតណាមចំពោះការផ្តល់អាទិភាពរបស់អង្គការសហប្រជាជាតិក្នុងឆ្នាំ២០២៥ ដោយសង្កត់ធ្ងន់លើបំណងចង់រួមចំណែកប្រកបដោយប្រសិទ្ធភាពរបស់វៀតណាមក្នុងការងាររួមរបស់អង្គការសហប្រជាជាតិ។

ដោយសង្កត់ធ្ងន់លើសារៈសំខាន់នៃឆ្នាំ២០២៥ ដែលជាឆ្នាំរំលឹកខួបលើកទី៨០ នៃការបង្កើតសាធារណរដ្ឋប្រជាធិបតេយ្យវៀតណាម ដែលបច្ចុប្បន្នជាសាធារណៈរដ្ឋសង្គមនិយមវៀតណាម និងរំលឹកទស្សវត្សរិ៍ទី ៨ នៃការបង្កើតអង្គការសហប្រជាជាតិ ក្នុងបរិបទដែលពិភពលោកកំពុងមានទាំងកាលានុវត្តភាព និងបញ្ហាប្រឈមជាច្រើនប្រទាក់ក្រឡាគ្នា លោក Antonio Guterres និងលោក Dang Hoang Giang បានអះអាងថា ភាគីទាំងពីរនឹងបន្តពង្រឹងកិច្ចសហប្រតិបត្តិការ និងខិតខំប្រឹងប្រែងដើម្បីលើកកម្ពស់សន្តិភាព សន្តិសុខ និងការអភិវឌ្ឍប្រកបដោយចីរភាព និងដោះស្រាយបញ្ហាសកលនានា៕

បកប្រែដោយ Thuy Anh