សក្ដានុពលនៃកិច្ចសហប្រតិបត្តិការរវាងវៀតណាម និងប៊ុលហ្គារី នៅមានច្រើនណាស់
កប.អនឡាញ - ចាប់ពីថ្ងៃទី ១២ ដល់ថ្ងៃទី ១៧ ឧសភា គណៈប្រតិភូក្រសួងឧស្សាហកម្ម និងពាណិជ្ជកម្មវៀតណាម ដឹកនាំដោយលោក Nguyen Hong Dien រដ្ឋមន្ត្រីក្រសួងឧស្សាហកម្ម និងពាណិជ្ជកម្ម បានអញ្ជើញទៅបំពេញទស្សនកិច្ចការងារនៅប្រទេសកាហ្សាក់ស្ថាន និងប៊ុលហ្គារី និងចូលរួមកិច្ចប្រជុំគណៈកម្មាធិការអន្តររដ្ឋាភិបាលរវាងវៀតណាម និងប្រទេសទាំងពីរខាងលើ និងកិច្ចប្រជុំពាក់ព័ន្ធ។
នាថ្ងៃទី ១៣ ឧសភា នៅប្រទេសប៊ុលហ្គារី លោក Nguyen Hong Dien រដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម បានជួបទ្វេភាគីជាមួយលោក Petko Nikolov រដ្ឋមន្ត្រីក្រសួងសេដ្ឋកិច្ច និងឧស្សាហកម្មប៊ុលហ្គារី។
|
|
លោក Nguyen Hong Dien រដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម និងលោក Petko Nikolov រដ្ឋមន្ត្រីក្រសួងសេដ្ឋកិច្ច និងឧស្សាហកម្មប៊ុលហ្គារី |
ថ្លែងក្នុងជំនួបនេះ លោក Nguyen Hong Dien បានឲ្យដឹងថា ដំណើរទស្សនកិច្ចការងារនៅប៊ុលហ្គារី លើកនេះរបស់គណៈប្រតិភូរដ្ឋាភិបាលវៀតណាមនឹងដើរតួនាទីយ៉ាងសំខាន់ក្នុងការជំរុញទំនាក់ទំនងរវាងប្រទេសទាំងពីរ។
លោករដ្ឋមន្ត្រី Nguyen Hong Dien ឲ្យដឹងថា បច្ចុប្បន្ននេះ វៀតណាមជាប្រទេសមួយក្នុងចំណោមប្រទេសទាំង ៤០ ដែលមានទំហំសេដ្ឋកិច្ចធំលើពិភពលោក។ វៀតណាមមានទំហំនាំចេញ-នាំចូលប្រចាំឆ្នាំឈានដល់ជាង ៧០០ ពាន់លានដុល្លារអាមេរិក ហើយជាប្រទេសមួយក្នុងចំណោមប្រទេសទាំង ២០ ដែលមានទំហំពាណិជ្ជកម្មធំនៅក្នុងពិភពលោក។ ទន្ទឹមនឹងនោះ វៀតណាមក៏ជាប្រទេសមួយក្នុងចំណោមប្រទេសទាំង ១៥ ដែលមានបរិយាកាសល្អក្នុងការទាក់ទាញការវិនិយោគបរទេស (FDI) ហើយការទាក់ទាញ FDI ប្រចាំឆ្នាំរបស់វៀតណាមគឺជាមធ្យម ៥-៦% ក្នុងមួយឆ្នាំ។
លោករដ្ឋមន្ត្រី Nguyen Hong Dien បានសង្កត់ធ្ងន់ថា កិច្ចសហប្រតិបត្តិការសេដ្ឋកិច្ច - ពាណិជ្ជកម្ម - វិនិយោគដើរតួនាទីសំខាន់ក្នុងទំនាក់ទំនងវៀតណាម - ប៊ុលហ្គារី ហើយទំនាក់ទំនងនេះតែងតែមានការរីកចម្រើនជាវិជ្ជមានរៀងរាល់ឆ្នាំ។ យ៉ាងណាក៏ដោយ ទំនាក់ទំនងពាណិជ្ជកម្មទ្វេភាគីរវាងវៀតណាម និងប៊ុលហ្គារី មិនសក្ដិសមនឹងសក្ដានុពលនៃភាគីទាំងពីរឡើយ។
ជាក់ស្តែង ការនាំចេញរបស់វៀតណាមទៅកាន់ប៊ុលហ្គារីក្នុងឆ្នាំ ២០២៣ គឺស្មើនឹង ០,២៤% នៃការនាំចូលរបស់ប៊ុលហ្គារី ខណៈដែលការនាំចេញរបស់ប៊ុលហ្គារីទៅកាន់ប្រទេសវៀតណាមមានត្រឹមតែ ០.០១៨% នៃការនាំចូលរបស់វៀតណាមប៉ុណ្ណោះ។
|
|
ប្រតិភូទាំងឡាយថតរូបជាអនុស្សាវរីយ៍ |
លោករដ្ឋមន្ត្រី Nguyen Hong Dien បានអះអាងថា សក្ដានុពលនៃកិច្ចសហប្រតិបត្តិការរវាងវៀតណាម និងប៊ុលហ្គារី នៅមានច្រើនណាស់។ ក្នុងឱកាសនេះ លោករដ្ឋមន្ត្រី Nguyen Hong Dien បានអញ្ជើញ និងស្វាគមន៍លោករដ្ឋមន្ត្រី Petko Nikolov និងសហការីនៅក្រសួងសេដ្ឋកិច្ច និងឧស្សាហកម្មប៊ុលហ្គារី មកបំពេញទស្សនកិច្ចនៅវៀតណាមនាពេលឆាប់ៗនេះ។
លោករដ្ឋមន្ត្រី Petko Nikolov បានអះអាងថា ប៊ុលហ្គារី យកចិត្ដទុកដាក់យ៉ាងខ្លាំង និងមានបំណងចង់ជំរុញកិច្ចសហប្រតិបត្តិការជាមួយវៀតណាមលើវិស័យជាច្រើន ជាពិសេសលើវិស័យសេដ្ឋកិច្ច ពាណិជ្ជកម្ម និងវិនិយោគ ក្នុងគោលដៅលើកកម្ពស់ទំហំពាណិជ្ជកម្មទ្វេភាគី និងបង្កលក្ខណៈងាយស្រួលសម្រាប់អាជីវកម្មនៃប្រទេសទាំងពីរវិនិយោគលើទីផ្សារគ្នាទៅវិញទៅមកក្នុងវិស័យកសិកម្ម ឱសថ រ៉ែ ថាមពល...៕
បកប្រែដោយ Thanh Cong