ផ្ញើសារអបអរសាទរទិវាគ្រូពេទ្យវៀតណាម ចំពោះគ្រូពេទ្យនៅមណ្ឌលសុខាភិបាលស្រុក Thanh Liem លោក Vo Van Thuong ប្រធានរដ្ឋវៀតណាម បានទទួលស្គាល់ និងវាយតម្លៃខ្ពស់ចំពោះជួរគ្រូពេទ្យ និងបុគ្គលិកពេទ្យស្រុកដោយទទួលបានសមិទ្ធផលជាច្រើនក្នុងការថែទាំសុខភាពប្រជាជន។ លោកប្រធានរដ្ឋ​ក៏បានវាយតម្លៃខ្ពស់ចំពោះមណ្ឌលសុខាភិបាលថ្នាក់ឃុំឡើងដែលបានអនុវត្តប្រកបដោយជោគជ័យនូវកម្មវិធីគោលដៅជាតិស្តីពីសុខាភិបាលមូលដ្ឋាន ការចាក់វ៉ាក់សាំង ការថែទាំសុខភាពបឋម និងការផ្តល់ប្រឹក្សាសុខភាពមនុស្សវ័យជំទង់ ការពិនិត្យ និងថែទាំអ្នកជំងឺរ៉ាំរ៉ៃជាដើម។ ជាពិសេសក្នុងអំឡុងពេល Covid-19 មណ្ឌលសុខាភិបាលរួមជាមួយប្រព័ន្ធសុខាភិបាលនៃខេត្ត Ha Nam ទាំងមូលបានរួមចំណែកយ៉ាងសកម្ម និងមានប្រសិទ្ធភាពក្នុងការបង្ការ និងទប់ស្កាត់ការរីករាលដាលនៃជំងឺ Covid-19 នៅតាមមូលដ្ឋាន។

leftcenterrightdel
លោក Vo Van Thuong ប្រធានរដ្ឋ ចុះទៅសួរសុខទុក្ខ និងអបអរសាទរចំពោះគ្រូពេទ្យ នៅខេត្ត Ha Nam

ដោយបញ្ជាក់ថា វិជ្ជាជីវៈពេទ្យជាវិជ្ជាជីវៈដ៏ថ្លៃថ្នូ បេសកកម្មធំបំផុតគឺព្យាបាលជំងឺ និងជួយសង្គ្រោះជីវិត នាំមកនូវសេចក្តីសុខ សុភមង្គល ដល់មនុស្សម្នាក់ៗ លោកប្រធានរដ្ឋចាត់ទុកការថែទាំសុខភាពនៅមូលដ្ឋានបានល្អគឺរួមចំណែកដើម្បីកសាងអនាគតរបស់ប្រទេសជាតិប្រកបដោយចីរភាព។ លោក Vo Van Thuong បានលើកទឹកចិត្តដល់គ្រូពេទ្យ និងបុគ្គលិកពេទ្យទាំងអស់គប្បីតែខិតខំប្រឹងប្រែងក្នុងការងារវិជ្ជាជីវៈ គួរតែសិក្សាដោយមិនឈប់ឈរ ដើម្បីលើកកម្ពស់គុណវុឌ្ឍិរបស់ខ្លួន និងត្រូវរក្សាស្មារតីទទួលខុសត្រូវខ្ពស់ ចេះអាណិតអាសូរ និងរំលែកទុក្ខលំបាកអ្នកជំងឺ និងគ្រួសាររបស់ពួកគេ។

leftcenterrightdel
លោក Vo Van Thuong ប្រធានរដ្ឋ សួរសុខទុក្ខអ្នកជំងឺនៅមណ្ឌលសុខាភិបាលយស្រុក Thanh Liem

លោកប្រធានរដ្ឋ​បានស្នើឱ្យគណៈកម្មាធិការបក្ស អាជ្ញាធរ និងស្ថាប័នពាក់ព័ន្ធខេត្ត Ha Nam និងស្រុក Thanh Liem បន្តយកចិត្តទុកដាក់វិនិយោគបន្ថែមទៀតលើវិស័យសុខាភិបាលមូលដ្ឋាន ក្នុងទិសដៅផ្តោតលើការអភិវឌ្ឍធនធានមនុស្ស ធ្វើយ៉ាងណាលើកកំពស់គុណភាពការពិនិត្យ និងព្យាបាល បន្តវិនិយោគលើសម្ភារៈបរិក្ខារពេទ្យ និងសាងសង់មន្ទីរពេទ្យឆ្លាតវៃ មិត្តភាព បៃតង និងស្អាត។ គ្រូពេទ្យទាំងអស់បន្តស្រាវជ្រាវ និងស្វែងរកវិធីព្យាបាលជម្ងឺថ្មីៗ ជាពិសេសក្រោយការរាតត្បាត Covid-19។

រំលឹកឡើងវិញនូវការប្រៀនប្រដៅរបស់អ៊ំហូជាទីគោរពគឺ "គ្រូពេទ្យត្រូវតែដូចជាអ្នកម្តាយ" លោកប្រធានរដ្ឋសង្ឃឹមថា គ្រូពេទ្យ និងបុគ្គលិកពេទ្យនឹងបន្តអនុវត្តតាមការបង្រៀនរបស់អ៊ំហូ ហើយបំពេញភារកិច្ចវិជ្ជាជីវៈឱ្យបានល្អ យកចិត្តទុកដាក់ និងការពារសុខភាពប្រជាជន រួមចំណែកអភិវឌ្ឍខេត្ត Ha Nam និងប្រទេសជាតិ នាពេលខាងមុខ៕

បកប្រែដោយ Minh Trung