ពិធីបង្ហូតទង់អាស៊ានដើម្បីអបអរសាទរខួបលើកទី ៥៦ នៃការបង្កើតអាស៊ាន

អញ្ជើញចូលរួមពិធីនេះមានឯកអគ្គរដ្ឋទូត ភារធាវី តំណាងស្ថានទូតនៃប្រទេសអាស៊ាន និងបណ្តាប្រទេសដៃគូរបស់អាស៊ាននៅទីក្រុងហាណូយ ថ្នាក់ដឹកនាំក្រសួង ស្ថាប័នរបស់វៀតណាម។

លោក Bui Thanh Son រដ្ឋមន្ត្រីក្រសួងការបរទេសវៀតណាម

ពិធីបង្ហូតទង់ប្រចាំឆ្នាំក្នុងឱកាសនៃការបង្កើតអាស៊ានបានក្លាយជាពិធីប្រកបដោយមោទនភាពរបស់ប្រទេសសមាជិកអាស៊ានទាំងអស់ ដើម្បីលើកតម្កើងតម្លៃរួម និងការប្តេជ្ញាចិត្តក្នុងការលើកកម្ពស់សាមគ្គីភាព មិត្តភាព និងកិច្ចសហប្រតិបត្តិការរបស់អាស៊ាន ក្រោម "ដំបូលរួម" គឺសហគមន៍អាស៊ាន ដើម្បីសន្តិភាព កិច្ចសហប្រតិបត្តិការ និងវិបុលភាពរួមនៃតំបន់។

ពិធីបង្ហូតទង់អាស៊ាន

ថ្លែងមតិក្នុងពិធី លោក Bui Thanh Son បានអះអាងថា ចាប់តាំងពីការបង្កើតឡើងកាលពី ៥៦ ឆ្នាំមកម៉្លេះ អាស៊ានបាននិងកំពុងរីកចម្រើនឥតឈប់ឈរ ក្លាយជាកម្លាំងស្នូលក្នុងដំណើរការទាំងអស់ក្នុងតំបន់ បង្ហាញពីទស្សនៈវិស័យអំពីសហគមន៍មួយប្រកបដោយសន្តិភាព ស្ថិរភាព និងការអភិវឌ្ឍន៍រីកចម្រើន។ ទំនាក់ទំនងរវាងអាស៊ាន និងដៃគូមានការអភិវឌ្ឍទាំងបរិមាណ និងគុណភាព ដែលរួមចំណែកធ្វើឱ្យអាស៊ានរក្សាបាននូវកំណើនខ្ពស់ និងក្លាយជាខឿនសេដ្ឋកិច្ចធំលំដាប់ទីប្រាំលើពិភពលោក។ វាជាភស្តុតាងនៃអត្តសញ្ញាណ តម្លៃ ភាពរឹងមាំ និងកិត្យានុភាពរបស់អាស៊ាន។ លោក Bui Thanh Son បានសង្កត់ធ្ងន់ថា ជោគជ័យរបស់វៀតណាម​ក្នុង​ការ​ធ្វើ​សមាហរណកម្ម និងការផ្លាស់ប្តូរថ្មី មាន​ការរួមចំណែករបស់អាស៊ាន ​ក៏ដូចជាភាពជោគជ័យ​របស់​អាស៊ាន ហើយក៏​មាន​ការ​រួមវិភាគទានរបស់វៀតណាមផងដែរ។ លើសពីនេះ ទំនាក់ទំនងរវាងវៀតណាម និងសមាជិកអាស៊ានក៏ត្រូវបានប្រៀបដូចជា "ដីឥដ្ឋ" សម្រាប់កសាង "ផ្ទះរួម​" សហគមន៍អាស៊ានដ៏រឹងមាំ និងនិរន្តរភាពនាពេលបច្ចុប្បន្ននេះ។

ប្រតិភូទាំង​ឡាយ​ថត​រូប​ជុំ​គ្នា

បើយោងតាមលោក Bui Thanh Son ថ្វីត្បិតតែបច្ចុប្បន្នពិភពលោកកំពុងប្រឈមមុខនឹងបញ្ហាជាច្រើន ការងើបឡើងវិញនៃសេដ្ឋកិច្ចពិភពលោកនៅតែមិនច្បាស់លាស់ បរិយាកាសភូមិសាស្ត្រនយោបាយនៅតែបន្តប្រែប្រួល ហើយការប្រកួតប្រជែងសម្រាប់ប្រទេសធំៗកំពុងកើនឡើងពីមួយថ្ងៃទៅមួយថ្ងៃក៏ដោយ ក៏ប៉ុន្តែសហគមន៍អាស៊ានបានបង្ហាញពីភាពធន់ ភាពបត់បែន និងការសម្របខ្លួនយ៉ាងសកម្ម ដើម្បីជំនះរាល់ឧបសគ្គទាំង​អស់​។ ជាមួយនឹងមូលដ្ឋានគ្រឹះដ៏រឹងមាំដែលត្រូវបានពូនជ្រំអស់រយៈពេលជាងកន្លះសតវត្សរ៍ រួមជាមួយនឹងសេចក្តីប្រាថ្នារបស់ខ្លួន អាស៊ាននឹងក្លាយជាសហគមន៍អភិវឌ្ឍន៍ប្រកបដោយបរិយប័ន្ន ចីរភាព និងជាមជ្ឈមណ្ឌលកំណើននៃតំបន់ និងពិភពលោក។ អាស៊ាននឹងមិនត្រឹមតែបម្រើឱ្យកាន់តែប្រសើរឡើងនូវផលប្រយោជន៍ជាក់ស្តែងរបស់ប្រជាជន និងធុរកិច្ចអាស៊ានទាំងអស់ប៉ុណ្ណោះទេ ប៉ុន្តែថែមទាំងដើរតួនាទីកាន់តែធំក្នុងបញ្ហាសកល រួមចំណែកដល់សន្តិភាព ស្ថិរភាព និងវិបុលភាពក្នុងតំបន់ និងពិភពលោក៕

បកប្រែដោយ Duy Hoan