វៀតណាមមានបំណងចង់ពង្រឹងទំនាក់ទំនងកិច្ចសហប្រតិបត្តិការជាមួយសម្ព័ន្ធក្រុមហ៊ុន AstraZeneca

លោកនាយករដ្ឋមន្ត្រី Pham Minh Chinh បានស្វាគមន៍លោក Pascal Soriot បានត្រឡប់មកវៀតណាមវិញបន្ទាប់ពី ២៥ ឆ្នាំដើម្បីមើលឃើញពីសមិទ្ធផលក្នុងការបង្ការ និងគ្រប់គ្រងជំងឺរាតត្បាត និងការអភិវឌ្ឍសេដ្ឋកិច្ចរបស់វៀតណាម។ សមិទ្ធិផលទាំងនេះមានការរួមចំណែកជាក់ស្តែងរបស់ប្រទេស និងអង្គការជាច្រើន រួមទាំងសម្ព័ន្ធក្រុមហ៊ុន AstraZeneca ដែលមិនត្រឹមតែផ្តល់វ៉ាក់សាំងទាន់ពេលវេលាប៉ុណ្ណោះទេ ថែមទាំងផ្តល់អាទិភាពដល់ប្រទេសវៀតណាមទៀតផង។ លោកនាយករដ្ឋមន្ត្រីបានអះអាងថា រដ្ឋាភិបាលនិងប្រជាជនវៀតណាមនឹងមិនដែលបំភ្លេចការចែករំលែក និងជំនួយដ៏មានតម្លៃរបស់ AstraZeneca ចំពោះវៀតណាមឡើយ។

លោកនាយករដ្ឋមន្ត្រី Pham Minh Chinh ទទួលជួបលោក Pascal Soriot អគ្គនាយកសម្ព័ន្ធក្រុមហ៊ុន AstraZeneca

លោកអគ្គនាយកសម្ព័ន្ធក្រុមហ៊ុន AstraZeneca បានអះអាងថា ដំណើរទស្សនកិច្ចនៅវៀតណាមលើកនេះ គឺសំដៅធ្វើឱ្យស៊ីជម្រៅនូវទំនាក់ទំនងកិច្ចសហប្រតិបត្តិការល្អដែលមានស្រាប់រវាងសម្ព័ន្ធក្រុមហ៊ុនជាមួយវៀតណាម។ ដោយបានឃើញផ្ទាល់ភ្នែកនូវសមិទ្ធិផលដែលវៀតណាមសម្រេចបាន លោក Pascal Soriot បានសម្តែងការកោតសរសើរ និងចំណាប់អារម្មណ៍របស់ខ្លួនចំពោះការខិតខំប្រឹងប្រែងរបស់វៀតណាមក្នុងការប្រយុទ្ធប្រឆាំងនឹងជំងឺកូវីដ-១៩ ផង និងការអភិវឌ្ឍសេដ្ឋកិច្ចផង ដែលបង្ហាញពីសមត្ថភាពដឹកនាំ និងគ្រប់គ្រងរបស់រដ្ឋាភិបាលវៀតណាម។

ក្នុងតួនាទីសម្ព័ន្ធក្រុមហ៊ុនមួយក្នុងចំណោមសម្ព័ន្ធក្រុមហ៊ុននាំមុខគេទាំង ៣ នៅលើពិភពលោកក្នុងការស្រាវជ្រាវ និងព្យាបាលជំងឺមហារីក ជំងឺសរសៃឈាមបេះដូង ជំងឺទឹកនោមផ្អែម AstraZeneca មានបំណងចង់ពង្រីកវត្តមានរបស់ខ្លួននៅក្នុងប្រទេសវៀតណាម។ ដោយឈរលើមូលដ្ឋាននោះ លោក Pascal Soriot បានសន្យាថា AstraZeneca នឹងធ្វើការយ៉ាងជិតស្និទ្ធជាមួយរដ្ឋាភិបាលវៀតណាមដើម្បីលើកកម្ពស់សមត្ថភាពផ្នែកវេជ្ជសាស្ត្រ និងព្យាបាល និងអភិវឌ្ឍវិស័យឱសថ និងត្រៀមខ្លួនជាស្រេចក្នុងការផ្ទេរបច្ចេកវិទ្យាផលិតវ៉ាក់សាំងទៅកាន់ប្រទេសវៀតណាម។

ដោយស្វាគមន៍ការសម្រេចចិត្តវិនិយោគ ៩០ លានដុល្លារអាមេរិកក្នុងគម្រោងផលិតឱសថរបស់ AstraZeneca នៅប្រទេសវៀតណាម លោកនាយករដ្ឋមន្ត្រីវៀតណាមមានបំណងចង់លើកតម្កើងទំនាក់ទំនងជាមួយសម្ព័ន្ធក្រុមហ៊ុន ឆ្ពោះទៅរកកិច្ចសហប្រតិបត្តិការយុទ្ធសាស្ត្រក្នុងការផលិតវ៉ាក់សាំង ថ្នាំព្យាបាល និងចែករំលែកបទពិសោធន៍ក្នុងការគ្រប់គ្រង ការបណ្តុះបណ្តាលធនធានមនុស្ស និងជួយគាំទ្រវៀតណាមក្នុងការអនុវត្តគោលដៅកាត់បន្ថយការបំភាយឧស្ម័នដែលបានសន្យានៅក្នុងកិច្ចប្រជុំកំពូលស្តីពីការប្រែប្រួលអាកាសធាតុរបស់អង្គការសហប្រជាជាតិលើកទី២៦ (COP26)។

អគ្គនាយកសម្ព័ន្ធក្រុមហ៊ុន AstraZeneca បានឲ្យដឹងថា សម្ព័ន្ធក្រុមហ៊ុនកំពុងវិនិយោគចំនួន ៤០០ លានដុល្លារអាមេរិកក្នុងគម្រោងដាំព្រៃឈើនៅក្នុងបណ្ដាប្រទេសជុំវិញពិភពលោកជាមួយនឹងគោលដៅដាំដើមឈើឱ្យបាន ១ ពាន់លានដើមនៅទូទាំងពិភពលោកនៅឆ្នាំ ២០២៦ ហើយសង្ឃឹមថា គម្រោងនឹងអាចបានដាក់ពង្រាយក្នុងប្រទេសវៀតណាម រួមចំណែក​ជួយ​វៀតណាមសម្រេចបានគោលដៅកាត់បន្ថយការបំភាយឧស្ម័នផ្ទះកញ្ចក់ និងអភិវឌ្ឍបៃតង៕

បកប្រែដោយ Pham Diep