កិច្ចសហប្រតិបត្តិការរវាងវៀតណាម និងឡាវ ដើម្បីស្ថិរភាព និងការអភិវឌ្ឍនៅតំបន់ព្រំដែន
កប.អនឡាញ - នាថ្ងៃទី១០ ខែធ្នូ នៅរដ្ឋធានីវៀងច័ន្ទន៍នៃសាធារណរដ្ឋប្រជាធិបតេយ្យប្រជាមានិតឡាវបានប្រព្រឹត្តទៅកិច្ចប្រជុំប្រចាំឆ្នាំ លើកទី២៨ រវាងគណៈប្រតិភូទទួលបន្ទុកកិច្ចការព្រំដែនវៀតណាម និងឡាវ។
គណៈប្រតិភូវៀតណាមដឹកនាំដោយលោក Le Hoai Trung អនុរដ្ឋមន្រ្តីក្រសួងការបរទេស និងជាប្រធានគណៈកម្មាធិការជាតិទទួលបន្ទុកកិច្ចការព្រំដែន គណៈប្រតិភូឡាវដឹកនាំដោយលោក Saleumxay Kommasith រដ្ឋមន្រ្តីក្រសួងការបរទេស និងជាប្រធានគណៈកម្មការទទួលបន្ទុកកិច្ចការព្រំដែនឡាវ - វៀតណាម។
ក្នុងកិច្ចប្រជុំ ភាគីទាំងពីរចាត់ទុកថា នៅឆ្នាំកន្លងមក ស្ថិរភាព សន្តិសុខនយោបាយ សណ្ដាប់ធ្នាប់ សុវត្ថិភាពសង្គមត្រូវបានរក្សានៅតំបន់ព្រំដែន ក្រសួង ស្ថាប័ន និងតំបន់នានានៃប្រទេសទាំងពីរ បានអនុវត្តល្អនូវការជួយគាំទ្រដើម្បីអភិវឌ្ឍន៍តំបន់ព្រំដែនលើគ្រប់វិស័យ រួមចំណែកពង្រឹង និងពង្រីកទំនាក់ទំនងរវាងប្រទេសទាំងពីរនិយាយរួម និងតំបន់ព្រំដែននិយាយដោយឡែក។
អំពីទិសដៅ និងភារកិច្ច នៃការងារព្រំដែននៅឆ្នាំ២០១៩ ភាគីទាំងពីរបានយល់ព្រមគ្នាលើកិច្ចសហប្រតិបត្តិការ ដើម្បីអនុវត្តល្អនូវការគ្រប់គ្រងព្រំដែនតាមឯកសារផ្លូវច្បាប់ទ្វេភាគី និងអនុវត្តប្រកបដោយប្រសិទ្ធភាពនូវកិច្ចព្រមព្រៀងស្ដីពីការដោះស្រាយបញ្ហាជនអន្តោប្រវេសន៍ រួមទាំងបញ្ហាមិនចុះសំបុត្រអាពាហ៍ពិពាហ៍នៅតំបន់ព្រំដែននៃប្រទេសទាំងពីរ សហការយ៉ាងល្អជាមួយគ្នាក្នុងការរៀបចំកិច្ចប្រជុំបូកសរុបការអនុវត្តសាកល្បងនូវគម្រោង “ច្រកទ្វារតែមួយឈប់តែម្តង” នៅច្រកទ្វារព្រំដែនអន្តរជាតិ Lao Bao ខេត្ត Quang Tri - ច្រកទ្វារព្រំដែនអន្តរជាតិ Densavan ខេត្ត Savannakhet នៅមុនចុងត្រីមាសទី២ ឆ្នាំ២០១៩ និងបើកច្រកទ្វារដែលភាគីទាំងពីរបានយល់ព្រមគ្នា។ ភាគីទាំងពីរក៏បានកត់ស្គាល់ចំពោះការអភិវឌ្ឍជាវិជ្ជមាននៃកិច្ចសហប្រតិបត្តិការ ស្តីពីការជួយគាំទ្រដើម្បីអភិវឌ្ឍវិស័យសេដ្ឋកិច្ច ពាណិជ្ជកម្ម វប្បធម៌ អប់រំ សុខាភិបាល និងទេសចរណ៍ នៅតបន់ព្រំដែននានានៃប្រទេសទាំងពីរដែរ។
លោកប្រធានគណៈប្រតិភូទាំងពីរបានចុះហត្ថលេខាលើកំណត់ហេតុនៃកិច្ចប្រជុំ និងឯកភាពថា កិច្ចប្រជុំប្រចាំឆ្នាំលើកទី២៩ នឹងបានរៀបចំឡើងនៅវៀតណាមនាដើមត្រីមាសទី៤ ឆ្នាំ២០១៩៕
បកប្រែដោយ Thuy Anh