ទិសដៅថ្មីសម្រាប់ទីក្រុងច្នៃប្រឌិតរបស់អង្គការយូណេស្កូ
កប.អនឡាញ - បច្ចុប្បន្ន វៀតណាមមានទីក្រុងច្នៃប្រឌិតចំនួន ៣ របស់អង្គការយូណេស្កូ៖ ទីក្រុងហាណូយ (វិស័យរចនា) Hoi An (វិស័យសិប្បកម្ម និងសិល្បៈប្រជាប្រិយ) Da Lat (វិស័យតន្ត្រី)។ បន្ទាប់ពីអនុវត្តគំរូអាជ្ញាធរមូលដ្ឋានពីរកម្រិត Hoi An និង Da Lat លែងជាទីក្រុងទៀតហើយ ដែលប៉ះពាល់ដល់ការអនុវត្តកិច្ចសន្យារបស់អង្គការយូណេស្កូ។
ចែករំលែកអំពីបញ្ហានេះ លោកស្រី Tran Hai Van អនុប្រធាននាយកដ្ឋានសហប្រតិបត្តិការអន្តរជាតិ (ក្រសួងវប្បធម៌ កីឡា និងទេសចរណ៍វៀតណាម) បានឲ្យដឹងថា "បន្ទាប់ពីយើងផ្ដល់យោបល់ UNESCO បានឆ្លើយតបថា អង្គការពុំដែលជួបប្រទះករណីណាមួយដូច Hoi An និង Da Lat នោះឡើយ។ UNESCO នឹងពិនិត្យរៀងរាល់ ៤ ឆ្នាំម្តង ប្រសិនបើមូលដ្ឋានទាំងពីរនោះមិនអនុវត្តកិច្ចសន្យារបស់ខ្លួន វាអាចត្រូវបានស្នើឲ្យដកខ្លួនចេញពីបណ្តាញទីក្រុងច្នៃប្រឌិត"។
    |
 |
|
ភ្ញៀវទេសចរទៅទស្សនាភូមិស្មូន Thanh Ha (សង្កាត់ Hoi An Tay ទីក្រុង Da Nang) |
យោងតាមលោកស្រី Tran Hai Van ក្រសួងវប្បធម៌ កីឡា និងទេសចរណ៍ កំពុងពិចារណាលើការបង្កើត "គណៈកម្មាធិការគ្រប់គ្រងទីក្រុងច្នៃប្រឌិត" នៅក្នុងមូលដ្ឋានមានបេតិកភណ្ឌ ដែលដឹកនាំដោយមន្ទីរវប្បធម៌ កីឡា និងទេសចរណ៍ខេត្ត ដោយមានការចូលរួមពីតំណាងសង្កាត់ និងឃុំនានាក្នុងទីក្រុងចាស់។ គណៈកម្មាធិការគ្រប់គ្រងនេះនឹងបន្តអនុវត្តកិច្ចសន្យាអន្តរជាតិ រក្សាសកម្មភាពច្នៃប្រឌិតក្នុងវិស័យវប្បធម៌ និងសិល្បៈ ព្រមទាំង ទទួលខុសត្រូវក្នុងការរាយការណ៍លទ្ធផលដល់អង្គការយូណេស្កូ។ នេះជាជំហានចាំបាច់ដើម្បីធានាបាននូវកិត្យានុភាពរបស់វៀតណាមក្នុងបណ្តាញច្នៃប្រឌិតសកល។
ការផ្លាស់ប្តូរគំរូរដ្ឋបាលក៏បើកឱកាសថ្មីៗផងដែរ។ បច្ចុប្បន្ន Hoi An និង Da Lat មានឱកាសពង្រីកភាពបត់បែន ប្រមូលផ្តុំកម្លាំងពីសហគមន៍មូលដ្ឋានជាច្រើន។ Hoi An មានអត្ថប្រយោជន៍ដែលជាទីក្រុងបុរាណ ជាមួយនឹងវិស័យសិប្បកម្ម និងសិល្បៈប្រជាប្រិយ អាចកសាងគំរូតភ្ជាប់រវាងសង្កាត់ ឃុំ និងភូមិសិប្បកម្មប្រពៃណី។ Da Lat ដែលជា “ទីក្រុងតន្ត្រី” អាចពង្រីកសកម្មភាពរបស់ខ្លួនទៅកាន់លំហរវប្បធម៌ផ្សេងៗគ្នា ជំនួសឲ្យការរៀបចំនៅមូលដ្ឋានតូចចង្អៀត។ បញ្ហាសំខាន់គឺត្រូវមានយន្តការច្បាស់លាស់ដើម្បីធានាកិច្ចសន្យា និងធនធានសម្រាប់ការអនុវត្ត។
ក្នុងបរិបទដែលវៀតណាមមានបំណងអភិវឌ្ឍន៍ឧស្សាហកម្មវប្បធម៌ក្លាយទៅជាវិស័យសេដ្ឋកិច្ចសំខាន់ បណ្តាញទីក្រុងច្នៃប្រឌិតរបស់អង្គការ យូណេស្កូ គឺជាទ្វារសម្រាប់កិច្ចសហប្រតិបត្តិការអន្តរជាតិ ការផ្លាស់ប្តូរវប្បធម៌ និងការអភិវឌ្ឍប្រកបដោយចីរភាព។ ទោះបីជា Hoi An និង Da Lat បានផ្លាស់ប្តូរគំរូរដ្ឋបាលក៏ដោយ ក៏នៅតែអាចបញ្ជាក់ម៉ាកយីហោសកលរបស់ខ្លួន ប្រសិនបើដឹងពីរបៀបលើកកម្ពស់កម្លាំង និងការច្នៃប្រឌិតរបស់សហគមន៍។ អាចនិយាយបានថា ទិសដៅថ្មីសម្រាប់ទីក្រុងច្នៃប្រឌិតរបស់អង្គការ យូណេស្កូ នៅវៀតណាមមិនត្រឹមតែរក្សាកិត្តនាមប៉ុណ្ណោះទេ ថែមទាំងអាចប្រែក្លាយការលំបាកទៅជាកាលានុវត្តភាព ដើម្បីការច្នៃប្រឌិត ក្លាយជាកម្លាំងចលករសម្រាប់ការអភិវឌ្ឍប្រកបដោយចីរភាពសម្រាប់មូលដ្ឋាន និងប្រទេស៕
បកប្រែដោយ Thanh Cong