ក្រុមប្រឹក្សាសន្តិសុខអង្គការសហប្រជាជាតិជួបប្រជុំគ្នាស្តីពីជម្លោះអ៊ីស្រាអែល-ប៉ាឡេស្ទីន

ក្នុងកិច្ចប្រជុំរបស់ក្រុមប្រឹក្សាសន្តិសុខដែលស្នើឡើងដោយអ៊ីស្រាអែល លោក Miroslav Jenca ឧបការីអគ្គលេខាធិការអង្គការសហប្រជាជាតិទទួលបន្ទុកអឺរ៉ុប អាស៊ីកណ្តាល និងអាមេរិក បាននិយាយថា ស្ថានភាពនៅក្នុងតំបន់ដែនដីប៉ាឡេស្ទីនដែលត្រូវកាន់កាប់ កំពុងបន្តអាក្រក់ទៅៗ ហើយចាំបាច់ត្រូវស្វែងរកដំណោះស្រាយនយោបាយចំពោះវិបត្តិហ្គាហ្សា ដើម្បីនាំមកនូវសន្តិភាព និងស្ថិរភាពយូរអង្វែងដល់ប្រជាជននៃភាគីទាំងពីរ។ យោងតាមលោក Miroslav Jenca ចាប់តាំងពីជម្លោះផ្ទុះឡើងវិញ ប្រជាជនប៉ាឡេស្ទីនជាង ៦ ម៉ឺននាក់បានស្លាប់ ហើយចំនួនអ្នកស្លាប់ និងរងរបួសនៅតែបន្តកើត មានជារៀងរាល់ថ្ងៃ។

លោក Miroslav Jenca ឧបការីអគ្គលេខាធិការអង្គការសហប្រជាជាតិទទួលបន្ទុកអឺរ៉ុប អាស៊ីកណ្តាល និងអាមេរិក ថ្លែងនៅកិច្ចប្រជុំ (រូបថត៖ Reuters)

ដោយដកស្រង់ការពិគ្រោះយោបល់ពីតុលាការយុត្តិធម៌អន្តរជាតិ (ICJ) ក្នុងខែកក្កដា ឆ្នាំ២០២៤ មន្ត្រីអង្គការសហប្រជាជាតិរូបនេះបានប្រកាសថា អ៊ីស្រាអែលមានកាតព្វកិច្ចត្រូវបញ្ឈប់ជាភ្លាមមួយរំពិចគ្រប់សកម្មភាពតាំងទីលំនៅថ្មី ជម្លៀសអ្នកតាំងលំនៅទាំងអស់ចេញពីតំបន់ដែនដីប៉ាឡេស្ទីនដែលរងការទន្ទ្រានកាន់កាប់ ហើយបញ្ចប់វត្តមានខុសច្បាប់របស់ខ្លួននៅទីនោះឱ្យបានឆាប់តាមដែលអាចធ្វើទៅបាន។ ទន្ទឹមនឹងនោះ លោកបានបញ្ជាក់ជាថ្មីថា ច្បាប់អន្តរជាតិបានចែងយ៉ាងច្បាស់ថា តំបន់ ហ្គាហ្សាត្រូវតែជាផ្នែកមួយដែលមិនអាចកាត់ផ្ដាច់ចេញពីរដ្ឋប៉ាឡេស្ទីននាពេលអនាគត៕

តាម vovworld.vn