លោក Pham Minh Chinh នាយករដ្ឋមន្ត្រីវៀតណាម អញ្ចើញចូលរួមកម្មវិធី "ភាពលេចធ្លោ នៃTechfest 2023"

នារសៀលទី២៥ វិច្ឆិកា នៅទីក្រុងហូជីមិញ លោក Pham Minh Chinh នាយករដ្ឋមន្ត្រីវៀតណាម បានអញ្ជើញចូលរួម និងថ្លែងក្នុងកម្មវិធី “ភាពលេចធ្លោនៃ Techfest 2023 ”។

លោក Pham Minh Chinh នាយករដ្ឋមន្ត្រីវៀតណាម បានអញ្ជើញចូលរួម និងថ្លែងក្នុងកម្មវិធី (រូប​ថត៖ vnanet.vn)

តាមលោកនាយករដ្ឋមន្ត្រី ព្រឹត្តិការណ៍ដ៏សំខាន់នេះបង្ហាញសាររបស់រដ្ឋាភិបាលក្នុងការជម្រុញការចាប់ផ្តើមធ្វើ​អាជីវកម្ម នវានុវត្តន៍ ឲ្យបានយ៉ាង​ទូលំទូលាយ សំដៅធ្វើឱ្យវៀតណាមក្លាយជាមជ្ឈមណ្ឌលនវានុវត្តន៍ក្នុងតំបន់ និងពិភពលោក។

ដើម្បីឲ្យការចាប់ផ្ដើមធ្វើ​អាជីវកម្ម នវានុវត្តន៍ មានប្រសិទ្ធភាព និងជាក់ស្តែងនោះ លោកនាយករដ្ឋមន្ត្រីបានស្នើឱ្យក្រសួង ស្ថាប័ន សាខា មូលដ្ឋាន និងធុរកិច្ច ត្រូវមានយុទ្ធសាស្ត្រ និងអនុវត្តឲ្យមានភាពជាក់លាក់។ លោកនាយករដ្ឋមន្ត្រីបានសង្កត់ធ្ងន់ថា ទស្សនៈរបស់រដ្ឋាភិបាលគឺយកមនុស្ស និងអង្គភាពអាជីវកម្មជាមជ្ឈភាព ជាស្នូល ជាគោលដៅ ជាកម្លាំងចលករ និងជាធនធាន នៃការចាប់ផ្តើមធ្វើអាជីវកម្ម នវានុវត្តន៍។

លោក Pham Minh Chinh នាយករដ្ឋមន្ត្រី រួមជាមួយអ្នកឈ្នះរង្វាន់ នៃការប្រលងស្វែងរកអ្នកមានទេព្យកោសលក្នុងការចាប់ផ្តើមធ្វើ​អាជីវកម្ម នវានុវត្តន៍ ថ្នាក់ជាតិ (រូបថត៖vnanet.vn)

លោកនាយករដ្ឋមន្ត្រីបានមានប្រសាសន៍ថា នាពេលខាងមុខ ចាំបាច់ត្រូវផ្តោតលើអាទិភាពសំខាន់ៗចំនួនបួនគឺ៖ ការចាប់ផ្ដើមធ្វើអាជីវកម្ម នវានុវត្តន៍លើបច្ចេកវិទ្យាព័ត៌មាន សន្តិសុខបណ្តាញ សេវាឌីជីថល ការចាប់ផ្តើមធ្វើអាជីវកម្ម នវានុវត្តន៍លើបច្ចេកវិទ្យាវេជ្ជសាស្រ្ត និងការអប់រំ ការចាប់ផ្តើមធ្វើអាជីវកម្ម នវានុវត្តន៍លើបច្ចេកវិទ្យាបរិស្ថាន និងថាមពល ការចាប់ផ្តើមធ្វើអាជីវកម្ម នវានុវត្តន៍លើការអភិវឌ្ឍសេដ្ឋកិច្ចកសិកម្មបច្ចេកវិទ្យាខ្ពស់។

លោកនាយករដ្ឋមន្ត្រី បានអំពាវនាវដល់សហគមន៍ចាប់ផ្តើមធ្វើអាជីវកម្ម នវានុវត្តន៍ ជាពិសេសយុវជនជំនាន់ក្រោយ បន្តលើកកម្ពស់ភាពក្លាហាន និងភាពវៃឆ្លាតរបស់ជនជាតិវៀតណាម ហ៊ានប្រឈមមុខនឹងការលំបាក និងបញ្ហាប្រឈម និងមិនខ្លាចបរាជ័យ មានកម្លាំងចិត្ត និងជំនឿមុតមាំ ហ៊ានគិត ហ៊ានធ្វើ៕

បកប្រែដោយ Thanh Cong