អង្គភាពអាជីវកម្មអឺរ៉ុប មានសុទិដ្ឋិនិយមអំពីបរិយាកាសធុរកិច្ចនៅវៀតណាម
កប.អនឡាញ - នាថ្ងៃទី ៣០ ខែមេសា សមាគមធុរកិច្ចអឺរ៉ុបប្រចាំវៀតណាម (EuroCham) បានប្រកាសសន្ទស្សន៍បរិយាកាសធុរកិច្ច EuroCham (Business Climate Index-BCI) នៃត្រីមាសទី ១ ឆ្នាំ ២០២១។
ថ្នាក់ដឹកនាំអង្គភាពអាជីវកម្មអឺរ៉ុប បានចាប់ផ្តើមឆ្នាំ ២០២១ ដោយក្តីជឿជាក់ និងមានសុទិដ្ឋិនិយមអំពីបរិយាកាសពាណិជ្ជកម្ម និងការវិនិយោគនៅវៀតណាម។
ជាក់ស្តែង សន្ទស្សន៍ BCI នៅក្នុងត្រីមាសទី ១ ឆ្នាំ ២០២១ សម្រេចបាន ៧៣.៩ ពិន្ទុ ជាពិន្ទុខ្ពស់បំផុតតដែលត្រូវបានកត់សំគាល់ចាប់តាំងពីត្រីមាសទី ៣ ឆ្នាំ ២០១៩ មុនពេលជំងឺរាតត្បាត Covid-19 ប៉ះពាល់ដល់ប្រព័ន្ធពាណិជ្ជកម្ម និងការវិនិយោគសកល។ លទ្ធផលនៃការស្ទង់មតិ BCI ក៏បានបង្ហាញពីសុទិដ្ឋិនិយមអំពីបរិយាកាសធុរកិច្ចនៅតែរក្សាបាន ពោលគឹកើនឡើង ៤៧ ពិន្ទុ ក្នុងរយៈពេល ១២ ខែកន្លងមក។
អង្គភាពអាជីវកម្មអឺរ៉ុបដែលចូលរួមក្នុងការស្ទង់មតិនេះ អំពីយថាទស្សន៍ធុរកិច្ចនៅវៀតណាម ក៏មានសុទិដ្ឋិនិយមអំពីទស្សនវិស័យអាជីវកម្មរបស់ក្រុមហ៊ុនក្នុងឆ្នាំនេះនៅវៀតណាម។ ក្នុងនោះ សហគ្រាសជាង ២/៣ ដែលចូលរួមក្នុងការស្ទង់មតិនេះ (មានប្រមាណ ៦៨%) បានព្យាករណ៍ថា ការបញ្ជាទិញនិងចំណូលរបស់ពួកគេនឹងត្រូវបានរក្សា ឬកើនឡើងក្នុងរយៈពេល ៣ ខែទៀត ពោលគឺកើនឡើង ២៥% បើប្រៀបធៀបនឹងត្រីមាសទី ៤ ឆ្នាំ ២០២០៕
បកប្រែដោយ Huyen Trang