វេទិការដ្ឋាភិបាល-មិនមែនរដ្ឋាភិបាលអាស៊ានស្ដីពីសុខុមាលភាពសង្គម និងការអភិវឌ្ឍ
កប.អនឡាញ - នាថ្ងៃទី២១ កញ្ញា វេទិការដ្ឋាភិបាល-មិនមែនរដ្ឋាភិបាលអាស៊ានស្ដីពីសុខុមាលភាពសង្គម និងការអភិវឌ្ឍ លើកទី១៥ ក្រោមមូលបទ “បង្កើនលទ្ធភាពស្ដារឡើងវិញ និងសាមគ្គីភាពនៃគ្រួសារ៖ ជំនះពុះពារស្ថានភាពលំបាក ឆ្លើយតបនឹងស្ថានភាពប្រក្រតីថ្មី” បានប្រារព្ធធ្វើឡើងតាមប្រព័ន្ធវីដេអូ។ វេទិកានេះមានការចូលរួមពីតំណាងនៃអង្គការមិនមែនរដ្ឋាភិបាលមកពីប្រទេសសមាជិកអាស៊ាន លេខាធិការដ្ឋានអាស៊ាន; អង្គការក្នុងតំបន់ និងអន្តរជាតិ។
នេះគឺជាព្រឹត្តិការណ៍ប្រចាំឆ្នាំដែលបានប្រារព្ធឡើងនៅក្នុងក្របខ័ណ្ឌនៃកិច្ចប្រជុំមន្រ្តីជាន់ខ្ពស់អាស៊ានស្តីពីសុខុមាលភាពសង្គម និងការអភិវឌ្ឍ (SOMSWD)។
    |
 |
|
ទិដ្ឋភាពនៃកិច្ចប្រជុំ (រូបថត៖ vnanet.vn) |
នៅឯវេទិកា ប្រតិភូទាំងឡាយបានផ្លាស់ប្ដូរមតិ ហើយពិភាក្សាអំពីបញ្ហានានាដែលទាក់ទងនឹងគ្រួសារ ជាពិសេសគឺបញ្ហាដែលកើតមានឡើងក្នុងបរិបទដែលកើតមានជម្ងឺរាតត្បាត Covid-19។ ប្រតិភូទាំងឡាយបានចង្អុលបង្ហាញយ៉ាងច្បាស់ថា ជម្ងឺរាតត្បាត Covid-19 បានជះឥទ្ធិពលយ៉ាងខ្លាំងទៅលើគ្រួសារងាយរងគ្រោះដូចជា គ្រួសារជនជាតិភាគតិច គ្រួសារដែលមានពលករក្រៅផ្លូវការ និងជនអន្តោប្រវេសន៍។ ការណ៏នោះបានបណ្ដាលឲ្យភាពក្រីក្រជាបណ្ដោះអាសន្នកើនឡើង។ ជម្ងឺរាតត្បាតក៏បានប៉ះពាល់ដល់គុណភាព ហើយរារាំងលទ្ធភាពទទួលបានសេវាកម្មសង្គមចាំបាច់នានាដូចជា សេវាកម្មថែទាំសុខភាពសម្រាប់នារីមានផ្ទៃពោះនិងកូនៗ សេវាកម្មអប់រំ និងសេវាកម្មផ្ដល់ជំនួយសង្គមជាដើម។
នៅឯវេទិកា ប្រតិភូក៏បានចែករំលែក និងឧទ្ទេសនាមរឿងរ៉ាវជាគំរូនានារបស់បណ្តាប្រទេសជាសមាជិកអាស៊ានស្ដីពីទំនាក់ទំនងក្នុងគ្រួសារ និងចំណងសាមគ្គីភាពក្នុងការប្រយុទ្ធប្រឆាំងនឹងជម្ងឺ Covid-19 ព្រមទាំងដាក់ចេញវិធានការនានាសម្រាប់ការការពារគ្រួសារក្នុងតំបន់អាស៊ានទាំងមូល។
បកប្រែដោយ Duy Hoan