លោក Tran Thanh Man ប្រធានរដ្ឋសភា ទទួលជួបប្រធានក្រុមប្រឹក្សាសហព័ន្ធរុស្ស៊ី

លោក Tran Thanh Man ប្រធានរដ្ឋសភា បានអះអាងថា រុស្ស៊ីគឺជាដៃគូដែលអាចទុកចិត្តបាន ហើយចាត់ទុកការអភិវឌ្ឍទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយជាមួយរុស្ស៊ីជាអាទិភាពចម្បងមួយនៅក្នុងគោលនយោបាយការបរទេសរបស់វៀតណាម។

លោក Tran Thanh Man ប្រធានរដ្ឋសភាវៀតណាម និងលោកស្រី Valentina Matviyenko ប្រធានក្រុមប្រឹក្សាសហព័ន្ធរុស្ស៊ី (រូបថត៖ vnanet.vn)

នាពេលខាងមុខ លោក Tran Thanh Man ប្រធានរដ្ឋសភា បានស្នើឱ្យភាគីទាំងពីរជំរុញកិច្ចសហប្រតិបត្តិការនយោបាយ និងការទូត កិច្ចសហប្រតិបត្តិការសភា សម្របសម្រួលការរៀបចំដំណើរទស្សនកិច្ចទៅកាន់ប្រទេសវៀតណាមដោយជោគជ័យរបស់ប្រធានព្រឹទ្ធសភារុស្ស៊ី និងដំណើរទស្សនកិច្ចរបស់លោក Tran Thanh Man ប្រធានរដ្ឋសភា ទៅកាន់ប្រទេសរុស្ស៊ី ដើម្បីធ្វើជាសហអធិបតីនៃសម័យប្រជុំលើកទី៥ នៃគណៈកម្មាធិការសហប្រតិបត្តិការអន្តរសភានៅឆ្នាំនេះ។ លោក Tran Thanh Man ប្រធានរដ្ឋសភា បានសម្តែងទំនុកចិត្តថា រដ្ឋសភា និងសមាជិកសភានៃប្រទេសទាំងពីរ អាចដើរតួនាទីដោយផ្ទាល់ក្នុងការជំរុញ និងអនុវត្តកិច្ចសហប្រតិបត្តិការលើវិស័យដូចជា ការជួបប្រាស្រ័យរវាងប្រជាជន និងប្រជាជន ទេសចរណ៍ សកម្មភាពចងមេត្រីភាព និងកិច្ចសហប្រតិបត្តិការតភ្ជាប់មូលដ្ឋាននានារបស់វៀតណាម និងរុស្ស៊ី។

ទិដ្ឋភាពនៃជំនួប (រូបថត៖ vnanet.vn)

រីឯលោកស្រី Valentina Matviyenko ប្រធានក្រុមប្រឹក្សាសហព័ន្ធរុស្ស៊ី បានវាយតម្លៃថា វៀតណាមជាដៃគូដ៏គួរឱ្យទុកចិត្តបំផុតរបស់រុស្ស៊ីនៅអាស៊ីអាគ្នេយ៍។ លោកស្រីបានស្នើឱ្យភាគីទាំងពីរលើកកម្ពស់កិច្ចសហប្រតិបត្តិការក្នុងវិស័យថាមពល - ប្រេង និងឧស្ម័ន ថាមពលនុយក្លេអ៊ែរ ការជួបប្រាស្រ័យរវាងប្រជាជន និងប្រជាជន ការអប់រំ និងបណ្តុះបណ្តាល ទេសចរណ៍ និងការផ្លាស់ប្តូរវប្បធម៌។ល។ លោកស្រី Valentina Matviyenko បានបញ្ជាក់ថា មូលដ្ឋានជាច្រើនរបស់រុស្ស៊ីត្រៀមខ្លួនជាស្រេច ធ្វើសកម្មភាពចងមេត្រីភាព និងសហប្រតិបត្តិការជាមួយមូលដ្ឋាននានារបស់វៀតណាម៕

បកប្រែដោយ Huyen Trang