សារព័ត៌មានប្រេស៊ីលផ្សព្វផ្សាយព័ត៌មានជាច្រើនអំពីសកម្មភាពរបស់លោក Pham Minh Chinh នាយករដ្ឋមន្ត្រីវៀតណាម នៅទីក្រុង Rio de Janeiro
កប.អនឡាញ - នាថ្ងៃទី ៥ ខែកក្កដា សារព័ត៌មានធំៗរបស់ប្រេស៊ីលបានផ្សព្វផ្សាយព័ត៌មានជាច្រើនអំពីកិច្ចពិភាក្សាការងាររវាង លោក Pham Minh Chinh នាយករដ្ឋមន្ត្រីវៀតណាម ជាមួយលោក Luiz Inacio Lula da Silva ប្រធានាធិបតីប្រេស៊ីល នៅទីក្រុង Rio de Janeiro ក្នុងក្របខ័ណ្ឌនៃដំណើរទស្សនកិច្ចទៅកាន់ប្រទេសអាមេរិកខាងត្បូង អញ្ជើញចូលរួមកិច្ចប្រជុំកំពូល BRICS ឆ្នាំ២០២៥។
កាសែត Planalto របស់រដ្ឋាភិបាលប្រេស៊ីល បានផ្សព្វផ្សាយព័ត៌មានថា ក្នុងជំនួបពិភាក្សានេះ លោក Pham Minh Chinh នាយករដ្ឋមន្ត្រីវៀតណាម និងលោក Lula da Silva ប្រធានាធិបតីប្រេស៊ីល បានសម្តែងនូវសេចក្តីរីករាយចំពោះទំនាក់ទំនងទ្វេភាគីដ៏ល្អ ក៏ដូចជាវឌ្ឍនភាពដែលសម្រេចបាន ចាប់តាំងពីដំណើរទស្សនកិច្ចផ្លូវរដ្ឋរបស់លោក Lula ប្រធានាធិបតីប្រេស៊ីល ទៅកាន់ទីក្រុងហាណូយកាលពីខែមេសាកន្លងទៅ។
កាសែតរបស់រដ្ឋាភិបាលប្រេស៊ីលក៏បានគូសបញ្ជាក់ផងដែរថា ភាគីទាំងពីរបានស្វាគមន៍ចំពោះការសម្រេចបានការនាំចេញសាច់គោប្រេស៊ីលទៅកាន់ប្រទេសវៀតណាម និងការនាំចេញត្រីទីឡាវៀតណាម ទៅកាន់ប្រទេសប្រេស៊ីល។ លោក Pham Minh Chinh នាយករដ្ឋមន្ត្រីបានសង្កត់ធ្ងន់លើសារៈសំខាន់នៃការវិនិយោគរបស់ប្រេស៊ីលនៅវៀតណាម ជាពិសេសលើវិស័យកែច្នៃផលិតផលអាហារមានប្រភពពីប្រូតេអ៊ីនសត្វ។
    |
 |
|
ទស្សនាវដ្ដី Intertelas បានផ្សព្វផ្សាយព័ត៌មានអំពីកិច្ចពិភាក្សារវាងលោក Pham Minh Chinh នាយករដ្ឋមន្ត្រីវៀតណាម និងលោក Lula da Silva ប្រធានាធិបតីប្រេស៊ីល (រូបថត៖ vnanet.vn) |
លោក Pham Minh Chinh នាយករដ្ឋមន្ត្រីវៀតណាម និង លោក Lula da Silva ប្រធានាធិបតីប្រេស៊ីលបានសង្កត់ធ្ងន់លើសក្តានុពលនៃកិច្ចសហប្រតិបត្តិការរវាងប្រទេសទាំងពីរក្នុងវិស័យកសិកម្ម ការពារជាតិ កីឡា ការរុករករ៉ែ ជីវឥន្ធនៈ និងបរិស្ថាន។ លោក Lula ប្រធានាធិបតីប្រេស៊ីល បានអះអាងសារជាថ្មីនូវបំណងរបស់ប្រេស៊ីលក្នុងតួនាទីជាប្រធានប្តូរវេន Mercosur ស្តីពីការចាប់ផ្តើមការចរចាលើកិច្ចព្រមព្រៀងពាណិជ្ជកម្មជាមួយវៀតណាម។
យោងតាមកាសែត Planalto លោក Pham Minh Chinh នាយករដ្ឋមន្ត្រីវៀតណាម និង លោក Lula da Silva ប្រធានាធិបតីប្រេស៊ីល បានអះអាងពីសារៈសំខាន់នៃការពង្រឹងសមាហរណកម្ម និងការបំពេញបន្ថែមគ្នារវាងខឿនសេដ្ឋកិច្ចទាំងពីរ។ ភាគីទាំងពីរបានសន្យាថា នឹងរៀបចំគណៈប្រតិភូធុរកិច្ចយ៉ាងឆាប់រហ័ស ដើម្បីពង្រីកឱកាសសហប្រតិបត្តិការពាណិជ្ជកម្ម និងវិនិយោគទ្វេភាគី។
|
|
 |
|
ក្នុងជំនួបនេះភាគីទាំងពីរបានចុះហត្ថលេខាលើអនុស្សរណៈយោគយល់គ្នាស្តីពីកិច្ចសហប្រតិបត្តិការក្នុងវិស័យវិទ្យាសាស្ត្រ បច្ចេកវិទ្យា នវានុវត្តន៍ និងការធ្វើបរិវត្តកម្មឌីជីថល (រូបថត៖ vnanet.vn) |
លោកនាយករដ្ឋមន្ត្រីវៀតណាមបានជូនពរប្រទេសប្រេស៊ីលទទួលបានជោគជ័យនូវការរៀបចំនៃសន្និសីទលើកទី ៣០ នៃភាគីនៃអនុសញ្ញាក្របខ័ណ្ឌអង្គការសហប្រជាជាតិស្តីពីការប្រែប្រួលអាកាសធាតុ (COP30) ហើយបានអះអាងថា វៀតណាមនឹងចូលរួមព្រឹត្តិការណ៍នេះ ដែលគ្រោងនឹងប្រព្រឹត្តទៅនៅទីក្រុង Belém រដ្ឋ Pará នាខែវិច្ឆិកាខាងមុខ។
នាថ្ងៃដដែលនោះ កាសែត diplomaciabusiness កាសែត poder 360 ទស្សនាវដ្ដី Intertelas ទស្សនាវដ្ដី conexaoto និងគេហទំព័រជាច្រើនទៀត ក៏បានផ្សព្វផ្សាយព័ត៌មានអំពីជំនួបពិភាក្សាការងាររវាង លោក Pham Minh Chinh នាយករដ្ឋមន្ត្រីវៀតណាម និង លោក Lula da Silva ប្រធានាធិបតីប្រេស៊ីលផងដែរ៕
បកប្រែដោយ Duy Hoan