នេះជាដំណើរទស្សនកិច្ចលើកដំបូងនៅវៀតណាមរបស់លោក Miguel Díaz-Canel Bermúdez ក្នុងតួនាទីជាលេខាទី១ និងជាប្រធានរដ្ឋនៃសាធារណរដ្ឋគុយបា។ ដំណើរទស្សនកិច្ចនេះមានអត្ថន័យជាប្រវត្តិសាស្ត្រ ដែលនឹងប្រព្រឹត្តទៅក្នុងបរិបទប្រទេសទាំងពីរប្រារព្ធខួបលើកទី ៦៥ នៃការបង្កើតទំនាក់ទំនងការទូត ជាឱកាសសម្រាប់ភាគីទាំងពីរផ្លាស់ប្តូរទិសដៅសំខាន់ៗ និងវិធានការជាក់លាក់ ដើម្បីនាំទំនាក់ទំនង វៀតណាម-គុយបា ឱ្យកាន់តែស៊ីជម្រៅ និងប្រកបដោយប្រសិទ្ធភាពថែមទៀត។
ក្នុងប្រវត្តិសាស្ត្រពិភពលោកសម័យកាលនេះ កម្រមានទំនាក់ទំនងពិសេសដូចទំនាក់ទំនង វៀតណាម-គុយបា។ ការគាំទ្រ និងការជួយឧបត្ថម្ភគ្នាទៅវិញទៅមករវាងប្រទេសទាំងពីរ និងប្រជាជាតិទាំងពីរបានក្លាយជាគំរូនៃចំណងមិត្តភាពពិសេស ស្មោះត្រង់ ស្មោះស្ម័គ្រ និងនិរន្តរភាព ដោយជំនេះពុះពារលើគ្រប់ព្រំដែនភូមិសាស្ត្រ ព្រមទាំងបញ្ហាប្រឈមនានានៃសម័យកាល។
ទោះបីនៅឆ្ងាយពីគ្នាពាក់កណ្តាលពិភពលោកក៏ដោយ ក៏វៀតណាម និងគុយបាតែងតែរួបរួម ប្រកៀកស្មាគ្នា ជួយគ្នាក្នុងចលនាតស៊ូរំដោះជាតិ បង្រួបបង្រួមប្រទេស ការពារសមិទ្ធិផលនៃបដិវត្តន៍ និងបុព្វហេតុកសាង និងការពារមាតុភូមិនៃប្រទេសនីមួយៗ។ ក្នុងអំឡុងសង្រ្គាមតស៊ូប្រឆាំងអាមេរិកដើម្បីសង្គ្រោះប្រទេស គុយបាបាននាំមុខគេក្នុងចលនាប្រជាជនពិភពលោកដើម្បីរួបរួមគាំទ្រការតស៊ូរបស់វៀតណាម ដោយផ្តល់ការគាំទ្រ និងជំនួយដ៏មានតម្លៃដល់វៀតណាម។ ក្រោយឆ្នាំ១៩៧៥ គុយបាបានបន្តរក្សាកិច្ចសហប្រតិបត្តិការ និងជំនួយ ប្រកាន់ខ្ជាប់យ៉ាងខ្ជាប់ខ្ជួននូវគោលការណ៍បដិវត្តន៍របស់ខ្លួន និងគាំទ្របុព្វហេតុកសាង និងការពារមាតុភូមិរបស់វៀតណាម។
ជាការឆ្លើយតប វៀតណាមតែងតែផ្តល់ឲ្យគុយបានូវសាមគ្គីភាព កិច្ចសហប្រតិបត្តិការជាភាតរភាព ភាពស្មោះត្រង់ ហើយចាត់ទុកសាមគ្គីភាព និងជំនួយដល់គុយបាជាកាតព្វកិច្ចដែលផ្តើមចេញពីមនសិការ ដែលជាកាតព្វកិច្ចដែលកើតចេញពីបេះដូង និងមនោសញ្ចេតនាអន្តរជាតិសុទ្ធសាធនៃប្រពៃណីរបស់ប្រទេសជាតិ។ វៀតណាមចែករំលែកបទពិសោធន៍ជាច្រើនជាមួយគុយបា ដូចជាគោលលទ្ធិនៃ “សង្គ្រាមប្រជាជនការពារមាតុភូមិប្រឆាំងនឹងការឈ្លានពាន” ជួយគុយបាយកឈ្នះលើគ្រាលំបាក សហការជួយគុយបាផលិតស្រូវ និងអភិវឌ្ឍស្បៀងអាហារ បទពិសោធន៍ក្នុងការកសាង អភិវឌ្ឍសេដ្ឋកិច្ចសង្គម និងធ្វើសមាហរណកម្មជាមួយពិភពលោក។ ថ្នាក់ដឹកនាំនៃប្រទេសទាំងពីរបានសង្កត់ធ្ងន់ម្តងហើយម្តងទៀតថាទំនាក់ទំនងរវាងប្រទេសទាំងពីរគឺ "គំរូរវាងប្រទេសសង្គមនិយមទាំងពីរ", "ទំនាក់ទំនងគណបក្សគឺជាមូលដ្ឋានគ្រឹះ", "និមិត្តសញ្ញានៃសម័យកាល"។
ក្នុងប៉ុន្មានឆ្នាំថ្មីៗនេះ ទំនាក់ទំនងសាមគ្គីភាពជាប្រពៃណី ការគាំទ្រ និងកិច្ចសហប្រតិបត្តិការលើគ្រប់ជ្រុងជ្រោយ វៀតណាម-គុយបា ត្រូវបានយកចិត្តទុកដាក់ជានិច្ច ពង្រឹង ជំរុញ និងអភិវឌ្ឍលើវិស័យជាច្រើន។ ភាគីទាំងពីរបានរក្សាការផ្លាស់ប្តូរគណៈប្រតិភូ និងការជួបជុំថ្នាក់ជាន់ខ្ពស់ រួមទាំងដំណើរទស្សនកិច្ចផ្លូវរដ្ឋទៅកាន់គុយបារបស់លោក To Lam អគ្គលេខាបក្ស និងជាប្រធានរដ្ឋ នៅខែកញ្ញា ឆ្នាំ២០២៤ ដែលបានបង្កើតព្រឹត្តិការណ៍ប្រវត្តិសាស្ត្រក្នុងទំនាក់ទំនងរវាងប្រទេសទាំងពីរ រួមចំណែកពង្រឹងទំនុកចិត្តនយោបាយ ពង្រឹងកិច្ចសហប្រតិបត្តិការជាក់ស្តែង និងបង្កើតកម្លាំងចលករថ្មីសម្រាប់គម្រោងសហប្រតិបត្តិការរវាងប្រទេសទាំងពីរ។
ទំនាក់ទំនងសហប្រតិបត្តិការសេដ្ឋកិច្ច ពាណិជ្ជកម្ម បានមានជំហានដ៏សំខាន់ជាច្រើន។ ក្នុងឆ្នាំ២០២៤ ទំហំពាណិជ្ជកម្មទ្វេភាគីសម្រេចបានជិត ២០០ លានដុល្លារអាមេរិក។ វៀតណាមគឺជាវិនិយោគិនធំជាងគេ និងជាដៃគូពាណិជ្ជកម្មធំទីពីររបស់គុយបានៅអាស៊ី។ ជាពិសេស កិច្ចព្រមព្រៀងពាណិជ្ជកម្មវៀតណាម-គុយបា (បានចុះហត្ថលេខានៅឆ្នាំ ២០១៨ ចូលជាធរមានក្នុងឆ្នាំ ២០២០) គឺជាមូលដ្ឋានច្បាប់ដ៏សំខាន់សម្រាប់អង្គភាពអាជីវកម្មនៃភាគីទាំងពីរ ជំរុញកិច្ចសហប្រតិបត្តិការ ខិតខំនាំទំហំពាណិជ្ជកម្មទ្វេភាគីឡើងដល់ ៥០០ លានដុល្លារអាមេរិកនាពេលខាងមុខ។
ស្តីពីវិស័យសុខាភិបាល ភាគីទាំងពីរបានមានកិច្ចសហប្រតិបត្តិការប្រកបដោយប្រសិទ្ធភាព ចាប់ពីការចាត់បញ្ជូនអ្នកជំនាញផ្នែកវេជ្ជសាស្ត្រ ការបណ្តុះបណ្តាលធនធានមនុស្ស ការផ្ទេរបច្ចេកវិទ្យា ដល់ការសម្របសម្រួលស្រាវជ្រាវ និងការទប់ស្កាត់ និងការប្រយុទ្ធប្រឆាំងនឹងជំងឺរាតត្បាត។ ក្នុងទំនាក់ទំនងជារួមរវាងប្រទេសទាំងពីរ ទំនាក់ទំនងសហប្រតិបត្តិការលើវិស័យការពារជាតិគឺជាសសរស្តម្ភដ៏សំខាន់មួយជាមួយនឹងការផ្លាស់ប្តូរគណៈប្រតិភូ កិច្ចសហប្រតិបត្តិការលើវិស័យបណ្តុះបណ្តាល ឧស្សាហកម្មការពារជាតិ ការងារបក្ស ការងារនយោបាយ។ល។
ក្រៅពីនោះ វៀតណាមនិងគុយបាបានអនុវត្តជាប្រចាំ និងប្រកបដោយប្រសិទ្ធភាពនូវយន្តការពិគ្រោះយោបល់ និងកិច្ចសហប្រតិបត្តិការដូចជា៖ សិក្ខាសាលាទ្រឹស្តីរវាងបក្សទាំងពីរ គណៈកម្មាធិការអន្តររដ្ឋាភិបាល វេទិកាអន្តរសភាវៀតណាម-គុយបា ពិគ្រោះយោបល់នយោបាយរវាងក្រសួងការបរទេសទាំងពីរ។ល។ វៀតណាមបន្តគាំទ្រយ៉ាងសកម្មចំពោះគុយបាក្នុងវិស័យសន្តិសុខស្បៀងតាមរយៈការផ្តល់ឥណទានអនុគ្រោះសម្រាប់គុយបាទិញអង្ករវៀតណាម អនុវត្តគម្រោងសហប្រតិបត្តិការលើការបណ្តុះបណ្តាលផលិតកម្មស្រូវ ពូជពោតកូនកាត់ និងជលផលជាដើម។ ភាគីទាំងពីរបន្តសម្របសម្រួលយ៉ាងជិតស្និទ្ធ និងគាំទ្រគ្នាទៅវិញទៅមក នៅអង្គការអន្តរជាតិ និងវេទិកាពហុភាគី ជាពិសេសនៅអង្គការសហប្រជាជាតិ។
ក្នុងឆ្នាំមិត្តភាព វៀតណាម-គុយបា ឆ្នាំ២០២៥ ប្រទេសទាំងពីរយកចិត្តទុកដាក់យ៉ាងខ្លាំងចំពោះទំនាក់ទំនងទ្វេភាគី ហើយអនុវត្តដោយផ្តោតសំខាន់តាមគោលការណ៍រួមដំណើរ សហប្រតិបត្តិការ និងអភិវឌ្ឍរួមគ្នា ហើយដំបូងសម្រេចបានលទ្ធផលសំខាន់ៗ ជាពិសេសក្នុងការអនុវត្តគំរូសហប្រតិបត្តិការថ្មីលើវិស័យយុទ្ធសាស្ត្រដូចជា៖ កសិកម្ម ថាមពល ឱសថ និងជីវបច្ចេកវិទ្យា។
ជាមួយនឹងមនោសញ្ចេតនាបរិសុទ្ធ ស្មោះស្ម័គ្រ ដោយមានទំនុកចិត្តពិសេស និងស្មារតីនៃសាមគ្គីភាព និងការគាំទ្រគ្នាទៅវិញទៅមកនោះ អាចបញ្ជាក់យ៉ាងមុតមាំថា ទំនាក់ទំនងពិសេស វៀតណាម-គុយបា កំពុងត្រូវបានពូនជ្រំ ពង្រឹង និងអភិវឌ្ឍលើគ្រប់ជ្រុងជ្រោយ ដើម្បីផលប្រយោជន៍របស់ប្រជាជននៃប្រទេសទាំងពីរ ដើម្បីសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍក្នុងតំបន់ និងនៅលើពិភពលោក។
យើងជឿជាក់យ៉ាងមុតមាំថា ដំណើរទស្សនកិច្ចផ្លូវរដ្ឋនៅវៀតណាមរបស់លោក Miguel Díaz-Canel Bermúdez លេខាទីមួយ ប្រធានរដ្ឋគុយបា និងលោកជំទាវ នឹងទទួលបានជោគជ័យយ៉ាងត្រចះត្រចង់ រួមចំណែកពូនជ្រំទំនាក់ទំនង វៀតណាម-គុយបាឡើងកម្រិតកំពស់ថ្មីមួយ៕
បកប្រែដោយ Huyen Trang