លោក Olivier Brochet ឯកអគ្គរដ្ឋទូតបារាំងប្រចាំនៅវៀតណាម៖ បារាំងឲ្យតម្លៃទំនាក់ទំនងពិសេស និងរឹងមាំជាមួយវៀតណាម

យោងតាម លោក Olivier Brochet ឯកអគ្គរដ្ឋទូត ដំណើរទស្សនកិច្ចរបស់ លោក Emmanuel Macron ប្រធានាធិបតី នៅវៀតណាមគឺជាព្រឹត្តិការណ៍សំខាន់ក្នុងទំនាក់ទំនងទ្វេភាគី។ ប្រទេសវៀតណាមគឺជាកន្លែងដំបូងនៃដំណើរទស្សនកិច្ចទៅកាន់ប្រទេសចំនួនបីរបស់ Emmanuel Macron ប្រធានាធិបតី នៅតំបន់អាស៊ីអាគ្នេយ៍ ជាមួយនឹងប្រទេសបន្តគឺឥណ្ឌូនេស៊ី និងសិង្ហបុរី។ ដំណើរទស្សនកិច្ច​របស់ លោក Emmanuel Macron ប្រធានាធិបតី ទៅកាន់ប្រទេសអាស៊ីអាគ្នេយ៍ចំនួនបីគឺជាផ្នែកមួយនៃការអនុវត្តយុទ្ធសាស្ត្រឥណ្ឌូប៉ាស៊ីហ្វិករបស់បារាំងរហូតដល់ឆ្នាំ ២០២៨ ដែលបង្ហាញពីបំណងប្រាថ្នារបស់បារាំងក្នុងការលើកកម្ពស់ការប្តេជ្ញាចិត្តរបស់ខ្លួនចំពោះទំនាក់ទំនងកាន់តែរឹងមាំជាមួយដៃគូដើម្បីស្ថិរភាព កិច្ចសហប្រតិបត្តិការ និងការអភិវឌ្ឍក្នុងតំបន់។

លោក Olivier Brochet ឯកអគ្គរដ្ឋទូតបារាំងប្រចាំនៅវៀតណាម

ក្នុងដំណើរទស្សនកិច្ចទៅកាន់ប្រទេសអាស៊ីអាគ្នេយ៍ចំនួនបី លោក Emmanuel Macron ប្រធានាធិបតីចង់ទៅបំពេញទស្សនកិច្ចនៅវៀតណាមមុនគេ ដែលនេះបង្ហាញថា បារាំងបានវាយតម្លៃខ្ពស់ចំពោះទំនាក់ទំនងពិសេស និងរឹងមាំជាមួយវៀតណាម។ ក្នុងរយៈពេលកន្លះសតវត្សកន្លងទៅនេះ ទំនាក់ទំនងបារាំង-វៀតណាមបានបន្តអភិវឌ្ឍន៍យ៉ាងល្អប្រសើរ ដោយកិច្ចសហប្រតិបត្តិការទ្វេភាគីបានពង្រីកលើវិស័យជាច្រើន។ ភាគីទាំងពីរបានបង្កើនទំនាក់ទំនងទៅជាភាពជាដៃគូយុទ្ធសាស្ត្រក្នុងឆ្នាំ ២០១៣ ហើយនៅខែតុលា ឆ្នាំ ២០២៤ក្នុងអំឡុងពេលដំណើរទស្សនកិច្ចជាផ្លូវការនៅប្រទេសបារាំងរបស់លោក To Lam អគ្គលេខាបក្ស និងជាប្រធានរដ្ឋ ភាគីទាំងពីរបានដំឡើងទំនាក់ទំនងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ។ ដំណើរទស្សនកិច្ចរបស់លោក Emmanuel Macron ប្រធានាធិបតីនៅវៀតណាមជាថ្មីម្តងទៀតបានបញ្ជាក់ពីការអភិវឌ្ឍន៍ដ៏រឹងមាំក្នុងទំនាក់ទំនងទ្វេភាគី បង្ហាញពីបំណងប្រាថ្នារបស់ភាគីទាំងពីរក្នុងការនាំយកទំនាក់ទំនងទ្វេភាគីឱ្យកាន់តែស៊ីជម្រៅ ជាក់ស្តែង និងមានប្រសិទ្ធភាព។ ជាពិសេស បារាំងសង្ឃឹមថានឹងត្រូវបានវៀតណាម​ចាត់ទុកជាដៃគូដែលជឿទុកចិត្ត ហើយអាចរួមដំណើរជាមួយវៀតណាមលើមាគ៌ាអភិវឌ្ឍន៍។

លោកឯកអគ្គរដ្ឋទូត Olivier Brochet បានសម្តែងនូវជំនឿថា ដំណើរទស្សនកិច្ចរបស់ប្រធានាធិបតីបារាំងនៅវៀតណាមលើកនេះ នឹងបើកទំព័រថ្មីនៃកិច្ចសហប្រតិបត្តិការទ្វេភាគីលើគ្រប់វិស័យ ទាំងវិស័យនយោបាយ សេដ្ឋកិច្ច ការពារជាតិ សន្តិសុខ ការអប់រំ-បណ្តុះបណ្តាល វិទ្យាសាស្ត្រ-បច្ចេកវិទ្យា វប្បធម៌ ... និងជាពិសេសជំរុញកិច្ចសហប្រតិបត្តិការទ្វេភាគី ដើម្បីរួមគ្នាឆ្លើយតបទៅនឹងបញ្ហាប្រឈមរបស់ពិភពលោក។

លោកឯកអគ្គរដ្ឋទូត Olivier Brochet ក៏បានចែករំលែកថា ក្នុងដំណើរបំពេញទស្សនកិច្ចនេះ ក្រៅពីកិច្ចប្រជុំ និងពិភាក្សាជាមួយថ្នាក់ដឹកនាំជាន់ខ្ពស់នៃបក្ស និងរដ្ឋវៀតណាម លោក Emmanuel Macron ប្រធានាធិបតី នឹងអញ្ជើញទៅជួបសំណេះសំណាលជាមួយនិស្សិតនៃសាកលវិទ្យាល័យវិទ្យាសាស្ត្រ និងបច្ចេកវិទ្យាហាណូយ និងនិស្សិតដែលកំពុងសិក្សាកម្មវិធីបណ្តុះបណ្តាលដែលឧបត្ថម្ភដោយប្រទេសបារាំង។ នៅទីនេះ លោក Emmanuel Macron ប្រធានាធិបតី គ្រោងថានឹងថ្លែងសុន្ទរកថាទៅកាន់យុវជនវៀតណាម ដោយលើកឡើងអំពីទំនាក់ទំនងសហប្រតិបត្តិការរវាងប្រទេសទាំងពីរ តួនាទីរបស់យុវជនក្នុងការជំរុញទំនាក់ទំនងទ្វេភាគី ក៏ដូចជាការគាំទ្ររបស់បារាំងសម្រាប់សកម្មភាពស្រាវជ្រាវ បណ្តុះបណ្តាល និងនវានុវត្តន៍នៅសាកលវិទ្យាល័យនានានៅវៀតណាម។

គណៈប្រតិភូអមដំណើរលោក Emmanuel Macron ប្រធានាធិបតី និងលោកជំទាវ រួមមានមន្ត្រីជាន់ខ្ពស់រដ្ឋាភិបាលបារាំងជាច្រើនរូប រួមទាំងរដ្ឋមន្ត្រីក្រសួងសេដ្ឋកិច្ច ហិរញ្ញវត្ថុ អធិបតេយ្យភាព ឧស្សាហ៍កម្ម និងឌីជីថល រដ្ឋមន្ត្រីក្រសួងកងទ័ព ... នេះក៏ជាឱកាសសម្រាប់រដ្ឋមន្ត្រីនៃប្រទេសទាំងពីរជួបជាមួយដៃគូទាំងបារាំង និងវៀតណាម ដើម្បីជំរុញគម្រោងកិច្ចសហប្រតិបត្តិការមួយចំនួនរវាងភាគីទាំងពីរលើវិស័យការពារជាតិ និងសន្តិសុខ។

លោក Olivier Brochet ឯកអគ្គរដ្ឋទូត បានសង្កត់ធ្ងន់ថា ការផ្តោតសំខាន់មួយនៃដំណើរទស្សនកិច្ចរបស់ប្រធានាធិបតីបារាំងនៅវៀតណាមលើកនេះគឺពង្រឹងកិច្ចសហប្រតិបត្តិការក្នុងការផ្លាស់ប្តូរថាមពលក៏ដូចជាលើវិស័យបញ្ញាសិប្បនិមិត្ត ការបណ្តុះបណ្តាល ការផ្ទេរបច្ចេកវិទ្យា ... យោងតាមលោកឯកអគ្គរដ្ឋទូត ព្រឹត្តិការណ៍ពិសេសមួយនឹងប្រព្រឹត្តទៅក្នុងកំឡុងដំណើរទស្សនកិច្ចរបស់លោក Emmanuel Macron ប្រធានាធិបតី ទៅកាន់ប្រទេសវៀតណាម ដែលជាកិច្ចប្រជុំកំពូលបច្ចេកវិទ្យាបារាំង-វៀតណាមឆ្នាំ ២០២៥ (FT2h7) នាថ្ងៃទី ២៧ ឧសភា នៅទីក្រុងហូជីមិញ។ ទាក់ទាញប្រតិភូប្រហែល ១៥០០ នាក់មកពីប្រទេសវៀតណាម និងបារាំង រួមទាំងអ្នកបង្កើតគោលនយោបាយ អ្នកដឹកនាំធុរកិច្ច អ្នកវិនិយោគ អ្នកចាប់ផ្តើមអាជីវកម្ម និងអ្នកជំនាញបច្ចេកវិទ្យាមកពីប្រទេសទាំងពីរ។ នេះគឺជាសកម្មភាពជាក់លាក់មួយដើម្បីសម្រេចបាននូវសេចក្តីថ្លែងការណ៍រួមស្តីពីភាពជាដៃគូយុទ្ធសាស្ត្រលើគ្រប់ជ្រុងជ្រោយរវាងវៀតណាម និងបារាំងដែលបានចុះហត្ថលេខានាថ្ងៃទី ៧ ខែតុលា ឆ្នាំ ២០២៤ ដែលសង្កត់ធ្ងន់លើអាទិភាពនៃការបង្កើនកិច្ចសហប្រតិបត្តិការលើវិស័យបច្ចេកវិទ្យាខ្ពស់ នវានុវត្តន៍ និងការផ្លាស់ប្តូរឌីជីថល។ ព្រឹត្តិការណ៍នេះត្រូវបានរំពឹងថានឹងបើកដំណាក់កាលទូលំទូលាយនៃកិច្ចសហប្រតិបត្តិការការលើវិស័យបច្ចេកវិទ្យា និងនវានុវត្តន៍រវាងវៀតណាម និងបារាំង។

លោកឯកអគ្គរដ្ឋទូត Olivier Brochet បានអះអាងថា៖ ជារួម ដំណើរទស្សនកិច្ចរបស់ លោក Emmanuel Macron ប្រធានាធិបតី នៅវៀតណាមជាថ្មីម្តងទៀតបានបញ្ជាក់ពីសារៈសំខាន់ នៃទំនាក់ទំនងបារាំង-វៀតណាម បង្ហាញពីការប្តេជ្ញាចិត្តរបស់ភាគីទាំងពីរក្នុងការកសាងភាពជាដៃគូទំនើប និងស្វាហាប់ ដោយឈរលើមូលដ្ឋាននៃការគោរពគ្នាទៅវិញទៅមក។ សំដៅដំឡើងទំនាក់ទំនងទ្វេភាគីឡើងដល់កម្រិតកម្ពស់ថ្មីមួយ។

បកប្រែដោយ Duy Hoan