លោកនាយករដ្ឋមន្ត្រី Pham Minh Chinh ទទួលជួបលោកសាស្ត្រាចារ្យ Thomas Vallely

នារសៀលថ្ងៃទី ១៥ មិនា នៅទីស្នាក់ការរដ្ឋាភិបាល (ទីក្រុងហាណូយ) ក្នុងឱកាសទទួលជួបលោកសាស្ត្រាចារ្យ Thomas Vallely ទីប្រឹក្សាជាន់ខ្ពស់អំពីវៀតណាមនៅវិទ្យាស្ថានអាស៊ីអាគ្នេយ៍នៃសាកលវិទ្យាល័យ Columbia (សហរដ្ឋអាមេរិក) លោក Pham Minh Chinh នាយករដ្ឋមន្ត្រីវៀតណាម បានស្នើឱ្យលោកសាស្ត្រាចារ្យបន្តផ្តល់យោបល់លើគោលនយោបាយ ដើម្បីវៀតណាមអាចសម្រេចបានគោលដៅកំណើន ៨% ក្នុងឆ្នាំនេះ និង ២ ខ្ទង់ក្នុងឆ្នាំបន្ទាប់ រួមទាំងរបកគំហើញក្នុងការអភិវឌ្ឍន៍វិទ្យាសាស្ត្រ និងបច្ចេកវិទ្យា ការលើកកម្ពស់ការធ្វើបរិវត្តកម្មឌីជីថល និងនវានុវត្ត ការអភិវឌ្ឍន៍សេដ្ឋកិច្ចឯកជននៅវៀតណាម។

លោកនាយករដ្ឋមន្ត្រី Pham Minh Chinh ទទួលជួបលោក Thomas J. Vallely ទីប្រឹក្សាជាន់ខ្ពស់អំពីវៀតណាមនៅវិទ្យាស្ថានអាស៊ីអាគ្នេយ៍នៃសាកលវិទ្យាល័យ Columbia (សហរដ្ឋអាមេរិក)។ រូបថត៖ Duong Giang/TTXVN

លោកនាយករដ្ឋមន្ត្រីបានស្នើឱ្យលោកសាស្ត្រាចារ្យជំរុញរដ្ឋបាលអាមេរិកទទួលស្គាល់កិច្ចខិតខំប្រឹងប្រែងរបស់វៀតណាមក្នុងការដោះស្រាយបញ្ហានានាដែលភាគីអាមេរិកចាប់អារម្មណ៍ ជាពិសេសការធ្វើឱ្យមានតុល្យភាពពាណិជ្ជកម្ម ការលុបបំបាត់ការលំបាកសម្រាប់គម្រោងវិនិយោគ និងអាជីវកម្មរបស់អាមេរិក សំដៅឆ្ពោះទៅរកទំនាក់ទំនងសេដ្ឋកិច្ចប្រកបដោយតុល្យភាព សុខដុមរមនា និងនិរន្តរភាព។ ដកវៀតណាមចេញពីបញ្ជីប្រទេសដែលមានការរឹតបន្តឹងលើការនាំចេញបច្ចេកវិទ្យាខ្ពស់ និងទទួលស្គាល់សេដ្ឋកិច្ចទីផ្សាររបស់វៀតណាម។

ទិដ្ឋភាពនៃជំនួប (រូប​ថត៖​ vnanet.vn)

លោកនាយករដ្ឋមន្ត្រីបានអះអាងនូវសារៈសំខាន់នៃ គម្រោងសាកលវិទ្យាល័យ Fulbright ក្នុងការជំរុញទំនាក់ទំនងទ្វេភាគីរវាងវៀតណាម និងសហរដ្ឋអាមេរិក ហើយភាគីវៀតណាមនឹងបង្កើតលក្ខខណ្ឌអំណោយផលបំផុតសម្រាប់សាកលវិទ្យាល័យនេះដើម្បីដំណើរការ។ លោកបានឲ្យដឹងថា គណៈកម្មាធិការប្រជាជនទីក្រុងហូជីមិញ កំពុងសម្របសម្រួលយ៉ាងសកម្មជាមួយអាជ្ញាធរ ដោះស្រាយបញ្ហាទាំងស្រុង ដើម្បីឲ្យសាលាអនុវត្តគម្រោងបានដូចការគ្រោងទុក។

រីឯខ្លួនវិញ លោកសាស្ត្រាចារ្យ Thomas Vallely បានវាយតំលៃខ្ពស់ចំពោះគោលដៅ ទិសដៅ និងយុទ្ធសាស្ត្ររបស់វៀតណាម ព្រមទាំងបានផ្តល់អនុសាសន៍មួយចំនួនដល់វៀតណាម។ លោកសាស្ត្រាចារ្យបានអះអាងថា លោកនឹងបន្តជំរុញសកម្មភាពសហប្រតិបត្តិការជាមួយវៀតណាម ជាពិសេសលើវិស័យ និងខ្លឹមសារ ដែលលើកឡើងដោយលោកនាយករដ្ឋមន្ត្រី៕

បកប្រែដោយ Duy Hoan