វៀតណាម និងសិង្ហបុរីតម្លើងទំនាក់ទំនងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ

ថ្លែងទៅកាន់អ្នកសារព័ត៌មាន លោក Lawrence Wong សម្តែងនូវសេចក្តីសោមនស្សរីករាយដោយប្រកាសថា ប្រទេសទាំងពីរបានតម្លើងទំនាក់ទំនងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ។ ក្នុងឱកាសនេះ ប្រទេសទាំងពីរក៏បានចុះហត្ថលេខាលើឯកសារជាច្រើនស្តីពីការពង្រឹងកិច្ចសហប្រតិបត្តិការ បង្ការ និងបង្រ្កាបឧក្រិដ្ឋកម្មឆ្លងដែន ពង្រឹងកិច្ចសហប្រតិបត្តិការលើការធ្វើបរិវត្តកម្មឌីជីថល សេដ្ឋកិច្ចឌីជីថល បច្ចេកវិទ្យាហិរញ្ញវត្ថុ សេដ្ឋកិច្ចបៃតង និងថាមពលកកើតឡើងវិញ។ ភាគីទាំងពីរបានសម្រេចពង្រីកវិសាលភាពនៃកិច្ចសហប្រតិបត្តិការក្នុងមណ្ឌលឧស្សាហកម្មវៀតណាម-សិង្ហបុរី (VSIP) បង្កើតការងារធ្វើ​ និងបន្តអភិវឌ្ឍមណ្ឌល VSIP កាន់តែឆ្លាតវៃ និងទំនើបជាងមុន នាពេលអនាគត ... ដែលបង្ហាញពីកម្រិត នៃភាពជាដៃគូយុទ្ធសាស្ត្រគ្រប់ជ្រុងជ្រោយ និងរួមចំណែកជំរុញទំនាក់ទំនងសហប្រតិបត្តិការរវាងប្រទេសទាំងពីរ។

លោកអគ្គលេខាបក្ស To Lam និងលោក Lawrence Wong នាយករដ្ឋមន្ត្រីសិង្ហបុរី ថ្លែងទៅកាន់អ្នកសារព័ត៌មាន (រូបថត៖ vnanet.vn)

ថ្លែងមតិក្នុងសន្និសីទកាសែត លោកអគ្គលេខាបក្ស To Lam បានចែករំលែកថា កិច្ចពិភាក្សារវាងភាគីទាំងពីរបានផ្តល់នូវជោគជ័យក្នុងស្មារតីបើកចំហ ស្មោះត្រង់ ស្មោះស្ម័គ្រ និងយោគយល់គ្នាទៅវិញទៅមក។ លោកអគ្គលេខាបក្ស To Lam សម្តែងនូវសេចក្តីសោមនស្សរីករាយដោយកត់សម្គាល់ថា បន្ទាប់ពីការបង្កើតទំនាក់ទំនងការទូតជាង ៥០ ឆ្នាំ ក្នុងនោះ ទំនាក់ទំនងភាពជាដៃគូយុទ្ធសាស្ត្រជាង ១០ ឆ្នាំ កិច្ចសហប្រតិបត្តិការរវាងប្រទេសទាំងពីរមានការអភិវឌ្ឍយ៉ាងទូលំទូលាយលើគ្រប់វិស័យ ហើយទំនុកចិត្តផ្នែកនយោបាយក៏កើនឡើងផងដែរ។

លោកអគ្គលេខាបក្ស To Lam និងលោក Lawrence Wong នាយករដ្ឋមន្ត្រីសិង្ហបុរី ក្នុងជំនួប និងថ្លែងទៅកាន់អ្នកសារព័ត៌មាន (រូបថត៖ vnanet.vn)

លោកអគ្គលេខាបក្ស To Lam បានឲ្យដឹងថា៖ ជាមួយនឹងសមិទ្ធិផលដ៏រឹងមាំដែលសម្រេចបាន ដោយឈរលើមូលដ្ឋាននៃការយោគយល់គ្នា និងការជឿទុកចិត្តគ្នា ចែករំលែកភាពស្រដៀងគ្នាក្នុងផលប្រយោជន៍ និងអាទិភាព យុទ្ធសាស្ត្រ ក៏ដូចជាចក្ខុវិស័យរួមស្តីពីសន្តិសុខ វិបុលភាព និងការអភិវឌ្ឍន៍ប្រកបដោយចីរភាពក្នុងតំបន់ ភាគីទាំងពីរបានប្រកាសអំពីការតម្លើងទំនាក់ទំនងវៀតណាម-សិង្ហបុរី ទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ។ ក្របខ័ណ្ឌនៃទំនាក់ទំនងថ្មីនេះនឹងរួមចំណែកពង្រឹងបន្ថែមទៀតនូវទំនុកចិត្តនយោបាយ និងបើកទូលាយកិច្ចសហប្រតិបត្តិការកាន់តែស៊ីជម្រៅ ធ្វើឱ្យទំនាក់ទំនងសហប្រតិបត្តិការវៀតណាម-សិង្ហបុរី ក្លាយជាគំរូក្នុងទំនាក់ទំនងអន្តរជាតិក្នុងយុគសម័យថ្មី ដោយឈរលើការគោរពឯករាជ្យ អធិបតេយ្យភាព និងរបបនយោបាយរបស់ប្រទេសនីមួយៗ ក៏ដូចជាច្បាប់អន្តរជាតិ នាំមកនូវផលប្រយោជន៍ជាក់ស្តែងដល់ប្រជាជន រួមចំណែកដល់សន្តិភាព ស្ថិរភាព និងការអភិវឌ្ឍន៍ក្នុងតំបន់ និងនៅលើពិភពលោក។ ភាគីទាំងពីរបានឯកភាពលើទិសដៅអនុវត្តទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយនាពេលខាងមុខ។

លោកអគ្គលេខាបក្ស To Lam បានសង្កត់ធ្ងន់ថា ចាប់តាំងពីការចូលរួមរបស់វៀតណាមក្នុងសមាគមប្រជាជាតិអាស៊ីអាគ្នេយ៍ (អាស៊ាន) មក សិង្ហបុរីតែងតែជាដៃគូសេដ្ឋកិច្ចដ៏សំខាន់ រួមដំណើរជាមួយវៀតណាមក្នុងដំណើរនៃកំណែទម្រង់ បើកទូលាយ និងអភិវឌ្ឍន៍។ វៀតណាមមានមោទនភាពដែលមានមិត្ត ដៃគូយុទ្ធសាស្ត្រគ្រប់ជ្រុងជ្រោយគឺសិង្ហបុរី៕

បកប្រែដោយ Huyen Trang