កិច្ចប្រជុំពិគ្រោះយោបល់នយោបាយលើកទី៩ រវាងក្រសួងការបរទេសទាំងពីរវៀតណាម និងឡាវ

លោក Do Hung Viet អនុរដ្ឋមន្ត្រីក្រសួងការបរទេសវៀតណាម និងលោក Phoxay Khaykhamphithoune អនុរដ្ឋមន្ត្រីក្រសួងការបរទេសឡាវ  (រូបថត៖ BNG)

នៅក្នុងជំនួបនេះ ភាគីទាំងពីរបានវាយតម្លៃរួមអំពីទំនាក់ទំនងវៀតណាម-ឡាវ និងបានសម្តែងនូវក្តីរំភើបចំពោះការអភិវឌ្ឍដ៏ខ្លាំងក្លា និងប្រកបដោយប្រសិទ្ធភាពលើវិស័យជាច្រើននៃទំនាក់ទំនងពិសេសរវាងវៀតណាម និងឡាវនាពេលថ្មីៗនេះ រួមទាំងការរួមចំណែករបស់ក្រសួងការបរទេសនៃប្រទេសទាំងពីរក្នុងការជំរុញដំណើរទស្សនកិច្ចកម្រិតខ្ពស់ និងគ្រប់លំដាប់ថ្នាក់ ជាពិសេសការសម្របសម្រួលយ៉ាងជិតស្និទ្ធ រួមចំណែករៀបចំដ៏ល្អដំណើរទស្សនកិច្ចផ្លូវរដ្ឋនៅប្រទេសឡាវរបស់លោក To Lam ប្រធានរដ្ឋវៀតណាម (ខែកក្កដា ឆ្នាំ២០២៤) និងដំណើរទស្សនកិច្ចជាផ្លូវការនៅវៀតណាមរបស់ លោក Sonexay Siphandone នាយករដ្ឋមន្ត្រីឡាវ (ខែមករា ឆ្នាំ២០២៤)។ ភាគីទាំងពីរបានឯកភាពបន្តសម្របសម្រួលឱ្យបានល្អដើម្បីរៀបចំដំណើរទស្សនកិច្ចកម្រិតខ្ពស់ និងយន្តការសហប្រតិបត្តិការទ្វេភាគីសំខាន់ៗរវាងប្រទេសទាំងពីរនាពេលខាងមុខ ទន្ទឹមនឹងនោះ បន្តសហការយ៉ាងជិតស្និទ្ធជាមួយក្រសួង ស្ថាប័ន និងមូលដ្ឋាននានានៃប្រទេសទាំងពីរ ដើម្បីជំរុញការអនុវត្តកិច្ចព្រមព្រៀងកម្រិតខ្ពស់។

ទិដ្ឋភាព នៃកិច្ចប្រជុំ​ពិគ្រោះយោបល់នយោបាយលើកទី៩ រវាងក្រសួងការបរទេសវៀតណាម និងឡាវ

អនុរដ្ឋមន្ត្រីទាំងពីរបានចំណាយពេលពិភាក្សាលើបញ្ហាអន្តរជាតិ និងតំបន់ដែលមានការយកចិត្តទុកដាក់ដូចគ្នា និងបានឯកភាពថា ក្នុងបរិបទនៃស្ថានភាពពិភពលោក និងតំបន់ដែលបន្តមានភាពស្មុគស្មាញ និងមិនអាចទាយទុកជាមុនបាននោះ ភាគីទាំងពីរត្រូវជំរុញប្រពៃណីនៃការសម្របសម្រួលយ៉ាងជិតស្និទ្ធ និងការគាំទ្រគ្នាទៅវិញទៅមកនៅវេទិកាអន្តរជាតិ និងតំបន់ ជាពិសេសអង្គការសហប្រជាជាតិ អាស៊ាន និងយន្តការសហប្រតិបត្តិការអនុតំបន់ ជាពិសេសក្នុងបញ្ហាយុទ្ធសាស្ត្រទាក់ទងនឹងសន្តិភាព និងស្ថិរភាពក្នុងតំបន់។ លោកអនុរដ្ឋមន្ត្រី Do Hung Viet បានសង្កត់ធ្ងន់ថា វៀតណាមបន្តសម្របសម្រួលយ៉ាងជិតស្និទ្ធ និងផ្តល់ការគាំទ្រជាអតិបរមាសម្រាប់ឡាវ ដើម្បីទទួលជោគជ័យក្នុងតួនាទីជាប្រធានអាស៊ានក្នុងឆ្នាំ ២០២៤ ដោយហេតុនោះ រួមចំណែកក្នុងការបន្តរក្សាសាមគ្គីភាព និងតួនាទីជាមជ្ឈភាពរបស់អាស៊ាន។ ​ភាគីទាំងពីរបានឯកភាពរៀបចំការពិគ្រោះយោបល់នយោបាយលើកទី១០នៅប្រទេសឡាវក្នុងឆ្នាំ២០២៥។

លោក Bui Thanh Son ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស បានទទួលជួបលោក Phoxay Khaykhamphithoune អនុរដ្ឋមន្ត្រីក្រសួងការបរទេសឡាវ

នារសៀលថ្ងៃដដែល នៅទីស្នាក់ការក្រសួងការបរទេស លោក Bui Thanh Son ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសវៀតណាម ទទួលជួបលោក Phoxay Khaykhamphithoune អនុរដ្ឋមន្ត្រីក្រសួងការបរទេសឡាវ។

បកប្រែដោយ Duy Hoan