រដ្ឋសភាសហរដ្ឋអាមេរិកបង្ហាញសេចក្តីសម្រេចចិត្តអបអរសាទរខួបលើកទី ២៥ នៃការបង្កើតទំនាក់ទំនងការទូតវៀតណាម-សហរដ្ឋអាមេរិក
កប.អនឡាញ - ក្នុងឱកាសរំលឹកខួបលើកទី ២៥ នៃការបង្កើតទំនាក់ទំនងការទូតរវាងវៀតណាម និងសហរដ្ឋអាមេរិក ថ្នាក់ដឹកនាំនៃអនុគណៈកម្មការចំនួន ២ ដែលចំណុះគណៈកម្មការកិច្ចការបរទេស នៃព្រឹទ្ធសភា និងសភាជាន់ទាបអាមេរិក បានបង្ហាញនូវសេចក្តីសម្រេចចំនួន ២ ដើម្បីអបអរសាទរព្រឹត្តិការណ៍នេះ។
|
|
រដ្ឋសភាសហរដ្ឋអាមេរិកបង្ហាញសេចក្តីសម្រេចចិត្តអបអរសាទរខួបលើកទី ២៥ នៃការបង្កើតទំនាក់ទំនងការទូតវៀតណាម-សហរដ្ឋអាមេរិក (រូបថត៖ Internet) |
សេចក្តីសម្រេចចិត្តមានឈ្មោះថា “អបអរសាទរខួបលើកទី ២៥ ឆ្នាំនៃការធ្វើឱ្យប្រក្រតីទំនាក់ទំនងឡើងវិញរវាងសាធារណរដ្ឋសង្គមនិយមវៀតណាម និងសហរដ្ឋអាមេរិក រួមសហការគ្នាដើម្បីតំបន់អាស៊ីអាគ្នេយ៍មួយប្រកបដោយស្ថិរភាព វិបុលភាព និងសន្តិភាព” ។ សេចក្តីសម្រេចចិត្តទាំងពីរនេះបានបញ្ជាក់ពីការសន្យារបស់សហរដ្ឋអាមេរិកថា សហរដ្ឋអាមេរិកបន្តជាដៃគូរឹងមាំ ជឿទុកចិត្ត និងស្វាហាប់នៅក្នុងតំបន់អាស៊ីអាគ្នេយ៍ រួមទាំងការបញ្ជាក់ពីសារសំខាន់នៃទំនាក់ទំនងភាពជាដៃគូគ្រប់ជ្រុងជ្រោយវៀតណាម - អាមេរិក និងកិច្ចសហប្រតិបត្តិការរវាងរដ្ឋាភិបាល និងប្រជាជននៃប្រទេសទាំងពីរ ដើម្បីតំបន់ឥណ្ឌូ - ប៉ាស៊ីហ្វិកមួយប្រកបដោយសន្តិភាព វិបុលភាព ការបើកចំហ និងឈរលើមូលដ្ឋាននៃសណ្តាប់ធ្នាប់ផ្អែកលើច្បាប់ ជម្រុញសន្តិសុខ ការអភិវឌ្ឍ និងគោរពអធិបតេយ្យភាព។
សេចក្តីសម្រេចចិត្តទាំងពីរនេះ បានស្វាគមន៍ចំពោះសមិទ្ធិផលទាំងឡាយដែលសម្រេចបានក្នុងទំនាក់ទំនងវៀតណាម - សហរដ្ឋអាមេរិក ក៏ដូចជាក្នុងយន្តការនានាក្នុងតំបន់ រួមទាំងមេគង្គ។ សេចក្តីសម្រេចចិត្តនេះក៏បានវាយតម្លៃខ្ពស់ចំពោះការចូលរួមចំណែករបស់សហគមន៍ជនជាតិវៀតណាមក្នុងការអភិវឌ្ឍរបស់សហរដ្ឋអាមេរិក។ ជាពិសេសសម្រាប់ការដោះស្រាយផលវិបាកក្រោយសង្គ្រាម សេចក្តីសម្រេចចិត្តទាំងពីរនេះបានបង្ហាញយ៉ាងច្បាស់នូវកិច្ចសហប្រតិបត្តិការរវាងប្រទេសទាំងពីរក្នុងការបន្សាបជាតិពុលឌីអុកស៊ីត ការាវរកគ្រាប់មីនដែលមិនទាន់ផ្ទុះ និងកិច្ចសហប្រតិបត្តិការក្នុងការស្វែងរកទាហានអាមេរិក និងទាហានវៀតណាមដែលបាត់ខ្លួនក្នុងសង្គ្រាម។
សភាជាតិសហរដ្ឋអាមេរិកបានវាយតម្លៃខ្ពស់ចំពោះតួនាទីរបស់វៀតណាមដែលកំពុងកើនឡើងយ៉ាងខ្លាំងក្លានៅក្នុងតំបន់ និងនៅលើពិភពលោក ជាពិសេសនៅពេលដែលវៀតណាមកាន់តួនាទីពីរក្នុងពេលតែមួយគឺជាប្រធានអាស៊ាន ២០២០ ផង និងជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ អាណត្តិ ២០២០-២០២១ ផង។ ភាគីអាមេរិកវាយតម្លៃខ្ពស់ចំពោះការដែលវៀតណាមបានត្រៀមខ្លួនជាស្រេចក្នុងការការពារសេរីភាពខាងធ្វើនាវាចរណ៍ និងការអនុវត្តច្បាប់អន្តរជាតិនៅសមុទ្រខាងកើត ព្រមទាំងបានអះអាងថាសិទ្ធិ និងផលប្រយោជន៍របស់វៀតណាមដែលស្របតាមច្បាប់អន្តរជាតិគឺត្រូវតែគោរពជានិច្ច៕
បកប្រែដោយ Duy Hoan