ថ្នាក់ដឹកនាំវៀតណាម - អាមេរិកផ្ញើសារទូរលេខអបអរសាទរជូនគ្នាទៅវិញទៅមកក្នុងឱកាសរំលឹកខួបលើកទី ២៥ ឆ្នាំនៃការបង្កើតទំនាក់ទំនងការទូត
កប.អនឡាញ - ក្នុងឱកាសរំលឹកខួបលើកទី ២៥ នៃការធ្វើឱ្យប្រក្រតីភាពឡើងវិញ និងការបង្កើតទំនាក់ទំនងការទូតរវាងសាធារណរដ្ឋសង្គមនិយមវៀតណាម និងសហរដ្ឋអាមេរិក (១២ កក្កដា ១៩៩៥ - ១២ កក្កដា ២០២០) អគ្គលេខាបក្ស ប្រធានរដ្ឋវៀតណាម លោក Nguyen Phu Trong និងប្រធាធិបតីអាមេរិក លោក Donald Trump បានផ្ញើសារលិខិតអបអរសាទរជូនគ្នាទៅវិញទៅមក។
|
|
អគ្គលេខាបក្ស ប្រធានរដ្ឋវៀតណាម លោក Nguyen Phu Trong ទទួលជួបជាមួយប្រធានាធិបតីអាមេរិក លោក Donald Trump នៅថ្ងៃទី ២៧ ខែកុម្ភៈ ឆ្នាំ២០១៩ (រូបថត៖ baoquocte.vn) |
នៅក្នុងសារលិខិត អគ្គលេខាបក្ស ប្រធានរដ្ឋវៀតណាម លោក Nguyen Phu Trong បានបញ្ជាក់ថា ក្នុងរយៈពេល ២៥ ឆ្នាំកន្លងមក ទំនាក់ទំនងទ្វេភាគីរវាងវៀតណាម និងសហរដ្ឋអាមេរិកបានពុះពារជំនះការលំបាកពីចម្ងាយនៃភូមិសាស្ត្រ និងភាពខុសគ្នានានាដើម្បីឈានទៅរកការអភិវឌ្ឍជាវិជ្ជមាន និងស្ថិរភាព ហើយបានប្រែក្លាយអាមេរិកទៅជាដៃគូជួរមុខរបស់វៀតណាមលើវិស័យជាច្រើន។ វៀតណាមជឿជាក់ថា ក្នុងស្មារតីទុកអតីតកាលទៅមួយអន្លើ ជំនះភាពខុសគ្នា ពង្រីកភាពស្រដៀងគ្នា និងឆ្ពោះទៅអនាគត ទំនាក់ទំនងភាពជាដៃគូគ្រប់ជ្រុងជ្រោយរវាងវៀតណាម - អាមេរិក នឹងកាន់តែស៊ីជម្រៅ ប្រកបដោយប្រសិទ្ធភាព និងយូរអង្វែង ក្នុងគោលបំណងផ្តល់ផលប្រយោជន៍ដល់ប្រជាជននៃប្រទេសទាំងពីរ និងរួមចំណែកដល់សន្តិសុខ សន្តិភាព និងវិបុលភាពនៅក្នុងតំបន់ និងនៅលើពិភពលោក។
ឯក្នុងសារលិខិតរបស់ប្រធានាធិបតីអាមេរិក លោក Donald Trump បានបញ្ជាក់ថា ការអភិវឌ្ឍនៃទំនាក់ទំនងភាពជាដៃគូរវាងប្រទេសទាំងពីរគឺជាស្នាដៃដ៏អស្ចារ្យ។ កិច្ចសហប្រតិបត្តិការនាពេលបច្ចុប្បន្ននេះបានបង្កើតមូលដ្ឋានសម្រាប់ការជឿទុកចិត្ត និងការយោគយល់គ្នា អនុញ្ញាតឱ្យប្រទេសទាំងពីរបង្កើតទំនាក់ទំនងភាពជាដៃគូគ្រប់ជ្រុងជ្រោយដែលត្រូវបានបញ្ជាក់តាមរយៈទំនាក់ទំនងពាណិជ្ជកម្មមានការកើនឡើងពីមួយថ្ងៃទៅមួយថ្ងៃ រួមទាំងការផ្សាភ្ជាប់យ៉ាងជិតស្និទ្ធរវាងប្រជាជននៃប្រទេសទាំងពីរ កិច្ចសហប្រតិបត្តិការជាយុទ្ធសាស្រ្ត និងការរួមគ្នាដោះស្រាយបញ្ហាមនុស្សធ៌ម និងផលវិបាកដែលបន្សល់ទុកពីសង្គ្រាម។ សហរដ្ឋអាមេរិករក្សាការសន្យារបស់ខ្លួនក្នុងការពង្រឹង និងពង្រីកថែមទៀតនូវទំនាក់ទំនងរវាងប្រទេសទាំងពីរ ដោយផ្អែកលើចក្ខុវិស័យនៃការចែករំលែកអំពីតំបន់ឥណ្ឌូ-ប៉ាស៊ីហ្វិក មួយប្រកបដោយសន្តិភាព និងវិបុលភាព ក៏ដូចជាការគោរពអធិបតេយ្យភាពគ្នាទៅវិញទៅមក និងការគោរពច្បាប់អន្តរជាតិ។
ក្នុងឱកាសនេះ លោកនាយករដ្ឋមន្រ្តី Nguyen Xuan Phuc បានផ្លាស់ប្ដូរលិខិតជូនពរគ្នាទៅវិញទៅមកជាមួយប្រធានាធិបតីអាមេរិកលោក Donald Trump ហើយប្រធានរដ្ឋសភាលោកស្រី Nguyen Thi Kim Ngan ក៏បានបានផ្លាស់ប្ដូរសារលិខិតអបអរសាទរជាមួយប្រធានព្រឹទ្ធសភាអាមេរិក លោក Michael Pence និងប្រធានសភាជាន់ទាបអាមេរិក លោកស្រី Nancy Pelosi ផងដែរ៕
បកប្រែដោយ Duy Hoan