សហភាពអឺរ៉ុបនឹងផ្តល់សច្ចាប័នលើកិច្ចព្រមព្រៀងពាណិជ្ជកម្មសេរីជាមួយវៀតណាមនាពេលឆាប់ៗ
កប.អនឡាញ - នៅក្នុងក្របខ័ណ្ឌនៃដំណើរទស្សនកិច្ចការងារនៅសាធារណរដ្ឋសហព័ន្ធអាល្លឺម៉ង់តាមការអញ្ជើញរបស់រដ្ឋមន្ត្រីសេដ្ឋកិច្ច និងថាមពលលោក Peter Altmaier នៅល្ងាចថ្ងៃទី១៥ ខែមីនា រដ្ឋមន្ត្រីក្រសួងផែនការ និងវិនិយោគវៀតណាម លោក Nguyen Chi Dung បានចូលរួម និងមានសុន្ទរកថានៅឯព្រឹត្តិការណ៍ Liebesmahl ដែលរៀបចំដោយសមាគមពាណិជ្ជកម្ម អាល្លឺម៉ង់ - ប៉ាស៊ីហ្វិក (OAV) នៅសាលាក្រុងហាំប៊ឺក។
យោងតាមអ្នកយកព័ត៌មាននៅប្រទេសអាល្លឺម៉ង់ឲ្យដឹងថា Liebesmahl (ជាពិធីជប់លៀងស្នេហារ) គឺជាព្រឹត្តិការណ៍ប្រចាំឆ្នាំដែលទាក់ទាញភ្ញៀវអញ្ជើញចូលរួមប្រមាណ ៣០០ នាក់ ដែលភាគច្រើនជាអ្នកតំណាងនៃរាល់ក្រុមហ៊ុនអាល្លឺម៉ង់ដែលកំពុងប្រតិបត្តិការនៅអាស៊ី-ប៉ាស៊ីហ្វិក អ្នកនយោបាយ និងឯកអគ្គរដ្ឋទូតនៃបណ្ដាប្រទេសក្នុងតំបន់។
|
|
រដ្ឋមន្ត្រីក្រសួងផែនការ និងវិនិយោគវៀតណាម លោក Nguyen Chi Dung ថ្លែងសុន្ទរកថានៅឯព្រឹត្តិការណ៍ Liebesmahl (រូបថត៖ vnanet.vn) |
នៅឆ្នាំនេះ ក្រៅពីវត្តមាននៃរដ្ឋមន្ត្រីក្រសួងសេដ្ឋកិច្ច និងថាមពលអាល្លឺម៉ង់លោក Peter Altmaier និងរដ្ឋមន្ត្រីក្រសួងផែនការ និងវិនិយោគវៀតណាម លោក Nguyen Chi Dung ក៏មានវត្តមាននៃអភិបាលទីក្រុង Hamburg លោក Peter Tschentscher ប្រធាន OAV លោក Hans-Georg Frey ឯកអគ្គរដ្ឋទូតវៀតណាមប្រចាំនៅអាល្លឺម៉ង់ លោក Nguyen Minh Vu អញ្ជើញចូលរួមក្នុងព្រឹត្តិការណ៍ Liebesmahl លើកទី៩៩ នេះផងដែរ។
ក្នុងនាមជាភ្ញៀវពិសេស រដ្ឋមន្រ្តីលោក Nguyen Chi Dung បានជួបពិភាក្សាការងារជាមួយរដ្ឋមន្រ្តីលោក Peter Altmaier មុនពេលចូលរួមក្នុងព្រឹត្តិការណ៍ Liebesmahl។ ក្នុងសុន្ទរកថាចំពោះមុខភ្ញៀវកិត្តិយសជាច្រើន នាយករដ្ឋមន្ត្រីវៀតណាម Nguyen Chi Dung បានអះអាងថា៖ ទំនាក់ទំនងភាពជាដៃគូ យុទ្ធសាស្ត្ររវាងវៀតណាម និងអាល្លឺម៉ង់កំពុងឈានចូលក្នុងដំណាក់កាលអភិវឌ្ឍន៍ថ្មី និងវាយតំលៃខ្ពស់ចំពោះការគាំទ្ររបស់អាល្លឺម៉ង់ចំពោះវៀតណាមក្នុងរយៈពេលកន្លងមក ក៏ដូចជាតួនាទីរបស់សហគ្រាសអាល្លឺម៉ង់ក្នុងដំណើរការអភិវឌ្ឍសេដ្ឋកិច្ច និងកសាងប្រទេសរបស់វៀតណាម។
លោករដ្ឋមន្រ្តី Nguyen Chi Dung ក៏បានសម្តែងនូវក្តីប្រាថ្នាចង់ឲ្យអង្គភាពអាជីវកម្មអាលឺ្លម៉ង់នឹងបន្តវិនិយោគបន្ថែមទៀតនៅវៀតណាម ជាពិសេសលើរាល់វិស័យដែលប្រទេសអាល្លឺម៉ង់មានឧត្តមភាព និងវៀតណាមមានតម្រូវការដូចជាផលិតគ្រឿងយន្តហិរញ្ញវត្ថុ ធានារ៉ាប់រង ថាមពលកកើតឡើងវិញ បណ្តុះបណ្តាលធនធានមនុស្ស ជាដើម។
ដើម្បីជួយសម្រួលថែមទៀតសម្រាប់កិច្ចសហប្រតិបត្តិការសេដ្ឋកិច្ចរវាងវៀតណាម និងអាល្លឺម៉ង់និយាយដោយឡែក និងរវាងវៀតណាមជាមួយសហភាពអឺរ៉ុបនិយាយរួមលោក Nguyen Chi Dung បានអំពាវនាវដល់អ្នកនយោបាយ និងពាណិជ្ជករ អាល្លឺម៉ង់ឱ្យជំរុញការចុះហត្ថលេខាអនុម័តលើកិច្ចព្រមព្រៀងពាណិជ្ជកម្មសេរីរវាងវៀតណាម និងសហភាពអឺរ៉ុប (EVFTA) ឱ្យបានឆាប់តាមដែលអាចធ្វើទៅបាន។
ស្ដីពី EVFTA រដ្ឋមន្ត្រីក្រសួងសេដ្ឋកិច្ច និងថាមពលអាល្លឺម៉ង់ លោក Peter Altmaier បានមានប្រសាសន៍ថា នៅក្នុងសុន្ទរកថានៅឯព្រឹត្តិការណ៍ Liebesmahl បានបញ្ជាក់ថា ខ្លឹមសារនៃកិច្ចព្រមព្រៀងនេះកំពុងត្រូវបានបកប្រែយ៉ាងប្រញាប់ទៅជាភាសានៃប្រទេសសមាជិកសហភាពអឺរ៉ុប ហើយតាមការរំពឹងទុក ការផ្តល់សច្ចាប័នលើកិច្ចព្រមព្រៀងនេះនឹងប្រព្រឹត្តទៅនាពេលឆាប់ៗខាងមុខនេះ ប្រហែលជាមុនពេលប្រព្រឹត្តទៅការបោះឆ្នោតសភាអឺរ៉ុបនៅចុងខែឧសភាឆ្នាំនេះ។
ក្នុងក្របខ័ណ្ឌនៃដំណើរទស្សនកិច្ចការងារទៅប្រទេសអាល្លឺម៉ង់លើកនេះ លោក Nguyen Chi Dung បានទទួលទានអាហារធ្វើការជាមួយតំណាងសហគ្រាសអាល្លឺម៉ង់និងវៀតណាម ជួបពិភាក្សាការងារជាមួយអ្នកតំណាងសហគ្រាសរបស់អាល្លឺម៉ង់អំពីវិស័យមួយចំនួនដូចជាធានារ៉ាប់រង អាកាសចរណ៍ ទឹកស្អាត ជាដើម ដែលកំពុងមានប្រតិបត្តិការ ឬមានបំណងវិនិយោគទុនសហប្រតិបត្តិការ និងធ្វើអាជីវកម្មនៅវៀតណាម៕
បកប្រែដោយ Minh Trung