ឧបនាយករដ្ឋមន្រ្តីវៀតណាម លោក Truong Hoa Binh អញ្ជើញទៅបំពេញទស្សនកិច្ចនៅសាធារណរដ្ឋប៉ូឡូញ
កប.អនឡាញ - តបតាមការអញ្ជើញរបស់ឧបនាយករដ្ឋមន្ត្រី រដ្ឋមន្ត្រីក្រសួងវិទ្យាសាស្ត្រ និងអប់រំឧត្តមសិក្សាប៉ូឡូញ លោក Jaroslaw Gowin ឧបនាយករដ្ឋមន្រ្តីវៀតណាម លោក Truong Hoa Binh បានអញ្ជើញទៅបំពេញទស្សនកិច្ចនៅសាធារណរដ្ឋប៉ូឡូញ ចាប់ពីថ្ងៃទី២០ ដល់ថ្ងៃទី២២ ខែកញ្ញា។
នៅក្នុងដំណើរទស្សនកិច្ច លោកឧបនាយករដ្ឋមន្រ្តី Truong Hoa Binh បានជួបពិភាក្សាជាមួយឧបនាយករដ្ឋមន្ត្រី រដ្ឋមន្រ្តីក្រសួងវិទ្យាសាស្ត្រនិងអប់រំឧត្តមសិក្សាប៉ូឡូញលោក Jaroslaw Gowin ជួបសវនាការជាមួយប្រធានព្រឹទ្ធសភាប៉ូឡូញលោក Stanislaw Karczewski និងជួបជាមួយប្រធានខុទ្ទកាល័យប្រធានាធិបតីលោកស្រី Halina Szymańska។
នៅក្នុងជំនួបទាំងនេះ លោក Truong Hoa Binh បានបញ្ជាក់ថា វៀតណាមចងចាំជានិច្ចចំពោះការជួយគាំទ្រដ៏ថ្លៃថ្នូររបស់ប្រជាជនប៉ូឡូញសម្រាប់ប្រទេសវៀតណាមក្នុងការរំដោះ និងអភិវឌ្ឍប្រទេសជាតិ ជាពិសេសគឺការបណ្តុះបណ្តាលឲ្យកម្មាភិបាលវៀតណាម និងមានបំណងចង់ពង្រឹង និងពង្រីតទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការលើគ្រប់ជ្រុងជ្រោយជាមួយប៉ូឡូញ ដែលជាដៃគូអាទិភាពមួយរបស់វៀតណាមនៅអឺរ៉ុបកណ្តាល និងអឺរ៉ុបខាងកើត។
|
|
លោកឧបនាយករដ្ឋមន្រ្តី Truong Hoa Binh និងឧបនាយករដ្ឋមន្ត្រី រដ្ឋមន្រ្តីក្រសួងវិទ្យាសាស្ត្រនិងអប់រំឧត្តមសិក្សាប៉ូឡូញលោក Jaroslaw Gowin (រូបថត៖ vov.vn) |
ថ្លែងក្នុងជំនួបជាមួយលោកឧបនាយករដ្ឋមន្រ្តី Truong Hoa Binh មន្រ្តីជាន់ខ្ពស់នៃសាធារណរដ្ឋប៉ូឡូញបានបញ្ជាក់ពីការយកចិត្តទុកដាក់យ៉ាងខ្លាំងចំពោះទំនាក់ទំនងជាប្រពៃណីជាមួយវៀតណាម និងសង្កត់ធ្ងន់ថា វៀតណាមជាដៃគូដ៏សំខាន់មួយរបស់ប៉ូឡូញក្នុងរយៈពេល៧០ឆ្នាំកន្លងមក ហើយឯកភាពនឹងសំណើរបស់លោកឧបនាយករដ្ឋមន្រ្តី Truong Hoa Binh ស្តីពីការរៀបចំសម័យប្រជុំលើកទី១ នៃយន្តការពិគ្រោះយោបល់អំពីកិច្ចសហប្រតិបត្តិការលើវិស័យសេដ្ឋកិច្ចរវាងវៀតណាម និងប៉ូឡូញ និងស្ដារឡើងវិញនូវគណៈកម្មការចម្រុះវៀតណាម-ប៉ូឡូញស្តីពីកិច្ចសហប្រតិបត្តិការលើវិស័យវិទ្យាសាស្ត្រ បច្ចេកទេសនាពេលឆាប់ៗខាងមុខនេះ។
នៅក្នុងឱកាសនេះ លោកឧបនាយករដ្ឋមន្រ្តី Truong Hoa Binh បានថ្លែងអំណរគុណដល់ប៉ូឡូញដោយបានគាំទ្រវៀតណាមឈរជាបេក្ខភាពសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិសម្រាប់អាណត្តិ ២០២០-២០២១ និងជឿជាក់ថាប្រទេសប៉ូឡូញនឹងទទួលបានជោគជ័យជាច្រើនថែមទៀតក្នុងឋានៈជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិសម្រាប់អាណត្តិ ២០១៨-២០១៩៕
បកប្រែដោយ Duy Hoan