កិច្ចព្រមព្រៀងភាពជាដៃគូលើគ្រប់ជ្រុងជ្រោយ និងវឌ្ឍនភាពអន្តរប៉ាសីហ្វិក (CPTPP) - ការលោតផ្លោះជាយុទ្ធសាស្ត្រអំពីពាណិជ្ជកម្មសេរី
កប.អនឡាញ - កិច្ចព្រមព្រៀងភាពជាដៃគូលើគ្រប់ជ្រុងជ្រោយ និង វឌ្ឍនភាពអន្តរប៉ាសីហ្វិក (ហៅកាត់ថា CPTPP) ដែលត្រូវបានអនុម័តដោយរដ្ឋមន្ត្រីនៃប្រទេសទាំង១១ មានអត្ថន័យ ដ៏សែនសំខាន់ក្នុង ការជំរុញពាណិជ្ជកម្មសេរីអន្តរជាតិ និងជាចំណុចគួរឲ្យចាប់អារម្មណ៍បំផុតក្នុងជោគជ័យនៃសប្តាហ៍ជាន់ខ្ពស់ APEC 2017។ ដើម្បីជួយមិត្ត អ្នកអានស្វែងយល់ឲ្យបាន ច្បាស់នូវអត្ថន័យ ដ៏មានតំលៃនៃ ព្រឹត្តការណ៍នេះ កាសែតកងទ័ព ប្រជាជន សូមឧទ្ទេសនាមអំពី យោបល់មួយចំនួនរបស់អ្នក ជំនាញការ និង សាធារណជន។
លោក Tran Tuan Anh រដ្ឋមន្ត្រីក្រសួងឧស្សាហកម្មនិងពាណិជ្ជកម្មវៀតណាម និង លោក Toshimitsu Motegi រដ្ឋមន្ត្រីក្រសួងសេដ្ឋកិច្ចជប៉ុន ក្នុងសន្និសីទកាសែត នាថ្ងៃទី១១ វិច្ឆិកា (រូបថត៖ zing.vn)
ហេតុអ្វីប្តូរឈ្មោះ?
នារសៀលថ្ងៃទី ១១ ខែវិច្ឆិកាថ្មីៗនេះ លោក Tran Tuan Anh រដ្ឋមន្ត្រីក្រសួងឧស្សាហកម្មនិងពាណិជ្ជកម្មវៀតណាមបានសង្កត់ធ្ងន់ថា លទ្ធផលដែលសម្រេចបាននៅទីក្រុង Da Nang លើកនេះបានបញ្ជាក់ច្បាស់ពីការខិតខំប្រឹងប្រែងដ៏ធំធេងរបស់ប្រទេសសមាជិកទាំង ១១ ក្នុងកិច្ចព្រមព្រៀងភាពជាដៃគូអន្តរប៉ាសីហ្វិក (TPP) ដើម្បីបង្កើនកំណើនសេដ្ឋកិច្ច បង្កើតការងារ លើកកំពស់គុណភាពនៃជីវភាពរស់នៅរបស់ប្រជាជន ព្រមទាំងអភិវឌ្ឍពាណិជ្ជកម្ម កិច្ចសហប្រតិបត្តិការ និងធ្វើសមាហរណកម្មក្នុងតំបន់ប្រកបដោយប្រសិទ្ធភាពថែមទៀត។ លោកក៏បកស្រាយបន្ថែមទៀតអំពីភាពខុសគ្នារវាងកិច្ចព្រមព្រៀង CPTPP និង TPP ដោយថាវាមិនត្រឹមតែខុសគ្នានៅចំណុចចំនួនប្រទេសសមាជិកក្នុងកិច្ចព្រមព្រៀង TPP-12 និង TPP-11 នោះទេ ថែមទាំងផ្តោតសំខាន់លើគុណភាព និង ការអភិវឌ្ឍលើគ្រប់វិស័យរបស់កិច្ចព្រមព្រៀង TPP-11 ទៀតផងដែរ។ ហេតុដូច្នេះហើយ ខ្លឹមសារនិងគុណភាពនៃកិច្ចព្រមព្រៀងនេះ បង្ហាញច្បាស់ពីពាក្យពីរ ដែលហៅថា «គ្រប់ជ្រុងជ្រោយ» និង «វឌ្ឍនភាព» ហើយប្រការនេះជាគោលដៅរួមរបស់កិច្ចព្រមព្រៀង CPTPP ។
ដោះស្រាយគ្រប់ការលំបាក និងបញ្ជាក់ពីតួនាទីរបស់វៀតណាម
លោក Tran Tuan Anh ក៏បញ្ជាក់ទៀតថាគ្រប់ឧបសគ្គដែលជួបប្រទេះក្នុងការចរចាកិច្ចព្រមព្រៀងនេះគឺធ្វើយ៉ាងណាដើម្បីរក្សាកិច្ចព្រមព្រៀងTPP-11 ប្រកបដោយគុណភាពនៅកំរិតខ្ពស់បំផុតនិងស្វែងរកចំណុចតុល្យភាពថ្មីសំរាប់ការរក្សាកិច្ចព្រមព្រៀងក្នុងបរិបទថ្មី។ កិច្ចចរចានេះបានឆ្លុះបញ្ចាំងពីការកសាងគោលនយោបាយនៃប្រទេសរៀងៗខ្លួន សំដៅធានាគោលដៅប្រកបដោយប្រសិទ្ធភាពសម្រាប់ប្រទេសសមាជិកនិមួយៗ។ ក្នុងឋានៈជាសហអធិបតី វៀតណាម និងជប៉ុនបានបំពេញភារកិច្ចរបស់ខ្លួនដ៏ផ្លែផ្កាដើម្បីសម្រេចបាននូវកិច្ចព្រមព្រៀង TPP ស្តីពីគោលការណ៍ជាមូលដ្ឋាន។
សន្និសីទកាសែតស្តីពីលទ្ធផលនៃកិច្ចព្រមព្រៀង CPTPP
ព្រឹត្តិការក្រៅផ្លូវការមានអត្ថន័យដ៏សំខាន់
CPTTP ត្រូវបានអនុម័តដោយជោគជ័យ និងជាការលោតផ្លោះដ៏ល្អប្រសើរសំរាប់ពាណិជ្ជកម្មសេរីក្នុងតំបន់។ ការដកចេញពី TPP របស់សហរដ្ឋអាមេរិកធ្វើឲ្យការរំពឹងទុកនៃកិច្ចព្រមព្រៀងនេះ ថយចុះយ៉ាងខ្លាំង ក៏ប៉ុន្តែប្រទេសទាំង១១ក្នុងកិច្ចព្រមព្រៀងនេះនៅតែដើរទៅតាមមាគ៌ារបស់ខ្លួន។ នេះគឺជាជំហានលោតផ្លោះជាយុទ្ធសាស្ត្រមួយដែលគួរឲ្យកត់សម្គាល់ ម្យ៉ាងទៀត CPTPP មិនត្រឹមតែជាកិច្ចព្រមព្រៀងពាណិជ្ជកម្មសេរីនោះទេ ថែមទាំងជាកិច្ចព្រមព្រៀងភាពជាដៃគូលើគ្រប់វិស័យនិងវឌ្ឍនភាពផងដែរ។ ក្នុងក្របខ័ណ្ឌនៃសប្តាហ៍ជាន់ខ្ពស់ APEC 2017 នៅទីក្រុង Da Nang កិច្ចព្រមព្រៀង CPTPP ក៏បានចាត់ទុកជាព្រឹត្តិការណ៍មានលក្ខណៈប្រវត្តិសាស្ត្រដែរ។
ដើម្បីទទួលបាននូវជោគជ័យដូចនេះ វៀតណាមក្នុងនាមជាប្រទេសជាម្ចាស់ផ្ទះ APEC 2017 បានបង្ហាញពីការប្តេជ្ញាចិត្តយ៉ាងខ្ពស់បំផុតដើម្បី "រក្សា" ឲ្យបាន TPP ។ ការខំប្រឹងប្រែងរបស់វៀតណាមបានជះឥទ្ធិពលយ៉ាងខ្លាំងដល់ការសម្រេចចិត្តរបស់ប្រទេសផ្សេងៗទៀត។ លើសពីនេះទៅទៀត ដោយមានភាពរាក់ទាក់ ស្និទ្ធស្នាល ដិតដល់និង ស្មោះស្ម័គ្ររបស់ប្រទេសម្ចាស់ផ្ទះ វៀតណាមបានបង្កើតបរិយាកាសល្អបំផុតសម្រាប់កិច្ចចរចានេះដែរ។
វៀតណាមត្រូវឆ្លៀតចាប់យកឱកាសនេះដើម្បីឈានទៅមុខ
ទីមួយ វៀតណាមត្រូវខំប្រឹងប្រែងអស់ពីកម្លាំងកាយចិត្តដើម្បីធ្វើការចរចាឲ្យបានបញ្ចប់មាត្រានានាក្នុងកិច្ចព្រមព្រៀងនេះដើម្បីឈានទៅដល់ការចុះហត្ថលេខានិងអនុវត្តយ៉ាងឆាប់ៗ។
ទីពីរ វៀតណាមត្រូវរៀបចំការបង្កើនសមត្ថភាពក្នុងការប្រកួតប្រជែង ទាំងផលិតផល-សេវាកម្ម ទាំងនីតិវិធីដើម្បីឆ្លើយតបនឹងការទាមទារយ៉ាងតឹងរឹងរបស់កិច្ចព្រមព្រៀងនេះនៅកំរិតអភិវឌ្ឍដ៏ខ្ពស់បំផុត។
ទីបីវៀតណាមគួរតែជំរុញទំនាក់ទំនងនិង កិច្ចសហប្រតិបត្តិការផ្សេងៗទៀត ក្នុងនោះមានកិច្ចព្រមព្រៀងពាណិជ្ជកម្មសេរីវៀតណាម-អ៊ឺរ៉ុប និងសហគមន៍សេដ្ឋកិច្ចអាស៊ាន។ ជាពិសេស បង្កើនទំនាក់ទំនងភាពជាដៃគូជាមួយសហរដ្ឋអាមេរិក ចិន រុស្ស៊ី និងឥណ្ឌា។ ទំនាក់ទំនងទាំងនេះដើរតួនាទីជាស្នូល ដើម្បីធានាតុល្យភាព និងឧត្តមភាពដ៏រឹងមាំនៃយុទ្ធសាស្ត្រ ក៏ដូចជាដើម្បីផលប្រយោជន៍ក្នុងការអភិវឌ្ឍន៍នាំមុខគេក្នុងតំបន់។
ការនាំចេញនាំចូលរបស់វៀតណាមមានកាលានុវត្តភាពក្នុងការអភិវឌ្ឍន៍ (កំពង់ផែទីក្រុង Hai Phong)
ភាពជោគជ័យនៃសប្តាហ៍ជាន់ខ្ពស់ APEC 2017 នៅទីក្រុង Da Nang និង CPTPP បានក្លាយជាកំលាំងចលករសំរាប់ជំហានជាបន្តបន្ទាប់នាពេលខាងមុខ។ វៀតណាម និង ប្រទេសសមាជិកក្នុងកិច្ចព្រមព្រៀង CPTPP គួរតែឆ្លៀតឱកាសនេះដើម្បីអភិវឌ្ឍទៅមុខ៕
បកប្រែដោយ Van Hoa