ប្រទេសចិនបានប្រកាសតុក្កតានិមិត្តរូប (Mascot) ប្រចាំព្រឹត្តិការណ៍កីឡាអាស៊ីហ្គេម លើកទី ១៩
កប.អនឡាញ - ក្នុងបរិបទដែលពិភពលោកកំពុង “តស៊ូ” ដើម្បីទប់ស្កាត់ការរីករាលដាលនៃជំងឺ Covid-19 ប្រទេសម្ចាស់ផ្ទះចិនថ្មីៗនេះនៅតែបង្ហាញសុទិដ្ឋិនិយមតាមរយៈការប្រកាសតុក្កតានិមិត្តរូបប្រចាំព្រឹត្តិការណ៍កីឡាអាស៊ីហ្គេម លើកទី ១៩។
|
|
តុក្កតានិមិត្តរូបប្រចាំព្រឹត្តិការណ៍កីឡាអាស៊ីហ្គេម ២០២០ ចំនួន ៣ រួមមាន Lianlian, Congcong និង Chenchen ត្រូវបានបង្ហាញដោយប្រទេសម្ចាស់ផ្ទះចិនក្នុងពិធីបង្ហាញតុក្កតានិមិត្តរូបតាមប្រព័ន្ធអនឡាញ (រូបថត៖ nhandan.com.vn) |
ពិធីបង្ហាញតុក្កតានិមិត្តរូបនេះត្រូវបានធ្វើឡើងតាមប្រព័ន្ធអនឡាញនៅទីក្រុងហាំងចូវ ខេត្ដចឺចៀង នៃប្រទេសចិនដែលជាកន្លែងប្រារព្ធព្រឹត្តិការណ៍កីឡាអាស៊ីហ្គេម លើកទី១៩។ តុក្កតានិមិត្តរូបទាំង៣ ដែលមានឈ្មោះថា Lianlian, Congcong និង Chenchen ត្រូវបានបំផុសគំនិតពីបេតិកភណ្ឌវប្បធម៌ពិភពលោកចំនួន ៣ នៅទីក្រុងហាំងចូវគឺ កេរ្តិ៍តំណែលវប្បធម៌ Liangzhu, បឹងស៊ីហ៊ូ និងមហាប្រឡាយ Grand Canal។
យោងតាមប្រធានគណៈកម្មាធិការអូឡាំពិកអាស៊ី OCA លោក Sheikh Ahmad al-Fahad al-Sabah បានអោយដឹងថា លោកបានកោតសរសើរចំពោះសោភ័ណភាព និងអត្ថន័យរបស់តុក្កតានិមិត្តរូបប្រចាំព្រឹត្តិការណ៍កីឡាអាស៊ីហ្គេម ២០២០ ទាំង ៣ នេះ ដោយវាបានបង្ហាញពីភាពរឹងមាំ និងលក្ខណៈវប្បធម៌ពិសេសរបស់ប្រទេសចិន ក៏ដូចជាទីក្រុងហាំងចូវ ព្រមទាំងលើកកំពស់ស្មារតីនៃព្រឹត្តិការណ៍កីឡាអាស៊ីហ្គេម និងតំបន់អាស៊ីផងដែរ។ ថ្នាក់ដឹកនាំ OCA ជឿជាក់ថា តុក្កតានិមិត្តរូបប្រចាំព្រឹត្តិការណ៍កីឡាអាស៊ីហ្គេម ២០២០ ទាំង ៣ នេះ នឹងទទួលបានការចូលចិត្តពីមនុស្សគ្រប់គ្នា ជាពិសេសយុវវ័យ ព្រមទាំងសង្ឃឹមថាវានឹងនាំមកនូវសេចក្តីរីករាយ និងសុខភាពដល់អាស៊ី និងពិភពលោក៕
បកប្រែដោយ Duy Hoan