ពិធីបើកវគ្គហ្វឹកហ្វឺនជំនាញខ្ពស់អន្តរជាតិដំបូងបង្អស់ដែលរៀបចំដោយវៀតណាម

ថ្លែងសុន្ទរកថាបើកវគ្គ លោកឧត្តមសេនីយ៍ត្រី Pham Manh Thang ប្រធាន​នាយកដ្ឋានរក្សាសន្តិភាពវៀតណាម បានសង្កត់ធ្ងន់ថា ក្នុងដំណើរការត្រៀមរៀបចំ និងការដាក់ពង្រាយកងកម្លាំងចូលរួមបេសកកម្មរក្សាសន្តិភាពរបស់អង្គការសហប្រជាជាតិ ក្នុងរយៈពេល១១ឆ្នាំកន្លងមកនេះ វៀតណាមតែងតែទទួលបានការគាំទ្រ និងជំនួយដ៏មានតម្លៃពីកាណាដា និងអង្គការសហប្រជាជាតិ ជាពិសេសក្នុងវិស័យហ្វឹកហ្វឺន និងបណ្តុះបណ្តាល។

លោកឧត្តមសេនីយ៍ត្រី Pham Manh Thang ថ្លែងសុន្ទរកថាបើកវគ្គ

យោងតាមឧត្តមសេនីយ៍ត្រី Pham Manh Thang ឲ្យដឹងថា UNSOC ២០២៦ ក៏មានសារៈសំខាន់ពិសេស  ពីព្រោះនេះជាវគ្គហ្វឹកហ្វឺនជំនាញខ្ពស់អន្តរជាតិដំបូងបង្អស់ដែលរៀបចំដោយវៀតណាម។

វគ្គហ្វឹកហ្វឺននេះក្នុងគោលបំណងបង្កើនចំណេះដឹងនិងជំនាញចាំបាច់ដល់នាយទាហានកងទ័ពប្រជាជនវៀតណាម  កងទ័ពប្រជាជនឡាវ និងប្រទេសដៃគូក្នុងក្របខ័ណ្ឌនៃកម្មវិធីហ្វឹកហ្វឺននិងសហប្រតិបត្តិការយោធារបស់កាណាដា (MTCP) ដើម្បីអនុវត្តប្រកបដោយប្រសិទ្ធភាពនូវភារកិច្ចជានាយទាហានផ្នែកសេនាធិការនៅស្ថានបេសកកម្មរក្សាសន្តិភាពរបស់អង្គការសហប្រជាជាតិ។

វគ្គហ្វឹកហ្វឺននេះក៏បន្តរួមចំណែកដល់ការលើកកម្ពស់កិត្យានុភាព តួនាទី សមត្ថភាព និងការរៀបចំវគ្គហ្វឹកហ្វឺនជំនាញខ្ពស់អន្ដរជាតិ អភិវឌ្ឍន៍ក្រុមគ្រូបង្រៀនមានគុណភាពខ្ពស់របស់នាយកដ្ឋានរក្សាសន្តិភាពវៀតណាម និងពង្រឹងទំនាក់ទំនងមិត្ដភាព កិច្ចសហប្រតិបត្ដិការរវាងវៀតណាម ឡាវ និងកាណាដា និងដៃគូអន្តរជាតិក្នុងវិស័យរក្សាសន្តិភាពរបស់អង្គការសហប្រជាជាតិ។

លោក James Nickel ឯកអគ្គរដ្ឋទូតកាណាដាប្រចាំវៀតណាម  ថ្លែងក្នុងពិធីបើកវគ្គហ្វឹកហ្វឺន

រីឯ លោក James Nickel ឯកអគ្គរដ្ឋទូតកាណាដាប្រចាំវៀតណាម បានសង្កត់ធ្ងន់ថា UNSOC ២០២៦ គឺជាសក្ខីភាពដ៏រស់រវើកមួយចំពោះទំនាក់ទំនងភាពជាដៃគូកាន់តែអភិវឌ្ឍន៍  និងគួរឱ្យទុកចិត្តរវាងកាណាដានិងវៀតណាមក្នុងការរួមចំណែកដល់សន្តិភាព និងសន្តិសុខអន្តរជាតិ។ លោកឯកអគ្គរដ្ឋទូត James Nickel បានថ្លែងអំណរគុណដល់កងទ័ពប្រជាជនវៀតណាម ជាពិសេសនាយកដ្ឋានរក្សាសន្តិភាពវៀតណាមផ្ទាល់បាន សហការយ៉ាងជិតស្និទ្ធ និងមានប្រសិទ្ធភាពក្នុងការរៀបចំវគ្គហ្វឹកហ្វឺនដ៏សំខាន់នេះ ហើយវាយតម្លៃខ្ពស់ចំពោះស្មារតីទទួលខុសត្រូវ និងវិជ្ជាជីវៈរបស់​វៀត​ណាម។

យោងតាមលោកឯកអគ្គរដ្ឋទូត James Nickel ចាប់តាំងពីប្រទេសទាំងពីរចុះហត្ថលេខាលើអនុស្សរណៈនៃការយោគយល់គ្នាស្តីពីការរក្សាសន្តិភាពនៅឆ្នាំ ២០២៣ មក វៀតណាមបានបង្ហាញពីតួនាទីកាន់តែលេចធ្លោនៅពេលរៀបចំវគ្គហ្វឹកហ្វឺនជាច្រើនដែលគាំទ្រដោយកាណាដា ព្រមទាំងបញ្ជាក់ពីកិត្យានុភាពរបស់វៀតណាមដូចជាមជ្ឈមណ្ឌលហ្វឹកហ្វឺនរក្សាសន្តិភាពមួយដែលមានកេរ្តិ៍ឈ្មោះនៅក្នុងតំបន់ ស្របតាមអាទិភាពនានារបស់អង្គការសហប្រជាជាតិ។

ប្រតិភូចូលរួមពិធីបើកវគ្គថតរូបជុំគ្នា

UNSOC ២០២៦ បានធ្វើឡើងចាប់ពីថ្ងៃទី ៣ដល់ថ្ងៃទី ៣០ ខែមករា ដោយមានការចូលរួមពីគ្រូបង្រៀនវៀតណាម និងការពិគ្រោះយោបល់ពីគ្រូបង្រៀនកាណាដា រួមទាំងការចូលរួមរបស់សិក្ខាកាមមកពីប្រទេសវៀតណាម និងប្រទេសដទៃទៀតក្នុងក្របខ័ណ្ឌ MTCP គឺបង់ក្លាដែស ហ្វីជី ឥណ្ឌូនេស៊ី ម៉ាឡេស៊ី ម៉ុងហ្គោលី នេប៉ាល់ ប៉ាគីស្ថាន ហ្វីលីពីន ថៃ និងទីម័រខាងកើត។ ជាពិសេស វគ្គហ្វឹកហ្វឺននេះក៏មានការចូលរួមពីនាយទាហានកងទ័ពប្រជាជនឡាវផងដែរ៕

បកប្រែដោយ Pham Diep