ក្រុមហ៊ុនអាកាសចរណ៍ Vietnam Airlines បើកជើងហោះហើរត្រង់ពីទីក្រុងហាណូយទៅកាន់ទីក្រុងភ្នំពេញ
កប.អនឡាញ - នៅថ្ងៃទី ១៣ ខែកក្កដា ឆ្នាំ ២០២៤ ក្នុងក្របខ័ណ្ឌនៃដំណើរទស្សនកិច្ចផ្លូវរដ្ឋរបស់លោក To Lam ប្រធានរដ្ឋនៃសាធារណរដ្ឋសង្គមនិយមវៀតណាមទៅកាន់ព្រះរាជាណាចក្រកម្ពុជា ក្រុមហ៊ុនអាកាសចរណ៍ Vietnam Airlines បានប្រកាសបើកជើងហោះហើរត្រង់ពីទីក្រុងហាណូយទៅកាន់ទីក្រុងភ្នំពេញ។
ជាមួយគ្នានេះ ក្រុមហ៊ុនអាកាសចរណ៍ Vietnam Airlines ក៏បានចុះហត្ថលេខាលើកិច្ចព្រមព្រៀងសហប្រតិបត្តិការជាមួយដៃគូក្នុងប្រទេសកម្ពុជា ដើម្បីជំរុញការអភិវឌ្ឍវិស័យអាកាសចរណ៍ និងទេសចរណ៍រវាងប្រទេសទាំងពីរ។
អាស្រ័យហេតុនេះ ក្រុមហ៊ុនអាកាសចរណ៍ Vietnam Airlines នឹងបើកជើងហោះហើរត្រង់ពីទីក្រុងហាណូយ និងទីក្រុងភ្នំពេញជាមួយនឹងជើងហោះហើរទៅមកចំនួន ៤ ដងក្នុងមួយសប្តាហ៍ គឺនៅថ្ងៃចន្ទ ពុធ សុក្រ និងថ្ងៃអាទិត្យ។ ជើងហោះហើរត្រូវបានដំណើរការដោយយន្តហោះ Airbus A321 ទំនើប។
    |
 |
|
ពិធីប្រកាសបើកជើងហោះហើរត្រង់ពីទីក្រុងហាណូយទៅកាន់ទីក្រុងភ្នំពេញ (រូបថត៖ vnanet.vn) |
ផ្លូវហោះហើរវៀតណាម-កម្ពុជា គឺជាផ្លូវមួយក្នុងចំណោមផ្លូវហោះហើរដំបូងគេដែលដំណើរការដោយក្រុមហ៊ុនអាកាសចរណ៍ Vietnam Airlines ចាប់តាំងពីប៉ុន្មានថ្ងៃដំបូងនៃការបង្កើតឡើងកាលពី៣១ឆ្នាំមុន។ ក្នុងអំឡុងពេលនៃការបង្កើតនិងអភិវឌ្ឍន៍ ការបើកជើងហោះហើរទៅកាន់ប្រទេសកម្ពុជា ដែលជាប្រទេសជិតខាងជិតស្និទ្ធជាមួយប្រទេសវៀតណាមតែងតែជាទិសដៅយុទ្ធសាស្ត្រមួយនៃក្រុមហ៊ុនអាកាសចរណ៍ Vietnam Airlines៕
បកប្រែដោយ Pham Diep