វៀតណាម និងសហភាពអ៊ឺរ៉ុបជំរុញការអនុវត្តកិច្ចព្រមព្រៀង EVFTA ប្រកបដោយប្រសិទ្ធភាព
កប.អនឡាញ - នារសៀលថ្ងៃទី ២ ខែធ្នូ នៅទីក្រុងហាណូយបានប្រព្រឹត្តទៅកិច្ចប្រជុំរវាងរដ្ឋសភាវៀតណាម និងសភាអ៊ឺរ៉ុប (EP) ស្តីពីការអនុវត្តកិច្ចព្រមព្រៀងពាណិជ្ជកម្មសេរីរវាងវៀតណាមនិងសហភាពអឺរ៉ុប (EVFTA) តាមរយៈប្រព័ន្ធវីដេអូ។ លោក Nguyen Van Giau ប្រធានគណៈកម្មការកិច្ចការបរទេសនៃរដ្ឋសភាវៀតណាម និងលោក Bernd Lange ប្រធានគណៈកម្មាធិការពាណិជ្ជកម្មអន្តរជាតិ (INTA) របស់ EP ជាសហអធិបតីនៃកិច្ចប្រជុំនេះ។
    |
 |
|
លោក Nguyen Van Giau ជាអធិបតីនៃកិច្ចប្រជុំ |
នៅក្នុងកិច្ចប្រជុំ ភាគីទាំងពីរបានពិភាក្សាអំពីការអនុវត្តកិច្ចព្រមព្រៀង EVFTA លទ្ធផលដែលសម្រេចបាន និងការអនុវត្តកិច្ចសន្យារបស់ភាគីទាំងពីរនៅក្នុងកិច្ចព្រមព្រៀង។ លោក Bernd Lange ប្រធាន INTA បានមានប្រសាសន៍ថា ការផ្លាស់ប្តូរពាណិជ្ជកម្មរវាងវៀតណាម និង EU វិវឌ្ឍយ៉ាងល្អក្នុងរយៈពេលកន្លងមក ហើយលោកបានចាត់ទុកថា ភាគីទាំងពីរចាំបាច់ត្រូវជំរុញកិច្ចសហប្រតិបត្តិការលើវិស័យនេះថែមទៀត។
លោក Nguyen Van Giau ប្រធានគណៈកម្មការកិច្ចការបរទេសនៃរដ្ឋសភាវៀតណាម បានមានប្រសាសន៍ថា ដោយមានការខិតខំប្រឹងប្រែងពីរដ្ឋសភា និងរដ្ឋាភិបាលក្នុងការអនុវត្តកិច្ចព្រមព្រៀង EVFTA ក្នុងរយៈពេល ៩ ខែដើមឆ្នាំ ២០២០ ទំហំពាណិជ្ជកម្មនាំចូលនិងនាំចេញរបស់វៀតណាម និងទីផ្សារ EU ទទួលបានលទ្ធផលជាវិជ្ជមាន។
សមាជិកសភា EP បានវាយតម្លៃខ្ពស់ចំពោះការអនុវត្តទាន់ពេលវេលារបស់វៀតណាម ក្នុងការកសាង និងអនុវត្តកិច្ចព្រមព្រៀង។ ភាគីទាំងពីរបានចាត់ទុកថាចាំបាច់ត្រូវបង្កើនកិច្ចសហប្រតិបត្តិការ ដើម្បីជំរុញការអនុវត្តកិច្ចព្រមព្រៀងប្រកបដោយប្រសិទ្ធភាព ជាពិសេសក្នុងបរិបទដែលជំងឺរាតត្បាត Covid-19 ជះឥទ្ធិពលយ៉ាងធ្ងន់ធ្ងរដល់វិស័យសេដ្ឋកិច្ចក្នុងតំបន់ និងនៅលើពិភពលោក៕
បកប្រែដោយ Huyen Trang