វៀតណាម-ចក្រភពអង់គ្លេសដំឡើងទំនាក់ទំនងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ

លោក To Lam អគ្គលេខាបក្ស និងលោក Keir Starmer នាយករដ្ឋមន្ត្រីអង់គ្លេស និងប្រតិភូទាំង​ឡាយ (រូប​ថត៖ vnanet.vn)

នៅក្នុងកិច្ចពិភាក្សា មេដឹកនាំទាំងពីរបានបញ្ជាក់ថា ប្រទេសទាំងពីរមានសក្តានុពលដ៏អស្ចារ្យសម្រាប់កិច្ចសហប្រតិបត្តិការក្នុងដំណាក់កាលថ្មី ជាពិសេសក្នុងការផ្លាស់ប្តូរសេដ្ឋកិច្ច-ថាមពល ឆ្ពោះទៅរកការអភិវឌ្ឍបៃតង និងប្រកបដោយចីរភាព ការអភិវឌ្ឍឧស្សាហកម្មបច្ចេកវិទ្យាឌីជីថល និងការបណ្តុះបណ្តាលធនធានមនុស្សដែលមានគុណភាពខ្ពស់។ លោក Keir Starmer នាយករដ្ឋមន្ត្រីអង់គ្លេស បានសម្តែងបំណងចង់អភិវឌ្ឍទំនាក់ទំនងទ្វេភាគីលើគ្រប់ជ្រុងជ្រោយជាមួយវៀតណាម ជាពិសេសក្នុងក្របខ័ណ្ឌនៃកិច្ចព្រមព្រៀងពាណិជ្ជកម្មសេរីវៀតណាម-ចក្រភពអង់គ្លេស (UKVFTA) និងកិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP)។ លោក Keir Starmer នាយករដ្ឋមន្ត្រីអង់គ្លេស បានសង្កត់ធ្ងន់ថា រដ្ឋាភិបាលអង់គ្លេសបានត្រៀមខ្លួនរួចជាស្រេចដើម្បីគាំទ្រវៀតណាមក្នុងដំណើរការអនុវត្តការសន្យារបស់ខ្លួនក្នុងការសម្រេចបាននូវការបំភាយឧស្ម័នសុទ្ធសូន្យនៅឆ្នាំ ២០៥០ ខណៈពេលដែលលើកទឹកចិត្តដល់អង្គភាពអាជីវកម្មអង់គ្លេសឱ្យបង្កើនការវិនិយោគ និងកិច្ចសហប្រតិបត្តិការនៅវៀតណាម និងគាំទ្រវៀតណាមក្នុងការអនុវត្តភាពជាដៃគូផ្លាស់ប្តូរថាមពលយុត្តិធម៌ (JETP)។

មេដឹកនាំទាំងពីរបានឯកភាព​គ្នាកំណត់គោលដៅនៃការបង្កើនទំហំពាណិជ្ជកម្មទ្វេដងនាពេលអនាគត។ លោកនាយករដ្ឋមន្ត្រីអង់គ្លេសសង្ឃឹមថា វៀតណាមនឹងគាំទ្រកិច្ចសហប្រតិបត្តិការលើវិស័យពាណិជ្ជកម្មអេឡិចត្រូនិក និងសេវាកម្មហិរញ្ញវត្ថុក្នុងក្របខ័ណ្ឌនៃកិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP)។ ទាក់ទងនឹងកិច្ចសហប្រតិបត្តិការសន្តិសុខ និងការពារជាតិ ភាគីទាំងពីរបានឯកភាពគ្នាលើការធ្វើពិពិធកម្មកិច្ចសហប្រតិបត្តិការ រួមគ្នាដោះស្រាយការធ្វើចំណាកស្រុកខុសច្បាប់ និងឯកភាពគ្នាពង្រឹងកិច្ចសហប្រតិបត្តិការការពារជាតិដែល​ទាក់ទងនឹងវិស័យ​កងកម្លាំងរក្សាសន្តិភាព និងការបណ្តុះបណ្តាល។

ទិដ្ឋភាពនៃកិច្ចពិភក្សាការងារ (រូប​ថត៖ vnanet.vn)

នៅចុងបញ្ចប់នៃកិច្ចពិភាក្សាការងារ មេដឹកនាំទាំងពីរបានចេញសេចក្តីថ្លែងការណ៍រួមស្តីពីការដែលភាគីទាំងពីរដំឡើងទំនាក់ទំនងវៀតណាម-ចក្រភពអង់គ្លេសទៅជាភាពជាដៃគូយុទ្ធសាស្ត្រលើគ្រប់ជ្រុងជ្រោយជាផ្លូលការ។ ខ្លឹមសារនៃសេចក្តីថ្លែងការណ៍រួមបានវាយតម្លៃខ្ពស់ចំពោះសមិទ្ធផលសំខាន់ៗនៃទំនាក់ទំនងទ្វេភាគី បញ្ជាក់ពីគោលការណ៍ និងកំណត់ទិសដៅសំខាន់ៗដើម្បីលើកកម្ពស់ និងពង្រឹងកិច្ចសហប្រតិបត្តិការ អភិវឌ្ឍទំនាក់ទំនងមិត្តភាពជាប្រពៃណី និងភាពជាដៃគូយុទ្ធសាស្ត្រវៀតណាម-ចក្រភពអង់គ្លេស។

ភាគីទាំងពីរបានសង្កត់ធ្ងន់ថា ការចេញសេចក្តីថ្លែងការណ៍រួមរបស់មេដឹកនាំទាំងពីរ ស្តីពីការដំឡើងទំនាក់ទំនងទ្វេភាគីទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ និងការចុះហត្ថលេខាលើកិច្ចព្រមព្រៀងសហប្រតិបត្តិការចំណាកស្រុក ក៏ដូចជាកិច្ចព្រមព្រៀងមួយចំនួនក្នុងវិស័យសេដ្ឋកិច្ច ហិរញ្ញវត្ថុបៃតង ការអប់រំ-បណ្តុះបណ្តាល សុខភាព ថាមពលស្អាត ថាមពលកកើតឡើងវិញ កិច្ចសហប្រតិបត្តិការក្នុងស្រុកជាដើម ក្នុងអំឡុងពេលដំណើរទស្សនកិច្ចរបស់លោកអគ្គលេខាបក្ស គឺមានសារៈសំខាន់ខ្លាំងណាស់ ដែលបង្កើតមូលដ្ឋានគ្រឹះដើម្បីពង្រឹងទំនាក់ទំនងសហប្រតិបត្តិការរវាងប្រទេសទាំងពីរ។ មេដឹកនាំទាំងពីរបានឯកភាពថានឹងសម្របសម្រួលគ្នា​យ៉ាងជិតស្និទ្ធដើម្បីអនុវត្តក្របខ័ណ្ឌនៃទំនាក់ទំនងថ្មីមួយនេះ៕

បកប្រែដោយ Duy Hoan