កិច្ចសហប្រតិបត្តិការទ្វេភាគីរវាងវៀតណាមនិងឡាវ កំពុងអភិវឌ្ឍយ៉ាងសកម្មលើវិស័យជាច្រើន

ក្នុងជំនួបជាមួយលោក Thongloun Sisoulith អគ្គលេខាបក្ស និងជាប្រធានរដ្ឋឡាវ លោក Bui Thanh Son បានអបអរសាទរចំពោះសមិទ្ធិផលសំខាន់ៗរបស់ប្រទេសឡាវ ហើយជឿជាក់ថា ប្រទេសឡាវនឹងរៀបចំប្រកបដោយជោគជ័យនូវមហាសន្និបាតនៃគណៈកម្មាធិការបក្សគ្រប់ជាន់ថ្នាក់ ឆ្ពោះទៅកាន់មហាសន្និបាតបក្សទូទាំងប្រទេសលើកទី១២  បន្តកសាងប្រទេសឡាវខ្លាំងមាំមួន វិបុលភាព ជាមួយនឹងតួនាទីកាន់តែខ្ពស់នៅក្នុងតំបន់ និងនៅលើឆាកអន្តរជាតិ។ លោក Bui Thanh Son បានសម្តែងនូវសេចក្តីរីករាយចំពោះការអភិវឌ្ឍជាវិជ្ជមាននៃកិច្ចសហប្រតិបត្តិការទ្វេភាគីលើវិស័យជាច្រើនដែលបង្ហាញតាមរយៈជំនួបរវាងលោក Thongloun Sisoulith អគ្គលេខាបក្ស និងជាប្រធានរដ្ឋឡាវ  និងលោក To Lam អគ្គលេខាបក្សកុម្មុយនិស្តវៀតណាម និងជំនួបរវាងការិយាល័យនយោបាយទាំងពីរ ក៏ដូចជាជំនួបផ្សេងទៀតរវាងថ្នាក់ដឹកនាំជាន់ខ្ពស់នៃប្រទេសទាំងពីរ។

លោក Bui Thanh Son ជួបជាមួយលោក Thongloun Sisoulith (រូបថត៖ vnanet.vn)

លោក Thongloun Sisoulith បានវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តិការរវាងប្រទេសទាំងពីរនាពេលកន្លងមកនេះ។ លោក Thongloun Sisoulith ស្នើឲ្យប្រទេសទាំងពីរបន្តផ្លាស់ប្តូរព័ត៌មាន និងចែករំលែកបទពិសោធន៍ក្នុងការត្រៀមរៀបចំមហាសន្និបាតបក្សទូទាំងប្រទេសនៅប្រទេសនីមួយៗ ការកសាងបក្ស ការកសាងប្រព័ន្ធនយោបាយ និងការគ្រប់គ្រងសេដ្ឋកិច្ចសង្គម ការធ្វើសមាហរណកម្មអន្តរជាតិ និងការអនុវត្តសេចក្តីសម្រេចចិត្តរបស់មហាសន្និបាតរបស់បក្សនីមួយៗ នាពេលខាងមុខ។ លោក Thongloun Sisoulith សម្តែងនូវសេចក្តីរីករាយចំពោះវឌ្ឍនភាពនៃការដោះស្រាយការលំបាក និងបញ្ហារបស់គម្រោងសំខាន់ៗមួយចំនួន រួមចំណែកដល់ការអភិវឌ្ឍសេដ្ឋកិច្ចសង្គមនៃប្រទេសឡាវ និងទំនាក់ទំនងរវាងប្រទេសទាំងពីរ។

*ក្នុងជំនួបជាមួយលោក Sonexay Siphandone នាយករដ្ឋមន្ត្រីឡាវ លោក Bui Thanh Son បានអបអរសាទរចំពោះប្រទេសឡាវដែលបានបំពេញដោយជោគជ័យនូវតួនាទីជាប្រធានអាស៊ានប្ដូរវេននៅឆ្នាំ២០២៤។

លោក Bui Thanh Son ជួបសវនាការជាមួយលោក Sonexay Siphandone (រូបថត៖ vnanet.vn)

លោក Bui Thanh Son អះអាងថា ក្រសួងការបរទេសនៃប្រទេសទាំងពីរនឹងខិតខំប្រឹងប្រែងសហការជាមួយក្រសួង ស្ថាប័ននានានៃភាគីទាំងពីរ ដើម្បីអនុវត្តឲ្យបានល្អនូវកិច្ចព្រមព្រៀង កម្មវិធីនិងគម្រោងសហប្រតិបត្តិការវៀតណាម-ឡាវ ព្រមទាំងត្រៀមរៀបចំយ៉ាងសកម្មនូវសកម្មភាពការបរទេសសំខាន់ៗរបស់ប្រទេសទាំងពីរនាពេលខាងមុខ។

លោក Sonexay Siphandone បានអះអាងថា បក្ស រដ្ឋ រដ្ឋាភិបាល និងប្រជាជនឡាវតែងតែយកចិត្តទុកដាក់ និងផ្តល់អាទិភាពលើការពង្រឹងទំនាក់ទំនងសាមគ្គីភាពពិសេស និងកិច្ចសហប្រតិបត្តិការលើគ្រប់វិស័យជាមួយវៀតណាម ហើយសង្កត់ធ្ងន់លើទំនុកចិត្តនយោបាយខ្ពស់នៅពេលដែលនាយករដ្ឋមន្ត្រីទាំងពីរមានជំនួបទ្វេភាគីជាច្រើននៅឆ្នាំ២០២៤៕

បកប្រែដោយ Thuy Anh