ធានាបាននូវសន្តិសុខស្បៀងក្នុងគ្រប់កាលៈទេសៈ

លោកនាយករដ្ឋមន្រ្តី Nguyen Xuan Phuc ថ្លែងក្នុងសន្និសីទ (រូបថត៖ vnanet.vn)

ថ្លែងមតិក្នុងសន្និសីទ លោកនាយករដ្ឋមន្រ្តី Nguyen Xuan Phuc បានអះអាងនូវការប្តេជ្ញាចិត្តរបស់រដ្ឋាភិបាលក្នុងការអនុវត្ដភារកិច្ចផ្ទួនគ្នាដោយប្រយុទ្ធប្រឆាំងនឹងជំងឺរាតត្បាតផង និងរក្សាស្ថិរភាពជីវភាពរស់នៅឲ្យប្រជាជនរក្សាផលិតកម្មក៏ដូចជាវិស័យផ្សេងៗទៀត។ លោកនាយករដ្ឋមន្រ្តីបានសង្កត់ធ្ងន់ថា សន្តិសុខស្បៀងគឺជាបញ្ហាដ៏សំខាន់មួយសម្រាប់ប្រទេសជាតិទាំងអស់ ជាពិសេសក្នុងបរិបទនៃស្ថានភាពអស្ថិរភាពនយោបាយ សន្តិសុខមិនមែនប្រពៃណីនិងជំងឺរាតត្បាតនៅលើពិភពលោក។

អំពីការអនុវត្ដភារកិច្ចក្នុងរយៈពេលខាងមុខ លោកនាយករដ្ឋមន្ត្រីបានតម្រូវឲ្យមានការផ្សារភ្ជាប់ការអភិវឌ្ឍកសិកម្មជាមួយការរៀបចំរចនាសម្ព័ន្ធសេដ្ឋកិច្ចឡើងវិញដោយផ្អែកលើការអភិវឌ្ឍសេដ្ឋកិច្ចទីផ្សារតាមទិសសង្គមនិយម។ ចាំបាច់ត្រូវបន្តរៀបចំរចនាសម្ព័ន្ធកសិកម្មឡើងវិញដើម្បីរកដំណោះស្រាយប្រសើរបំផុតដើម្បីបង្កើនទិន្នផលក្នុងប្រទេស។ ទន្ទឹមនឹងនោះ កំណត់នូវគោលដៅក្នុងការធានាសន្ដិសុខស្បៀងដែរ។

លោកនាយករដ្ឋមន្រ្តី Nguyen Xuan Phuc  និងប្រតិភូចូលរួមសន្និសីទ (រូបថត៖ vnanet.vn)

លោកនាយករដ្ឋមន្រ្តីបានស្នើឱ្យក្រសួងកសិកម្មនិងអភិវឌ្ឍន៍ជនបទ ទទួលយកយោបល់ពីអ្នកវិទ្យាសាស្ត្រដើម្បីអនុវត្ដវិទ្យាសាស្ត្រនិងបច្ចេកវិទ្យាក្នុងវិស័យកសិកម្ម។ ជាពិសេសផ្ដល់អាទិភាពក្នុងការជ្រើសរើសពូជនិងបង្កើតពូជថ្មីដែលមានសក្តានុពលសេដ្ឋកិច្ចខ្ពស់និងបន្ស៊ាំទៅនឹងការប្រែប្រួលអាកាសធាតុ។ បង្កើនប្រភពវត្ថុធាតុដើមការកែច្នៃនិងទីផ្សារនាំចេញ។ លោកនាយករដ្ឋមន្រ្តីក៏បានស្នើឱ្យបង្កើនការកៀរគរធនធានសម្រាប់ការវិនិយោគក្នុងវិស័យកសិកម្មដោយមានការចូលរួមពីរដ្ឋ សហគ្រាសនិងកសិករ។ ជាមួយគ្នានេះ​ លោកនាយករដ្ឋមន្រ្តីក៍ប្រគល់ឲ្យក្រសួងកសិកម្មនិងអភិវឌ្ឍន៍ជនបទនិងខុទ្ទកាល័យរដ្ឋាភិបាលតាក់តែងសេចក្ដីសម្រេចចិត្ដថ្មីរបស់រដ្ឋាភិបាលឲ្យសមស្របនឹងស្ថានភាពថ្មីនៃវិស័យកសិកម្មនិងសន្តិសុខស្បៀង៕

បកប្រែដោយ Pham Diep