ការចរចាបទឈប់បាញ់នៅតំបន់​ហ្គាហ្សាទទួលវិវឌ្ឍន៍ ខណៈដែលក្រុមប្រឹក្សាសន្តិសុខអង្គការសហប្រជាជាតិ​បើកកិច្ចប្រជុំបន្ទាន់

ក្រុមហាម៉ាស់បានយល់ព្រមលើបទឈប់បាញ់បណ្តោះអាសន្នដែលមានរយៈពេលរហូតដល់ ៤០ ថ្ងៃ ហើយបានបោះបង់ចោលការទាមទាររបស់ខ្លួនសម្រាប់ការធានាជាលាយលក្ខណ៍អក្សរពីអ្នកសម្របសម្រួលដែលអ៊ីស្រាអែលនឹងបន្តការចរចារហូតដល់ពេលសម្រេចបានបទឈប់បាញ់ជាស្ថាពរ។ នៅក្រោមកិច្ចព្រមព្រៀងឈប់បាញ់បណ្តោះអាសន្ននេះ ការដោះលែងចំណាប់ខ្មាំង "មានកំណត់" នឹងត្រូវបានអនុវត្តជាថ្នូរនឹងសេរីភាពរបស់ជនប៉ាឡេស្ទីនដែលត្រូវបានឃុំខ្លួននៅក្នុងពន្ធនាគាររបស់អ៊ីស្រាអែល។ អ៊ីស្រាអែលក៏បានយល់ព្រមដកខ្លួនចេញពីតំបន់ដីនៅតាមបណ្តោយព្រំដែនអេហ្ស៊ីប និងហ្គាហ្សានៅខាងភាគីប៉ាឡេស្ទីន រួមទាំងច្រកព្រំដែន Rafah ផងដែរ។

កន្លែងខូចខាតបន្ទាប់ពីការវាយប្រហារតាមផ្លូវអាកាសរបស់អ៊ីស្រាអែលនៅជំរំជនភៀសខ្លួន Maghazi តំបន់ហ្គាហ្សា កាលពីថ្ងៃទី៣ ខែមករា ឆ្នាំ២០២៥។ រូបថតរូបភាព៖ THX/TTXVN

ទន្ទឹមនឹងនេះ ការចរចាដោយប្រយោលថ្មីមួយស្តីពីបទឈប់បាញ់នៅតំបន់ហ្គាហ្សាក៏បានបន្តឡើងវិញនៅក្នុងរដ្ឋធានីដូហារបស់ប្រទេសកាតាកាលពីថ្ងៃទី ៣ មករា។ កិច្ចពិភាក្សាបានផ្តោតទៅលើការព្រមព្រៀងបទឈប់បាញ់ជាស្ថាពរ និងការដកកងកម្លាំងអ៊ីស្រាអែល។ កាសែត National News បានដកស្រង់ប្រភពព័ត៌មានមួយដែលនិយាយថា គណៈប្រតិភូអ៊ីស្រាអែលកំពុងបន្តកិច្ចប្រជុំបច្ចេកទេសនៅទីក្រុងដូហា ដើម្បីបង្រួញគម្លាតជាមួយក្រុមហាម៉ាស។ ទោះជាយ៉ាងណាក៏ដោយ ការវាយតម្លៃបឋមបង្ហាញថា ដំណើរការចរចាមិនសម្រេចបានជំហានទម្លុះទម្លាយនោះទេ។

នៅក្នុងការវិវឌ្ឍន៍មួយផ្សេងទៀតកាលពីថ្ងៃទី ៣ មករា កាសែត Times of Israel បានរាយការណ៍ថា ក្រុមប្រឹក្សាសន្តិសុខអង្គការសហប្រជាជាតិ (UNSC) បានបើកកិច្ចប្រជុំបន្ទាន់មួយស្តីពីស្ថានភាពនៅតំបន់ហ្គាហ្សា ដោយពិភាក្សាអំពីការវាយឆ្មក់នាពេលថ្មីៗនេះរបស់អ៊ីស្រាអែលសំដៅទៅលើមន្ទីរពេទ្យ Kamal Adwan នៅភាគខាងជើងនៃសមុទ្រមេឌីទែរ៉ាណេនេះ។ កិច្ចប្រជុំនេះត្រូវបានធ្វើឡើងតាមសំណើរបស់ប្រទេសអាល់ហ្សេរី តំណាងប្លុកប្រទេសអារ៉ាប់នៅក្រុមប្រឹក្សាសន្តិសុខអង្គការសហប្រជាជាតិ៕

តាម VOVWORLD