ជម្រុញទំនាក់ទំនងភាពជាដៃគូសហប្រតិបត្តិការលើគ្រប់ជ្រុងជ្រោយរវាងវៀតណាម និងមីយ៉ាន់ម៉ាឲ្យកាន់តែស៊ីជម្រៅថែមទៀត
កប.អនឡាញ - នារសៀលថ្ងៃទី ១២ មីនា នៅទីស្នាក់ការរដ្ឋាភិបាល នាយករដ្ឋមន្ត្រីវៀតណាម លោក Nguyen Xuan Phuc បានទទួលជួបសន្ទនាជាមួយរដ្ឋមន្ត្រីក្រសួងសហប្រតិបត្តិការអន្តរជាតិមីយ៉ាន់ម៉ា លោក U Kyaw Tin ក្នុងឱកាសអញ្ជើញមកចូលរួមសម័យប្រជុំលើកទី៩ នៃគណៈកម្មាធិការចម្រុះស្តីពីកិច្ចសហប្រតិបត្តិការទ្វេភាគីវៀតណាម - មីយ៉ាន់ម៉ា។
នាយករដ្ឋមន្ត្រីវៀតណាម លោក Nguyen Xuan Phuc ជឿជាក់ថា ជោគជ័យនៃកិច្ចប្រជុំនេះនឹងរួមចំណែកយ៉ាងសំខាន់ក្នុងការអភិវឌ្ឍកិច្ចសហប្រតិបត្តិការលើគ្រប់វិស័យរវាងវៀតណាម និងមីយ៉ាន់ម៉ា។ លោកនាយករដ្ឋមន្ត្រីបានអះអាងថា វៀតណាមជានិច្ចកាលគាំទ្រចំពោះកិច្ចប្រឹងប្រែងរបស់មីយ៉ាន់ម៉ាក្នុងការលើកកម្ពស់ដំណើរការសន្តិភាព និងការផ្សះផ្សាជាតិ។
|
|
នាយករដ្ឋមន្ត្រីវៀតណាម លោក Nguyen Xuan Phuc ទទួលជួបសន្ទនាជាមួយរដ្ឋមន្ត្រីក្រសួងសហប្រតិបត្តិការអន្តរជាតិមីយ៉ាន់ម៉ា លោក U Kyaw Tin (រូបថត៖ vnanet.vn) |
លោករដ្ឋមន្ត្រី U Kyaw Tin បានសង្កត់ធ្ងន់ថា ទំនាក់ទំនងរវាងមីយ៉ាន់ម៉ា និងវៀតណាមកំពុងអភិវឌ្ឍយ៉ាងខ្លាំងក្លា ហើយក្នុងឱកាសនេះលោកក៏បានជម្រាបជូនលោកនាយករដ្ឋមន្ត្រី Nguyen Xuan Phuc អំពីលទ្ធផលល្អនៃកិច្ចប្រជុំនេះដែរ។ លោករដ្ឋមន្ត្រី U Kyaw Tin បានវាយតំលៃថា ចាប់តាំងពីបានបង្កើតទំនាក់ទំនងការទូតកនៅឆ្នាំ១៩៧៥មក ទំនាក់ទំនងរវាងប្រទេសទាំងពីរត្រូវបានពង្រឹងជាបន្តបន្ទាប់តាមរយៈដំណើរទស្សនកិច្ចរបស់ថ្នាក់ដឹកនាំនៃភាគីទាំងពីរ។ ទន្ទឹមនឹងនោះ ទំនាក់ទំនងលើវិស័យសេដ្ឋកិច្ច ពាណិជ្ជកម្ម និងការវិនិយោគរវាងប្រទេសទាំងពីរក៏បានអភិវឌ្ឍយ៉ាងខ្លាំងផងដែរ។
នាយករដ្ឋមន្ត្រីវៀតណាម លោក Nguyen Xuan Phuc បានអះអាងថា វៀតណាមនឹងបន្តគាំទ្រមីយ៉ាន់ម៉ាក្នុងវេទិកាពហុភាគី ហើយសង្ឃឹមថា ប្រទេសទាំងពីរនឹងបន្តសម្របសម្រួលយ៉ាងជិតស្និទ្ធ ជាពិសេសក្នុងឆ្នាំដែលប្រទេសវៀតណាមធ្វើជាប្រធានអាស៊ាន ២០២០ និងជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិសម្រាប់ឆ្នាំ ២០២០-២០២១។ លោកនាយករដ្ឋមន្ត្រី Nguyen Xuan Phuc សង្ឃឹមថា លោករដ្ឋមន្ត្រី U Kyaw Tin នឹងបន្តរួមចំណែកក្នុងការអភិវឌ្ឍទំនាក់ទំនងរវាងប្រទេសទាំងពីរ ក៏ដូចជាទំនាក់ទំនងរវាងបណ្ដាប្រទេសអាស៊ានផងដែរ។
បកប្រែដោយ Thanh Cong