ពិធីរំលឹកវិញ្ញាណក្ខន្ធជនរួមជាតិ កម្មាភិបាលនិងយុទ្ធជនដែលស្លាប់ដោយសារជំងឺកូវីដ-១៩

កប.អនឡាញ - នាថ្ងៃទី ១៩ ខែវិច្ឆិកា គណៈកម្មាធិការមជ្ឈិមរណសិរ្សមាតុភូមិវៀតណាមបានសម្របសម្រួលជាមួយគណៈកម្មាធិការបក្សទីក្រុងហូជីមិញ គណៈកម្មាធិការបក្សទីក្រុងហាណូយ និងខេត្តក្រុងនានានៅទូទាំងប្រទេស រៀបចំពិធីរំលឹកវិញ្ញាណក្ខន្ធជនរួមជាតិ កម្មាភិបាល យុទ្ធជនដែលបានស្លាប់ដោយសារជំងឺកូវីដ-១៩ នៅសាលប្រជុំ Thong Nhat (ទីក្រុងហូជីមិញ) និងសួនច្បារ Thong Nhat (រដ្ឋធានីហាណូយ)។

អញ្ជើញចូលរួមពិធីមានវត្ដមានពីថ្នាក់ដឹកនាំបក្ស រដ្ឋ ក្រសួង ស្ថាប័ននានានិងថ្នាក់ដឹកនាំមូលដ្ឋាននានា រួមទាំងតំណាងអង្គការអន្ដរជាតិប្រចាំនៅវៀតណាម; សាច់ញាត្ដិរបស់ពលរដ្ឋនិងកម្មាភិបាល និងយុទ្ធជនដែលបាន ស្លាប់ដោយសារជំងឺកូវីដ-១៩ ក៏ដូចជាប្រជាជននៅទូទាំងប្រទេសផងដែរ។  

លោកអគ្គលេខាបក្ស Nguyen Phu Trong បានផ្ញើកម្រងផ្កាគោរពវិញ្ញាណក្ខន្ធជនរួមជាតិ កម្មាភិបាលនិងយុទ្ធជនដែលស្លាប់ដោយសារជំងឺកូវីដ-១៩។

យោងតាមក្រសួងសុខាភិបាល គិតដល់ត្រឹមថ្ងៃទី ១៩ ខែវិច្ឆិកា វៀតណាម មានអ្នកស្លាប់ដោយសារជំងឺកូវីដ-១៩ ចំនួនជាង ២៣,៥០០ នាក់ ក្នុងនោះទីក្រុងហូជីមិញមានអ្នកស្លាប់ជាង ១៧.២០០នាក់  ។

ពិធីរំលឹកវិញ្ញាណក្ខន្ធត្រូវបានធ្វើឡើងដើម្បីរំលឹកដល់អ្នកដែលបានបាត់បង់ជីវិតដោយសារជំងឺកូវីដ-១៩  និងចូលរួមរំលែកទុក្ខជាមួយក្រុមគ្រួសារមានអ្នកស្លាប់។ នេះក៏ជាបំណងប្រាថ្នារបស់ប្រជាជន និងជាមនោសញ្ចេតនាដ៏ពិសិដ្ឋរបស់យើងម្នាក់ៗ ហើយជាការយកចិត្តទុកដាក់ ការចែករំលែក និងការលើកទឹកចិត្តរបស់បក្ស រដ្ឋ និងរណសិរ្សមាតុភូមិវៀតណាមជាមួយនឹងការឈឺចាប់របស់ជនរួមជាតិ។

កាសែតកងទ័ពប្រជាជនអនឡាញសូមផ្សាយរូបភាពមួយចំនួននៃពិធីរំលឹក វិញ្ញាណក្ខន្ធជនរួមជាតិ កម្មាភិបាល និងយុទ្ធជនដែលបាត់បង់ជីវិតដោយសារជំងឺរាតត្បាតកូវីដ-១៩   នៅទីក្រុងហាណូយនិងទីក្រុងហូជីមិញ។

បកប្រែដោយ Pham Diep