ប្រធានាធិបតីរុស្ស៊ីត្រៀមខ្លួនជាអ្នកសម្រុះសម្រួលរវាងអ៊ីរ៉ង់ និងអ៊ីស្រាអែល
ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃទី ១៨ មិថុនា បានបញ្ជាក់ថា ទីក្រុងម៉ូស្គូត្រៀមខ្លួនជាស្រេចដើម្បីដើរតួនាទីជាអ្នកសម្រុះសម្រួលដើម្បីបញ្ឈប់ជម្លោះរវាងអ៊ីរ៉ង់ និងអ៊ីស្រាអែល ដោយសង្កត់ធ្ងន់ថា កិច្ចព្រមព្រៀងដែលធានាសិទ្ធិអភិវឌ្ឍន៍កម្មវិធីនុយក្លេអ៊ែរស៊ីវិលរបស់ទីក្រុងតេអេរ៉ង់ និងសន្តិសុខដាច់ខាតរបស់អ៊ីស្រាអែលគឺអាចធ្វើទៅបាន។
    |
 |
|
រូបភាព៖ REUTERS/Dado Ruvic |
ថ្លែងក្នុងសម័យសន្ទនាជាមួយថ្នាក់ដឹកនាំនៃទីភ្នាក់ងារសារព័ត៌មានអន្តរជាតិនៅខាងក្រៅវេទិកាសេដ្ឋកិច្ចអន្តរជាតិ Saint Petersburg (SPIEF) លោកប្រធានាធិបតី Vladimir Putin បានឲ្យដឹងថា រុស្ស៊ីបានបញ្ជូនសំណើនេះទៅកាន់ប្រទេសអ៊ីរ៉ង់ អ៊ីស្រាអែល និងសហរដ្ឋអាមេរិក ហើយបានសង្កត់ធ្ងន់ថា នេះគឺជាបញ្ហាដ៏រសើប ប៉ុន្តែ "វាពិតជាអាចរកឃើញដំណោះស្រាយបាន"។ យោងតាមប្រធានាធិបតីរុស្ស៊ី វានឹងសមហេតុផល ប្រសិនបើភាគីទាំងអស់ស្វែងរកវិធីបញ្ឈប់ជម្លោះ ហើយឆ្ពោះទៅរកដំណោះស្រាយដែលអាចទទួលយកបានសម្រាប់ភាគីទាំងពីរ៖ អ៊ីរ៉ង់ត្រូវបានធានាសិទ្ធិអភិវឌ្ឍកម្មវិធីនុយក្លេអ៊ែរសម្រាប់គោលបំណងសន្តិភាព ខណៈដែលអ៊ីស្រាអែលមានសន្តិសុខដាច់ខាត។
លោកប្រធានាធិបតី Vladimir Putin ក៏បានបង្ហើបថា យោងតាមព័ត៌មានដែលទីក្រុងម៉ូស្គូទទួលបាន រោងចក្រក្រោមដីរបស់អ៊ីរ៉ង់នៅតែមាន ហើយការវាយប្រហារតាមផ្លូវអាកាសរបស់អ៊ីស្រាអែលមិនបង្កការខូចខាតធ្ងន់ធ្ងរដល់ហេដ្ឋារចនាសម្ព័ន្ធនុយក្លេអ៊ែរជាយុទ្ធសាស្ត្ររបស់ទីក្រុងតេអេរ៉ង់នៅឡើយទេ។
មុននោះ នៅក្នុងកិច្ចសន្ទនាតាមទូរស័ព្ទកាលពីចុងសប្តាហ៍មុនជាមួយប្រធានាធិបតីអាមេរិក លោក Donald Trump ប្រធានាធិបតីរុស្ស៊ី លោក Vladimir Putin ក៏បានស្នើទៅប្រធានាធិបតីអាមេរិក ដើរតួនាទីជាអ្នកសម្រុះសម្រួលរវាងអ៊ីរ៉ង់ និងអ៊ីស្រាអែល៕
តាម vovworld.vn