នាយករដ្ឋមន្ត្រី៖ ខេត្ត Ninh Thuan ត្រូវប្រើប្រាស់ធនធានទាំងអស់ប្រកបដោយប្រសិទ្ធភាព ដើម្បីជំរុញកំណើន

ស្ថិតនៅជាប់មាត់សមុទ្រ នៅប៉ែកខាងត្បូងភូមិភាគកណ្ដាល ដែលមានទីតាំងនៅចំណុចប្រសព្វនៃអ័ក្សចរាចរណ៍យុទ្ធសាស្ត្រចំនួនបីដែលតភ្ជាប់នឹងតំបន់ប៉ែកខាងកើតភាគខាងត្បូង តំបន់ប៉ែកខាងត្បូងភូមិភាគកណ្ដាល និងតំបន់ខ្ពង់រាប Tay Nguyen ខេត្ត Ninh Thuan មានសក្ដានុពលច្រើនសម្រាប់ការអភិវឌ្ឍទេសចរណ៍ កសិកម្ម រុក្ខាប្រមាញ់ នេសាទ ថាមពលកកើតឡើងវិញ និងឧស្សាហកម្ម ជាពិសេស ឧស្សាហកម្មកែច្នៃកសិផល។

លោកនាយករដ្ឋមន្ត្រី Pham Minh Chinh អញ្ជើញថ្លែងមតិក្នុងសន្និសីទប្រកាសផែនការមេនិងជំរុញការវិនិយោគនៅខេត្ត Ninh Thuan

ផែនការមេខេត្ត Ninh Thuan ដំណាក់កាល ២០២១ - ២០៣០ ជាមួយនឹងគោលដៅថ្មីដល់ឆ្នាំ២០៣០ប្រែ ខេត្ត Ninh Thuan នឹងក្លាយជាខេត្តមួយដែលមានប្រាក់ចំណូលជាមធ្យមកម្រិតខ្ពស់នៃប្រទេសទាំងមូល ជាមួយនឹងការអភិវឌ្ឍយ៉ាងស្វាហាប់ ឆាប់រហ័ស និងប្រកបដោយចីរភាព ដោយមានសេដ្ឋកិច្ចសមុទ្រ និងសេដ្ឋកិច្ចទីក្រុង ជាកម្លាំងចលករសម្រាប់កំណើន។ ដល់ឆ្នាំ ២០៥០ ខេត្ត Ninh Thuan នឹងក្លាយជាខេត្តមួយដែលមានការអភិវឌ្ឍគ្រប់ជ្រុងជ្រោយ ឆាប់រហ័ស និងប្រកបដោយចីរភាព ជាមួយនឹងសេដ្ឋកិច្ចចម្រុះ និងវិបុលភាព។

អញ្ជើញថ្លែងមតិក្នុងសន្និសីទ លោកនាយករដ្ឋមន្ត្រី Pham Minh Chinh បានស្នើឱ្យខេត្ត Ninh Thuan ផ្តោតលើការកៀងគរ និងប្រើប្រាស់ប្រកបដោយប្រសិទ្ធភាពនូវគ្រប់ធនធានស្របច្បាប់ ដើម្បីជំរុញកម្លាំងចលករកំណើនប្រពៃណី (ការវិនិយោគ ការនាំចេញ ការប្រើប្រាស់); បង្កើតរបកគំហើញនៅក្នុងកម្លាំងចលករកំណើនថ្មី (សេដ្ឋកិច្ចបៃតង សេដ្ឋកិច្ចឌីជីថល សេដ្ឋកិច្ចវិលជុំ សេដ្ឋកិច្ចចែករំលែក សេដ្ឋកិច្ចបញ្ញា ការឆ្លើយតបនឹងការប្រែប្រួលអាកាសធាតុ ការអភិវឌ្ឍប្រកបដោយចីរភាព)។ ពង្រឹងការតភ្ជាប់តំបន់ក្នុងប្រទេស និងអន្តរជាតិ តាមរយៈប្រព័ន្ធគមនាគមន៍ ប្រព័ន្ធផលិតកម្ម ការផ្គត់ផ្គង់តាមខ្សែសង្វាក់ និងការតភ្ជាប់ទីផ្សារ; ពន្លឿនគម្រោងថាមពលកកើតឡើងវិញ កំពង់ផែសមុទ្រពហុបំណង គម្រោងថាមពលឧស្ម័ន LNG; បង្កើត និងអភិវឌ្ឍន៍មណ្ឌលឧស្សាហកម្ម Ca Na។

ក្នុងសន្និសីទនេះ ខេត្ត Ninh Thuan បានប្រគល់សេចក្តីសម្រេចអនុម័តគោលការណ៍វិនិយោគ វិញ្ញាបនបត្រ និងចុះហត្ថលេខាលើអនុស្សរណៈនៃការចុះឈ្មោះវិនិយោគ ដើម្បីដាក់ពង្រាយគម្រោងចំនួន ១៥ ដែលមានដើមទុនសរុបជាង ៥.៧ ពាន់លានដុល្លាអាមេរិក៕

បកប្រែដោយ Huyen Trang