ផ្សព្វផ្សាយកាហ្វេវៀតណាមទៅកាន់ពិភពលោក

ក្នុងសប្តាហ៍នេះ នៅទីក្រុង Buon Ma Thuot និងតំបន់មួយចំនួនក្នុងខេត្ត Dak Lak តំបន់ខ្ពង់រាបកណ្តាលវៀតណាម បានប្រព្រឹត្តទៅពិធីបុណ្យកាហ្វេ Buon Ma Thuot លើកទី ៩ ឆ្នាំ ២០២៥ ក្រោមប្រធានបទ "Buon Ma Thuot - គោលដៅនៃកាហ្វេពិភពលោក"។

ព្រឹត្តិការណ៍នេះរួមចំណែកផ្សព្វផ្សាយម៉ាកយីហោកាហ្វេ Buon Ma Thuot កសាងរូបភាពទីក្រុង Buon Ma Thuot ជា “ទីក្រុងកាហ្វេពិភពលោក”។

ពិធីបុណ្យកាហ្វេលើកទី៩ មានគោលបំណងកសាង Buon Ma Thuot ទៅជាគោលដៅកាហ្វេពិភពលោក

ពិធីបុណ្យកាហ្វេ Buon Ma Thuot លើកទី ៩ ឆ្នាំ ២០២៥ រួមមានសកម្មភាពសំខាន់ៗ៖ ករប្រកួតច្នៃប្រឌិតមាតិកាឌីជីថល ដើម្បីផ្សព្វផ្សាយពិធីបុណ្យលើបណ្តាញអ៊ីនធឺណិត; ពិព័រណ៌កាហ្វេ និងផលិតផល OCOP; ការប្រកួតក្រឡុកកាហ្វេ និងសកម្មភាពស្វែងយល់អំពីកាហ្វេ; សន្និសីទពាណិជ្ជកម្មអន្តរជាតិ-តភ្ជាប់ និងលើកកំពស់កាហ្វេវៀតណាម; ពិធីបុណ្យតាមដងផ្លូវ…

ជាពិសេស សន្និសីទពាណិជ្ជកម្មអន្តរជាតិ-តភ្ជាប់ និងលើកកំពស់កាហ្វេវៀតណាមបានប្រព្រឹត្តទៅនាថ្ងៃទី ១១ មិនា ដោយមានការចូលរួមពីតំណាងអង្គការកាហ្វេពិភពលោក - ICO និងប្រតិភូជាង ៧០០ នាក់មកពីប្រទេសអង់គ្លេស អាល្លឺម៉ង់ ជប៉ុន អាមេរិក អូស្ត្រាលី សិង្ហបុរី កូរ៉េ ចិន ប្រេស៊ីល។ សន្និសីទបានផ្តោតលើការពិភាក្សាខ្លឹមសារអំពីស្ថានភាពទីផ្សារកាហ្វេពិភពលោក និន្នាការប្រើប្រាស់កាហ្វេ...

នៅក្នុងសន្និសីទនេះ ធុរកិច្ចក្នុងស្រុក និងបរទេស ដៃគូ និងអ្នកផ្គត់ផ្គង់ក៏បានចុះហត្ថលេខាលើអនុស្សរណៈនៃការយោគយល់គ្នា ដើម្បីសហការក្នុងការអភិវឌ្ឍវិស័យកាហ្វេប្រកបដោយនិរន្តរភាព។ លោក Luu Van Khoi ប្រធានមន្ទីរឧស្សាហកម្ម និងពាណិជ្ជកម្មខេត្ត Dak Lak មានប្រសាសន៍ថា "សន្និសីទឆ្នាំនេះមានការចូលរួមពីអគ្គនាយិកានៃសមាគមកាហ្វេ - កាកាវពិភពលោក ហើយទាំងនេះគឺជាឱកាសដ៏ល្អសម្រាប់អង្គភាពអាជីវកម្មជុំជួប និងតភ្ជាប់ពាណិជ្ជកម្មរវាងអ្នកផលិត កែច្នៃកាហ្វេ ក្នុងស្រុក ជាមួយអ្នកនាំចូលពីបរទេស ក៏ដូចជាប្រព័ន្ធប្រើប្រាស់កាហ្វេក្នុងពិភពលោក ដើម្បីស្វែងរកទីផ្សារប្រើប្រាស់ផលិតផលរបស់ខ្លួន ជាពិសេសកាហ្វេរបស់ Dak Lak”។

ក្នុងឱកាសនេះដែរ ថ្នាក់ដឹកនាំខេត្ត Dak Lak បានរៀបចំកិច្ចប្រជុំជាមួយគណៈប្រតិភូអន្តរជាតិចំនួន ២៧ ដើម្បីចូលរួមពិធីបុណ្យកាហ្វេ Buon Ma Thuot លើកទី ៩ ឆ្នាំ ២០២៥។ នៅទីនេះ ថ្នាក់ដឹកនាំខេត្ត Dak Lak សង្ឃឹមថា ក្រោយពិធីបុណ្យនេះ គណៈប្រតិភូអន្តរជាតិនឹងរួមដំណើរជាមួយខេត្ត Dak Lak ដើម្បីផ្សព្វផ្សាយតម្លៃវប្បធម៌រវាងប្រពៃណី និងទំនើប រសជាតិដ៏ពិសេស និងឆ្ងាញ់របស់កាហ្វេ Buon Ma Thuot ព្រមទាំងសក្តានុពលអភិវឌ្ឍន៍ដ៏សម្បូរបែបនៃទឹកដីនេះទៅកាន់មិត្តភក្តិ និងដៃគូអន្តរជាតិ រួមចំណែកពង្រឹងចំណងមិត្តភាព និងកិច្ចសហប្រតិបត្តិការដើម្បីការអភិវឌ្ឍន៍ទៅវិញទៅមក។

ពិធីបុណ្យកាហ្វេ Buon Ma Thuot លើកទី ៩ ឆ្នាំ ២០២៥ រួមចំណែកលើកកំពស់តួនាទីកាហ្វេរបស់វៀតណាមលើឆាកអន្តរជាតិ និងជំរុញការអភិវឌ្ឍន៍សេដ្ឋកិច្ចសង្គមរបស់ខេត្ត Dak Lak។

បកប្រែដោយ Duy Hoan